Read urhobo Livitikọs 26 Bible Online

Livitikọs 26 - urhobo bible

Livitikọs 26

¹Ovwan kare ẹdjọ ọvuọvo kẹ oma rẹ ovwa-an, emu kemu re bru ona phihọ we vwo viẹ-ẹ eyẹ wa ma osusu-un, wa je kare oragha vwo viẹ vwe otọ wẹn na-a, re we diguẹ ke aye-en, Kidie Mẹvwẹ Ọrovwohwo Ọghẹnẹ wẹn.

²Ovwan Me yọnrọn ẹdidjala Me na re we mu oghọ ke eshe mẹ na. Mẹvwẹ Ọrovwohwo na.

³Ovwan da yan vwe evun re irhi Me re ovwan da yọnrọn iji Me we de ru ayen,

⁴Ke Me vwẹ osio ke ovwan vwe ọke rọye, otọ na kọ mọ emamọ buebu, irhe re aghwa na ke mọ ibi rayen.

⁵Ke ovwan cha kọrọ eka rhiri re te ọke re vwo vuẹ idju na, kẹ ovwan ji vun rhiri re te ọke ra vwọ rhoma kọn ekankọn, kẹ ovwan cha re evun vọn, ovwan Me rha dia vwẹ otọ na vẹ ufuoma.

⁶Ke Me cha vwẹ ufuoma vwọ kẹ otọ na ejobi, ovwan de shevwerhẹ, emu kemu ọvuọvo rhe bru ovwan udu-u, ki mi si eranvwe re djoma nẹ otọ na, e gbi rhe phi ofovwi vwẹ otọ rẹ ovwan na-a.

⁷Ke ovwan cha djẹ ivwighrẹn re ovwan ejobi, ovwan ki hwe ayen ejobi.

⁸Ihwo iyori ke djẹ ujori, ujori rẹ ovwan ke djẹ uriori ihwe; ivwighrẹn re ovwan ejobi kẹ oda e wan ghwu.

⁹Ki mi ni ovwan ẹro, ki mi ru ovwan bu ku we vwiẹ buebu, mi che ru ọphọ mẹ na gan vwọ kẹ ovwan.

¹⁰Ovwan gbe cha sa re emu rẹ uhunhun rẹ ovwan re-e, ka cha ghwa emu rẹ uhunhun nẹ erhu rere a vwọ mrẹ asan ghwa emu rẹ orhọ re vun rhe phihọ.

¹¹Ki mi che nene ovwan dia, ovwan rhe tu erhi mẹ oma-a.

¹²Ke Me cha yan vwẹ ohri rẹ ovwan, Me Me rha dia Ọghẹnẹ rẹ ovwan, ovwan ke dia ihwo mẹ.

¹³Mẹvwẹ Ọrovwohwo Ọghẹnẹ rẹ ovwan, rọ reyọ ovwan vwo nẹ otọ rẹ Ijipt rhe, rere ovwan vwo je eviẹn re Ijipt ẹdia, oghwa ọhọhọhọ rọ gere ovwan ehun jovwo mi siro no rere ovwan vwọ mrẹ asan yan kpoma vi.

¹⁴Ẹkẹvuọvo ovwan rhe nyo urhuru mẹ re ovwan da yọnrọn irhi mẹ nana-a,

¹⁵ovwan da jẹ iji mẹ fia, erhi rọ ovwan de mu kpahe irhi mẹ, re ovwan rha yọnrọn irhi mẹ-ẹ, ovwan de miovwo ọphọ mẹ,

¹⁶ke enẹ mi che ru ovwan ke Me vwẹ oshọ ri kpregede mu ovwan, te emiavwe rẹ udu, vẹ ekpae ro rhuẹ ẹro ri ruẹ ohwo muẹ dọn. Ovwan da kọn ekankọn kọ kọn kufia, kidie ivwighrẹn rẹ ovwan ke cha re ayen,

¹⁷ki mi che hirhe opharo mẹ ku ovwan, ivwighrẹn rẹ ovwan ke vwẹ ovwan chiyi awọ; ihwo ri mu kpahe ovwan ki che sun ovwan, ke ovwan che muẹ dje ye ohwo ọvuọvo djẹ ovwa-an.

¹⁸Enana da phia ke ovwan nu ovwan gbi rhe nyo urhuru mẹ-ẹ, ke Me rhoma ru ovwan ọtiọye abọ ighwrẹn fiki rẹ imwemwu rẹ ovwan,

¹⁹ke Me guọghọ ogangan re eheri re ovwan na, ki mi ru obenu na gan kẹ ovwan kerẹ itehru, otọ na kọ dia kerẹ ẹrovwo,

²⁰ovwan ke vwẹ ogangan rẹ ovwan wian owian kufia, kidie otọ rẹ ovwan gbi che yovwi emu-u, irhe re otọ na gbe rha mọ-ọ.

²¹Ovwan de ji ku aro fia kẹ vwẹ, we rhe nyo ota mẹ-ẹ, ke Me vwẹ emiavwe buebu mu ovwan, obo rẹ imwemwu rẹ ovwan bu te eriyin mi che ruẹ ovwan asiẹghwrẹn.

²²Ki mi si obọ nẹ eranvwe re djoma vwẹ ohri re ovwan, ke ayen che mu emọ rẹ ovwan re, kugbe uchuru rẹ ovwan, ayen mi rhi ru ovwan havwe phihọ, idjerhe rẹ ovwan ejobi ki che gbe a rha mrẹ ohwo vwẹ aye-en.

²³Enana da phia kẹ ovwan nu rẹ ovwan gbi rhe rhivwi bru vwe rhe-e, wa da rha cho irhi mẹ,

²⁴ekpuyovwi mẹ ke Me yan jẹ ovwan vwo, ki mi ru ovwan brabra asiẹghwrẹn fiki re imwemwu rẹ ovwan

²⁵Ke Me cha vwẹ oda vwo bru ovwan, kọye cha re ovwan ihri vwọ kẹ ọphọ na; siẹ re ovwan de koko oma vwẹ irere rẹ ovwan ke Me vwẹ emiavwe mu ovwan, ovwan ke cha djẹ ro abọ rẹ ivwighrẹn rẹ ovwan.

²⁶Mi de vwirhi ọkpọ rẹ ikara rẹ ovwan nu, eya ihwe ke cha dia enyerhanre ọvo kaka ikara, kẹ ovwan cha vwanvwe emu re; ovwan da re nu evun rha vọn ovwa-an.

²⁷Enana de ru ovwan nu re ovwan rhe ji nyo urhuru mẹ-ẹ, ovwan da yan obo ri je ovwan,

²⁸ke Me vwẹ ophu yan jẹn ovwan vwo, ke Me cha fa ovwan asieghwrẹn fiki rẹ imwemwu rẹ ovwan.

²⁹Emọ rẹ ovwan keye ovwan che vwo ruẹ emu re, te emetẹ te emeshare rẹ ovwan.

³⁰Ke Me cha guọghọ imukpe re ovwan ejobi, ke Me nyavwe agbada re insẹns rẹ ovwan she, ki mi che mu irivwi re ovwan phihọ enu rẹ irivwi rẹ ẹdjọ re ovwan ejobi, ovwan ki che tue erhi mẹ oma.

³¹Ki mi che si ihwo ne irere re ovwan ejobi, ẹshẹ rẹ ovwan ejobi ke dia ifefe, ovwan da torhẹ eranvwe ri gbo ọnrhe ororo dede mi gbi nyu aye-en.

³²Ki mi che miovwi otọ na, rere ivwighrẹ re ovwan re dia vwẹ otọ na o vwo se gbe ayen unu.

³³Ke Me cha hra ovwan ro irere na ejobi, eda re dje phihọ ako ejobi ke che yoro ayen phia fiki rẹ ovwan otọ na kọ cha dia ofefe, irere re ovwan ejobi ka kua ayen fiotọ.

³⁴Ọke yena otọ na kọ che vwo omavwerhe fiki fiki re ẹdidjala rọye vwẹ ọke re otọ na dia ofefe kri te, rẹ ovwan cha vwọ dia otọ rẹ ivwighrẹ rẹ ovwan na, otọ na kọ nabọ rovwo oma ọ Me rhe yọnrọn ẹdidjala na.

³⁵Uche ọke re ovwan kua je otọ na vwo kri te ejobi ọye o vwo rovwo oma, omaerovwo re ẹdidjala ro se vwo-o vwe ọke rẹ ovwan vwọ dia otọ na jovwo.

³⁶Ovwan otu ra kua chekọ vwe otọ na, oma ko che bruro ovwan vwẹ otọ rẹ ivwighrẹ re ovwan na, edo re ọbe rẹ odju djuẹ ghevweghe kọ nẹrhẹ ayen mu onẹ dje, ke ayen cha djẹ kere ihwo ra vwe ọlọkọ vwọ tua, ke ayen che muẹ she ghwiotọ yẹ ohwo ovuọvo vwọ tua aye-en.

³⁷Ke ayen cha dje she teye ohwohwo, kerẹ ihwo re mrẹ ọlọkọ dje, ye ohwo ọvuọvo vwọ tua aye-en, ovwan rhe che vwo ogangan vwo mudia nene ivwighrẹ rẹ ovwan họnre-e.

³⁸Ke ovwan che ghwru phihọ otọ re ivwighrẹ re ovwan na.

³⁹Ihwo ri rhe chekọ vwẹ ohri rẹ ovwan ke cha hanvwe phihọ vwẹ otọ rẹ ivwighrẹn rẹ ovwan fiki rẹ orukuruku rayen, fiki rẹ umwemwu re ese rayen kẹ ayen hanvwe phihọ

⁴⁰Ẹkẹvuọvo ayen da rhọvwe imwemwu rayen vẹ e rẹ esẹ rayen rẹ ayen vwẹ ophiẹnvwe ru vwo gbe vwe ku na, kugbe obo rayen vwọ yan ju vwe vwo re ru ọrevun rayen na,

⁴¹Me da vwẹ fiki rọye yan jẹn ayen vwo Me da djẹ ayen kpo otọ re ivwighrẹn rayen na; ayen da rhẹriẹ udu ọgangan rayen vwe oma kpotọ kurhẹriẹ ne evun rẹ orukuruku rayen,

⁴²ke Me cha karophihọ ọphọ mẹ vi Jekọp, ke Me rha karophihọ ọphọ re Me ve Aizik kugbe ọphọ re Me vẹ Ebraham rere, ke Me karophihọ otọ na

⁴³Ẹkẹvuọvo ayen cha kua je otọ na vwo, otọ na ko rovwo oma vwẹ ẹdidjala rọye vwẹ ọke re ayen da kua no na, ayen Me rhe rhuẹrẹ obo rẹ ayen ruchọ, fikiridie ayen miovwo irhi mẹ, iji mẹ ki di tue erhi rayen oma.

⁴⁴Rọ vwọ dia ọtiọye dede na, re ayen cha vwọ dia orho re ihwo efa na, mi che si ẹro ne aye-en, mi ji che tue oma rẹ ayen re te obo ri mi vwo bru ayen kufia kakare-e ri mi de miovwo ọphọ re Me vẹ ayen rere-e, kidie Mẹvwẹ Ọrovwohwo Ọghẹnẹ rayen;

⁴⁵ẹkẹvuọvo Me cha vwi fiki rẹ ayen karophihọ ọphọ re Me vẹ esẹ rayen rere, ihwo re Me reyọ nẹ otọ re Ijipt rhe vwẹ irharo rẹ ihwo re irere efa na ejobi, rere Me vwọ dia Ọghẹnẹ rayen. Mẹvwẹ Ọrovwohwo na.

⁴⁶Enana yẹ irhi vẹ iji te ive rẹ Ọghẹnẹ ruru kẹ oma rọye vẹ ihwo rẹ Izrẹl vwẹ enu rẹ ugbenu ri Sinai vwẹ obọ ri Mosis