Read urhobo Livitikọs 21 Bible Online

Livitikọs 21 - urhobo bible

Livitikọs 21

¹Ọrovwohwo na da ta kẹ Mosis nẹ, Ta kẹ irherẹn na, emeshare rẹ Erọn, nẹ e jẹn ayen ohwo ọvuọvo gbe oma rọye ẹgua vwẹ oma rẹ orivwi rẹ ohwo raye-en,

²jokpa rẹ ihwo re kẹ erẹ oma gangan, oni rọye, ọsẹ rọye ọmọshare rọye, ọmọtẹ rọye, oniọvo rẹ ọmọshare rọye,

³eyẹ oniọvo rẹ ọmọtobẹ rọye (rọ ke erẹ gangan ọ ro vwo ọshare-e; o se gbe ẹgua fiki rọye)

⁴O se gbe ẹgua kerẹ ọshare rẹ aye vwẹ ohri rẹ ihwo rọye-e rere o vwo miovwo odẹ rọye-e.

⁵E jẹn ayen bru ẹto nẹ uherevie raye-en, ayen ji bru asan ọvuọvo vwẹ oma raye-en.

⁶Ayen gba dia fuanfon vwọ kẹ Ọghẹnẹ rayen, re ayen vwo jẹ odẹ rẹ Ọghẹnẹ rayen emiovwo; kidie ayen ihwo re vwẹ erhanre ze izobo kẹ Ọrovwohwo, emuọre rẹ Ọghẹnẹ rayen vwẹ ọtiọye na kẹ ayen dia fuanfon.

⁷E jẹn ayen reyọ aye rọ dia igberadja-a eyẹ aye ro miovwo oma rọye-e; ayen je sa reyọ aye rẹ ọshare senre-e, kidie orherẹn ọye ohwo ọfuanfon vwọ kẹ Ọghẹnẹ rọye.

⁸Wẹ re reyerọ vwo mu, kidie ọye re cha vwẹ emuọre gọ Ọghẹnẹ wẹn, kọ je dia fuanfon kẹ wẹ, kidie Mẹvwẹ Ọrovwohwo ro ru we fon, Me pha fuanfon.

⁹Nighe ọmọtẹ rẹ orherẹn, ro miovwo oma rọye vwẹ ehware ebro, yo gbe ọsẹ rọye ẹgua; ka torhẹ kufia vwẹ evun rẹ erhanre.

¹⁰Orherẹn ro vwo uyovwi vwẹ ohri rẹ imoni rọye, ọ da dia orherẹn ra vwẹ evwri ghworo uyovwi, e de vwo mu rere ọ sa ghwa iwun rẹ ẹga na, Orherẹn yena rhe ru ẹto rọye zubu zubu-u, ọ rha je bẹrẹ emwa rọye-e;

¹¹Ọ gbe ru asan rẹ ohwo de ghwu-u, eyẹ kẹ ẹgua egbe-e, owenẹ ọ dia ọsẹ rọye eyẹ oni rọye;

¹²O ji se nẹ evun rẹ ẹshẹ ọfuanfon na-a eyẹrẹ ko miovwi ẹshẹ rẹ Ọghẹnẹ rọye-e; kidie e vwi ro mu vwẹ evun rẹ evwri re vwo ghworo ọfuanfon rẹ Ọghẹnẹ rọye nure: Mẹvwẹ Ọrovwohwo na.

¹³O de che vwo aye ọmọtobẹ kọye ọ reyọ

¹⁴Ọ sa reyọ ayeuku-u, eyẹ aye rẹ ọshare sẹnre-e, eyẹ aye ro gbe oma ku nure-e, eyẹ igberadja-a, ẹkẹvuọvo ọmọtobẹ rọ dia ohwo rẹ ihwo rọye ọvo ọye ọ reyọ,

¹⁵rere o vwo jẹ emọ rọye emiovwo vwẹ ohri rẹ ihwo rọye, kidie Mẹvwẹ Ọrovwohwo na ri ruro fon.

¹⁶Kọye Ọrovwohwo na ke ta kẹ Mosis nẹ,

¹⁷Ta kẹ Erọn nẹ, E jẹn ohwo kohwo rẹ unurhoro wẹn na ro vwo ota vwẹ oma rọye cha che ze izobo re emu kẹ Ọghẹnẹ rọye-e.

¹⁸Kidie ohwo ro vwo oka se bi kẹrẹ-ẹ, orhuẹro eyẹ ukpono, eyẹ ohwo ro vwo oka vwẹ opharo rọye eyẹ ọ re asan ọvo gronọ ọvo vwẹ oma rọye,

¹⁹eye ohwo rọ kru owọ eyẹ obọ,

²⁰eyẹ ọsuke, eyẹ ọkuanko eyẹ ohwo rọ mrẹ orẹ te-e, eyẹ ohwo rọ mwa evwua, eyẹ ekpọmọsẹ eyẹ ohwo ro vwo ẹrhẹn,

²¹ohwo kohwo vwẹ orua rẹ Erọn na ro vwo oka se si kẹrẹ re o ze izobo ra torhẹre kẹ Ọrovwohwo na-a fikirobo ro vwo vwo oka na ọ rha sa rhe ri ze izobo rẹ emuọre kẹ Ọghẹnẹ rọye-e.

²²Ọ sa re emu rẹ Ọghẹnẹ rọye na, Ọ rọ ma fon ejobi vẹ ọ re emu efuanfon na rhe,

²³ẹkẹvuọvo ọ sa rhe ri si kẹrẹ amwa ra vwọ tan na eyẹ agbada rẹ ẹga na-a, kidie o vwo oka, rere o vwo jẹ ẹshẹ mẹ na e gbe ẹgua, kidie Mẹvwẹ Ọrovwohwo ro ru ayen fon na.

²⁴Ke ọtiọye Mosis ta vwọ kẹ Erọn kugbe emọ rọye kugbe ihwo rẹ Izrẹl ejobi.