Read urhobo Livitikọs 27 Bible Online

Livitikọs 27 - urhobo bible

Livitikọs 27

¹Ọrovwohwo na da ta kẹ Mosis nẹ,

²Ta ke ihwo rẹ Izrẹl nẹ, Ohwo de ve oka rẹ ive rẹ ohwo vwọ ke Ọrovwohwo na ovwan roro uchunu rẹ igho rọye mu,

³unu rẹ igho re roro phihọ kẹ ọshare rẹ ikpe uje re te ujorha kọ dia ovwanvwọn ri shẹkẹl ujuvẹ gbe ihwe rẹ idọnọ efuanfon, kere ọtiobo ri shẹkẹl rẹ ẹshẹ na epha.

⁴Ohwo na da dia aye, ki shẹkẹl ọgban.

⁵Ohwo na da ohwo rẹ ikpe iyori re te ikpe uje, ke ovwan roro unu rẹ ọshare phihọ shẹkẹl uje, aye ke rha shẹkẹl ihwe.

⁶Ọ da rha dia ohwo rẹ emeranvwe ọvo re te ikpe iyori, ovwan ki roro unu rẹ ọshare phihọ shẹkẹl iyori, aye ke rha shẹkẹl erha rẹ idọnọ efuanfon.

⁷Ohwo rọ kpako te ikpe ujorha kpenu, ovwan ki roro unu rẹ ọshare phihọ shẹkẹl ihwiori, aye ke rha shẹkẹl ihwe.

⁸Ogbere re ohwo da gan wan obo rọ sa vwo hwa unu igho rẹ ovwan rori na, kọ reyọ ohwo ro vwo ve na rhe orherẹn na, orherẹn na ọvo mi phi unu phihọ, kirobo rẹ ogangan rẹ ohwo ro ve ive na muru kọye o ni vwo phi unu phihọ.

⁹Ọ da dia eranvwe tiọ rẹ ihwo vwo ze izobo kẹ Ọrovwohwo ọ tio oghẹre ọtiọye ejobi re ohwo vwọ kẹ Ọrovwohwo kọ fon.

¹⁰Ohwo na gbi phi emu ọfa phihọ ẹdia rọye-e, o ji se wene-e, ọ sa vwe ọ ro yovwiri wene ọbrabra-a ọ je se vwẹ omiomiovwi wene oyoyovwi-i, ọ da vwẹ eranvwe wene eranvwe, ayen ivẹ na te ọ re weneri ve o re vwo wene na kọ dia fuanfon.

¹¹Ọ da dianẹ eranvwe ro jẹfuọn tiọ re vwo ze izobo ke Ọrovwohwo na jovwo-o kọye o vwo ve, ohwo na kọ reyọ eranvwe na vwo rhe orherẹn na,

¹²Orherẹn na ko phi unu phihọ se oyovwiri eyẹ omiovwiri, obo rẹ ẹnwẹn re orherẹn tarọ kẹ eriyin ọ dia.

¹³Ẹkẹvuọvo ọ da guọnọ nẹ ọye tan hirhe, gbe jo phi ẹbẹre ọvo riyori re unu re orherẹn na tare na vwọ ba.

¹⁴Ohwo da vwẹ uwevwi rọye ru ọfuanfon kẹ Ọrovwohwo na, orherẹn na mi phi unu phihọ oyoma eyẹ o je yovwo, obo rẹ orherẹn na tarọ ke eriyin o dia.

¹⁵Ohwo rọ vwẹ uwevwi na ve na da guọnọ ne ọye rhivwi tan reyọ, ọ Me vwẹ abọvo riyori rẹ unu rẹ igho na vwọ ba unu re roro na, uwevwi na ko dia ọrọye

¹⁶Ohwo da vwẹ ẹbẹre ọvo rẹ otọ rọ vwọ riuku ve ive kẹ Ọrovwohwo na, unu re igho re ovwan phi phihọ Me dia ọtiobo rẹ ekankọn re otọ na bu te, eghẹghẹrẹ re ọka shekẹl ujuvẹ gbe ihwe rẹ idọnọ efuanfon ovwan phio phihọ.

¹⁷O da vwẹ otọ rọye na vwo ve nẹ ukpe rẹ aghọghọ na, kọ nabọ roro uchunu ro muru,

¹⁸ẹkẹvuọvo ọ da dianẹ e ru orẹ na nu o ki rhi ve, orherẹn na mi roro igho na vẹ unu rẹ ikpe ri chekọ re ki ru orẹ rẹ aghọghọ na, ke si emerha nẹ unu re ovwan bruru jovwo na.

¹⁹Ohwo rọ vwẹ otọ na ve na da rha guọnọ nẹ ọye tan hirhe, gbe jọ vwẹ ẹbẹre ọvo rẹ iyori rẹ unu rẹ igho re vere na vwọ ba unu re igho re vere na otọ na ko rhivwi dia ọrọye.

²⁰Ẹkẹvuọvo ọ rha guọnọ nẹ ọye tan otọ na reyọ-ọ, eyẹ ọ da dia obo rọ she otọ na kẹ ohwo ọfa jovwo, a rha sa tan otọ na ọfa-a;

²¹ẹkẹvuọvo otọ na siẹ re de siobọ no vwẹ orẹ re aghọghọ na, kọ dia ọfuanfon kẹ Ọrovwohwo kerẹ otọ re siobọ nẹ kẹ Ọrovwohwo tototo, Orherẹn na kọye ri vwo otọ na.

²²Ohwo da vwẹ otọ rọ dẹre rọ dia ọrobọ rọye eyẹ ọ rọ vwọ riuku-u vwo ve ive kẹ Ọrovwohwo na,

²³Orherẹn na ko roro unu ikpe rẹ orẹ rẹ aghọghọ na vwo roro unu igho rọye, ohwo na kọ hwa unu yena vwẹ ẹdẹ yena kerẹ ẹkpẹvwẹ re emu ọfuanfon vwọ kẹ Ọrovwohwo na.

²⁴Ukpe re orẹ rẹ aghọghọ na de te re, otọ na ko rhivwi bru ohwo rivẹ ra dẹrẹ mie jovwo na, rọ dia ohwo ro viedju vwo otọ na dẹn.

²⁵Unu igho kunu igho ejobi Me dia ọ rẹ ovwanvwọn ri shẹkẹl re ẹshẹ rẹ Ọrovwohwo na, gera uje eyẹ shẹkẹl ọvo.

²⁶Ẹkẹvuọvo ọwanra re eranvwe keranvwe ejobi ọ rẹ Ọrovwohwo na, a laghoma vwẹ ọyena ve-e, owene erhuẹn aye ogodẹ yọ rẹ Ọrovwohwo na.

²⁷Ọ da dia ọ re eranvwe ro jẹfuọn, kọ rhoma de kẹ wẹ vwẹ uchunu rẹ igho ro muru, ọ Me rha vwẹ ẹbẹre ọvo riyori rẹ unu igho na vwọ ba, eyẹ ọ rha tan reyọ-ọ, ka shẹ obo rẹ ovwan tare ejobi.

²⁸Ẹkẹvuọvo kemu kemu rẹ ohwo vwo ve ive kẹ Ọrovwohwo ọ ri kemu kemu ro vwori ejobi, owene ọ dia ohwo eyẹ eranvwe eyẹ otọ rọ vwọ riuku, e ja shẹ eye a tan; emu re vwo ve ive ejobi e jọ dia ọ rọ ma fon kẹ Ọrovwohwo na.

²⁹Ohwo ro vwo ve ive ejobi, ro fori rere ehwe nẹ ohri rẹ ihwo, e ja tan hirhe-e; ẹkẹvuọvo je hwe.

³⁰Emu kemu rẹ ovwan kọnre ejobi te emamọ te ibi rẹ irhe ejobi, ẹkẹn ehwe rọye yọ rẹ Ọrovwohwo ọyena arhọghọ ra je ọfuanfon vwọ kẹ Ọrovwohwo na.

³¹Arhọghọ yena ro te ohwo na, ohwo da guọnọ nẹ ọye tan ọrọye hirhe, kọ hwa abọvo riyori rẹ arhọghọ na kugbe.

³²Arhọghọ rẹ eranvwe ke rha ọna, owene ọ dia erhuẹn eyẹ ẹvwe vẹ igodẹ, eranvwe ọvuọvo vwẹ usun rẹ eranvwe ihwe re osuigegede suẹn, kọ dia ọfuanfon kẹ Ọrovwohwo na.

³³E je ohwo ọvuọvo rha nọ se oyovwiri eyẹ omiovwiri-i, eyẹ o ji wene-e; ọ da dianẹ owenire, te ọye te obo re vwiro wene na kọ dia fuanfon, a san ta-an.

³⁴Enana irhi rẹ Ọrovwohwo ji kẹ Mosis nẹ ọ vwọ kẹ ihwo rẹ Izrẹl vwẹ Ugbenu ri Sinai.