Read urhobo Livitikọs 2 Bible Online

Livitikọs 2 - urhobo bible

Livitikọs 2

¹Ohwo da reyọ eka rhi vwo ze izobo kẹ Ọrovwohwo, Ọ Me nabọ duvwu ayen tavwe rọ ke vwẹ ayen rhe, O mi ku evwri phihọ o mi phi adjija phihọ.

²Ọ Me vwẹ ayen rhe emọ rẹ Erọn re irherẹn na Ọ Me ghwe ẹkuobọ vọn nẹ eka re duvwuru na vẹ evwri, kugbe adjija na ejobi; orherẹn na kọ torhẹ Ọnana rọ dia ẹkẹn re ẹkarohọ rọye vwẹ enu rẹ agbada na, izobo rẹ erhanre, ro gbo ọnrhen ororo kẹ Ọrovwohwo.

³Obo ri chekọ otọ vwẹ oma rẹ izobo rẹ ọka na kọ dia ọ rẹ Erọn vẹ emọ rọye; Ọnana hẹ izobo rẹ erhanre rọ ma fon rọ gbare kẹ Ọrovwohwo.

⁴Wọ da vwẹ izobo rẹ ọka eyẹ ikara ra kakare rhe rhi vwo ze izobo, ọ Me dia ọkuọka eyẹ ikara phepheghe ra vwẹ omamọ rẹ ọka re duvwuru ra nabọ vwẹ evwri gua kugbe eyẹ ivwiereki ro jephuo rẹ evwri nabọ mu yoyovwi.

⁵Ẹkpẹvwẹ wẹn da rha dia o rẹ ekuọka, a Me nabọ duvwu ọka na yoyovwi evwri mi muo ọ Me rha dia ọ ro jephuo.

⁶Wọ Me bẹrẹ ẹbẹbẹre, wo ku evwri phihọ, Ọnana izobo rẹ ọka.

⁷Ẹkpẹvwẹ wẹn da rha dia izobo rẹ ọka re cheri vwe oze, jọ dia omamọ rẹ ọka ra vwẹ evwri gbe.

⁸Wọ Me vwẹ izobo rẹ ọka ra vwẹ erọvwọ nana ru rhe Ọrovwohwo, ra da vwẹ ayen kẹ orherẹn na nu, kẹ ọye re ghwẹ ayen kpo agbada na.

⁹Orherẹn na Me dia izobo rẹ ọka na reyọ ẹkẹn rẹ ẹkarohọ na ọ Me torhẹ vwẹ enu rẹ agbada na, rọ dia izobo rẹ erhanre, ro gbo ọnrhe ororo kẹ Ọrovwohwo.

¹⁰Obo ri chekọ vwẹ izobo rẹ ọka na ejobi kẹ ọ rẹ Erọn vẹ emọ rọye, Ọnana izobo rẹ erhanre rọ ma fon rọ gbare kẹ Ọrovwohwo.

¹¹E jẹn ohwo ọvuọvo vwẹ izobo rẹ ọka re duvwuru ro phuẹ cha ẹga rẹ Ọrovwohwo-o, kidie wọ sa vwẹ emu kemu ro phuẹ ejobi eyẹ ọnyọn vwo ze izobo rẹ erhanre kẹ Ọrovwohwo-o.

¹²Ọ da dia ẹkpẹvwẹ rẹ orhọ kọye wo vwo rhe Ọrovwohwo, ẹkẹvuọvo a sa vwẹ ayen ze izobo rẹ ẹtorhẹ ro gbo ọnrhen vwẹ enu rẹ agbada rẹ ẹga na-a.

¹³Kizobo kizobo rẹ ọka re duvwẹ na ejobi we mi phi ughweri phihọ ayen, wo jẹn ughweri rẹ ọphọ rẹ Ọghẹnẹ wẹn na kare izobo rẹ ọka wẹ-ẹn; phi ughweri ba izobo wẹn ejobi.

¹⁴Wo de ze izobo rẹ ọka re emamọ rẹsosuọ kẹ Ọrovwohwo, ku wo ze fiki rẹ izobo rẹ emamọ rẹsosuọ wẹn ra nọre, ibi ekpokpọ rẹ eka eboba, ra kakere vwẹ erhanre.

¹⁵Wo mi ku evwri phihọ enu rọye wo mi phi adjija phihọ, Ọnana izobo rẹ ọka.

¹⁶Orherẹn na Me torhẹ rọ dia ẹkarohọ ẹkẹn abọ rẹ eka na vẹ evwri na kugbe adjija na ejobi Ọnana izobo re erhanre kẹ Ọrovwohwo.