Read urhobo Livitikọs 20 Bible Online

Livitikọs 20 - urhobo bible

Livitikọs 20

¹Ọrovwohwo da ta kẹ Mosis nẹ,

²Ta kẹ ihwo rẹ Izrẹl nẹ, Ohwo kohwo rẹ Izrẹl ejobi, eyẹ ọrhorha re rhe dia Izrẹl ejobi, rọ vwẹ ọmọ rọye kẹ Molẹk ke hwe ghwu; ihwo rẹ otọ na ejobi ke vwẹ ibieragha phio hwe.

³Ekpuyovwi mẹ ki mi hirhe opharo mẹ ku ohwo yena, ki mi bro nẹ ohri rẹ ihwo rọye, fikirobo rọ vwọ reyọ ọmọ rọye kẹ Molẹk, ro vwo gbe ẹshẹ mẹ ẹgua ro rhe vwo miovwo odẹ ọfuanfon Me na.

⁴Ọ da dianẹ ihwo rẹ otọ na ku aro fia kẹ uruemu rẹ ohwo yena, vwẹ ọke rọ vwọ reyọ ọmọ rọye vwọ kẹ Molẹk na, re ayen rhe hwe ghwu-u,

⁵ki mi hirhe aro mẹ ku ohwo yena vẹ uvwiẹ rọye, ki mi bru ayen ejobi kufia nẹ ohri rẹ ihwo rayen, te ọye vẹ ihwo ri nenire ru uruemu rẹ egagọ ri Molẹk na ejobi.

⁶Ohwo de bru ẹboepha vẹ eriedan, keye ọ vọye gbe ruẹ kugbe, ki mi hirhe opharo Me ku ohwo yena, ki mi bro nẹ ohri rẹ ihwo rọye.

⁷We phorho oma rẹ ovwan re wa fon; kidie Mẹvwẹ Ọrovwohwo Ọghẹnẹ wẹn na.

⁸Ovwan yọnrọn irhi Me, re we ru ayen, Mẹvwẹ Ọrovwohwo ro ru ovwan fon.

⁹Kidie ohwo kohwo ejobi rọ harhe ọsẹ eyẹ oni rọye ke hwe kufia; Ọ harhe ọsẹ vẹ oni rọye, vwẹ otiọye na ọbara rọye kọ dia uyovwi rọye.

¹⁰Ohwo de nene aye rẹ ọrivẹ rọye bru ehware, te ọshare na te aye na ke hwe ayen.

¹¹Ọshare ro du aye rẹ Ọsẹ rọye, yọ mrẹ ẹban rẹ Ọsẹ rọye; ke hwe ọ ve aye na, ọbara rayen kọ dia uyovwi rayen.

¹²Ohwo de du aye rẹ ọmọ rọye, ke hwe vẹ aye na; ayen bru ehware ro fori-i, ọbara rayen kọ dia uyovwi rayen.

¹³Eshare ivẹ de du ohwohwo, ayen ihwo ivẹ gbe ẹgua, ke hwe ayen kufia, ọbara rayen ọ uyovwi rayen.

¹⁴Ọshare da reyọ ọmọtẹ vẹ oni rọye kugbe, yo ru umwemwu; ka vwẹ erhanre torhẹ ọshare na vẹ aye na, rere umwemwu ọtiọye vwọ nẹ ohri rẹ ovwan.

¹⁵Ohwo de du eranvwe, ke hwe ohwo yena, ovwan mi rhe hwe eranvwe na.

¹⁶Aye da ra vwẹ oma kẹ eranvwe du, we mi hwe aye na vẹ eranvwe na, je hwe ayen re ọbara rayen kọ dia uyovwi rayen.

¹⁷Ohwo da reyọ oniọvo rẹ ọmọtẹ rọye, ọmọsẹ eyẹ oniọvo rẹ evun rọye, rọ da mrẹ ẹban rọye re ọmọtẹ da je mrẹ ẹban rẹ ọrọshare, ọye emu rẹ omevuọ rode, ke bru ayen nẹ ohri rẹ emọ rẹ ihwo rayen; ọ mrẹ ẹban rẹ oniọvo re ọmọtẹ rọye, kọ ghwa orukuruku rọye.

¹⁸Ọshare de bru aye afe kpo ovwerhẹ, ro de duo vẹ afe na, yọ rhanriẹ eyenre rọye, ye aye na rhie eyenre rẹ ọbara rọye phihọ, ke bru ayen ihwo ivẹ nẹ ohri rẹ ihwo rayen.

¹⁹Wọ mrẹ ẹban re Ọniọvo rẹ omoni rẹ oni wẹ-ẹn eye oniọvo re ọsẹ wẹ-ẹn, kidie ọye ẹban rẹ omoni; ihwo ọtiọye ke ghwa umwemwu rayen

²⁰Ọshare de du aye rẹ oniọvo rẹ ọsẹ rọye, yọ mrẹ ẹban rẹ oniọvo rẹ ọsẹ rọye na; kẹ ayen ghwa umwemwu rayen, ayen rhe vwiẹ rẹ ayen ki ghwu-u.

²¹Ọshare da reyọ aye rẹ oniọvo rọye, ọye obo ri jẹfuọn; yẹ ọ mrẹ ẹban rẹ oniọvo rọye, ẹgan kọye ayen dia bẹdẹ.

²²Fiki rẹ Ọnana ovwan gba yọnre irhi mẹ ejobi vẹ iji mẹ ejobi, re we ru ayen; rere otọ re Me vwẹ ovwan ra na vwo jẹn ovwan ẹkpa kufia.

²³Ovwan yan nene uruemu rẹ ihwo rẹ orere re Me djẹ nẹ obaro rẹ ovwan na-a; kidie emu tienana ayen ruru, kọye mi vwo tuoma rayen.

²⁴Ẹkẹvuọvo Me ta kẹ ovwan nẹ, ovwan cha riuku rẹ otọ rayen na, ke Me cha vwọ kẹ ovwan ru we vwo, otọ rọ djẹ vẹ ameivie vẹ ọnyọn. Mẹvwẹ Ọrovwohwo Ọghẹnẹ re ovwan, rọ hẹriẹ ovwan nu usun rẹ ihwo na.

²⁵Vwẹ ọtiọye na ovwan gbe phi ohẹriẹ phihọ eranvwe re fonro vẹ e ri jẹfuọn, eriyin je ephran re fonro vẹ e ri jẹfuọn, ovwan rhe gbe ẹgua vwẹ oma rẹ eranvwe eyẹ ephra-an, eyẹ emu kemu ro biẹ gbrigbrigbri vwẹ otọ, e re Me tanẹ ovwan kẹnẹ oma ke ne ijẹfuọn na.

²⁶Ke ovwan dia ọfuanfon kẹ vwẹ; kidie mẹvwẹ Ọrovwohwo na pha fuanfon, Me ke rha hẹriẹ ovwan nẹ usun rẹ ihwo ẹvo, rere ovwan vwọ dia ihwo mẹ.

²⁷Ọshare eyẹ aye rọ dia azẹn eyẹ ọrieda ke hwe kufia; ibieragha keye e vwo phi ayen hwe, ọbara rayen kọ dia uyovwi rayen.