Read urhobo Livitikọs 24 Bible Online

Livitikọs 24 - urhobo bible

Livitikọs 24

¹Ọrovwohwo na da ta kẹ Mosis nẹ,

²Ghwoghwo kẹ ihwo rẹ Izrẹl re ayen reyọ omamọ re evwri rẹ Oliv re duvwuru vwo rhe we re vwo gbe urhukpẹ na, rere urhukpẹ na vwọ sa la kọke kọke

³Vwẹ obotafe re amwa re iseri na, vwe utughẹ ra da vwa oma na, Erọn Me nabọ rhuẹrẹ phihọ ne ovwọnvwọn re te urhiọke kọke kọke vwẹ obaro rẹ Ọrovwohwo na; Ọnana kọ dia urhi kẹ ovwan bẹdẹ vwẹ uvwiẹ kuvwiẹ ejobi.

⁴Ọ Me nabọ rhuẹrẹ irhukpẹ na ejobi phihọ vwẹ enu rẹ ogburhukpẹ ra vwẹ oro ru na vwẹ obaro rẹ Ọrovwohwo na kọke kọke.

⁵Wọ Me reyọ ọka ra nọre vwovworo, wọ Me vwẹ ayen kaka ikara ihwivẹ, ọvuọvo rọye Me họhọ te abivẹ rẹ ovwanvwọn ihwe.

⁶Wọ Me rha vwẹ ayen dje irhiẹn ivẹ, urhiẹn Ọvo esa, vwe enu rẹ agbada rẹ oro na.

⁷Wo mi rhe phi adjija phihọ urhiẹn ọvuọvo, rere a vwọ reyọ kugbe ikara na vwo ze izobo rẹ ẹkarophihọ ra torhẹre vwọ kẹ Ọrovwohwo na.

⁸Kedidjala kedidjala kọye Erọn vwo ru Ọnana vwẹ odẹ rẹ ihwo rẹ Izrẹl ejobi vwọ kẹ Ọrovwohwo na kọke kọke kerẹ ọphọ bẹdẹ.

⁹Kọ dia vwọ kẹ Erọn vẹ emeshare rọye, kẹ ayen riọ vwẹ asan ọfuanfon, kidie ọye ẹkẹn rọ ma fon ro tere vwẹ evun rẹ izobo ra vwe erhanre torhẹ kẹ Ọrovwohwo na, ọye ọrọye bẹdẹ.

¹⁰Asakiephana ọmọ rẹ aye rẹ Izrẹl vwiẹri, ọsẹ rọye da ohwo rẹ Ijipt, da ro otafe vwẹ ohri re ihwo re Izrẹl; ọmọ na vẹ ohwo re Izrẹl ọvo da kunu vwe evun re erhọn rayen,

¹¹kọye ọmọ re aye re Izrẹl na da ta ota omiomiovwi kpahe odẹ na, o da harhe ekan, Ayen da reyọ vwo rhe Mosis, Odẹ re oni rọye Shelomith, ọmọtẹ ri Dibri, ohwo rẹ orua ri Dan.

¹²Ayen de muo phihọ uwodi, bẹsiẹ ra vwọ riẹn ẹguọnọ rẹ Ọghẹnẹ vwọ kpahọ.

¹³Ọrovwohwo na da ta kẹ Mosis nẹ,

¹⁴Reyọ ọ rọ harhe ekan na ne evun rẹ erhọn na; rere ihwo ri nyoro na ejobi ghwe abọ kpahe uyovwi rọye, rere wo jẹn ukoko rẹ ihwo na ejobi reyọ ibieragha vwo phio.

¹⁵Re wọ je ta kẹ ihwo rẹ Izrẹl, nẹ ohwo kohwo rọ harhe Ọghẹnẹ rọye e jọ ghwa imwemwu rọye.

¹⁶Ohwo rọ ta ota omiomiovwi kpahe odẹ rẹ Ọrovwohwo ke hwe kufia; ọghwẹgbe na ejobi ki phihọ hwe owene ọ dia ọrhorha eyẹ ọmotọ, rọ da ta ota omiomiovwi kpahe odẹ na ke hwe.

¹⁷Ohwo ro hwe ohwo ke ji hwe rhe.

¹⁸Ohwo ro hwe eranvwe kọ hwa osa rọye, arhọ hwa osa rẹ arhọ.

¹⁹Ohwo da wan ọrivẹ oma, asan rọ wanrọ oma na Etiyin a je wan keri,

²⁰ubeku sun ubeku, ẹro sun ẹro, ubiako sun ubiako; obo rọ wan ọrivẹ na oma te eriyin a je wan oma rhe.

²¹Ohwo de hwe eranvwe kọ hwa ẹkẹvuọvo ohwo de rhe hwe ohwo ke hwe suọ.

²²Urhi ọvuọvo na ri sun ovwan te ọmotọ te ọrhorha, kidie Mẹvwẹ Ọrovwohwo Ọghẹnẹ re ovwan.

²³Kẹ eriyi Mosis tare kẹ ihwo rẹ Izrẹl; ayen da reyọ ọ rọ harhe ekan na vwọ phia nẹ evun rẹ erhọn na rhe, ayen da vwẹ ibieragha phio hwe. Kọye ihwo rẹ Izrẹl de ghine ru obo rẹ Ọrovwohwo ji urhi kẹ Mosis.