Read urhobo Livitikọs 8 Bible Online

Livitikọs 8 - urhobo bible

Livitikọs 8

¹Ọrovwohwo da ta kẹ Mosis nẹ.

²Reyọ Erọn vẹ emọ rọye kugbe, wọ je reyọ iwun na, vẹ evwri re vwo ghworo na, vwọ ba erhuẹn ọshare re vwo ze izobo rẹ umwemwu na, kugbe egbo ivẹ na, kugbe obere rẹ ikara ro jephuo na,

³rere wo se ihwo na ejobi koko rhe unurhoro rẹ utughẹ ra da vwa oma na.

⁴Kọye Mosis de ru ọtiobo rẹ Ọrovwohwo ta kẹ na, ihwo na ejobi de ghine si oma koko vwẹ unurhoro rẹ utughẹ ra da vwa oma na.

⁵Kẹ Etiyin Mosis da ta kẹ ukoko rẹ ihwo na ejobi nẹ, Ọnana emu rẹ Ọrovwohwo tare nẹ e ru.

⁶Kọye Mosis da reyọ Erọn vẹ emọ rọye rhe, ọ da vwẹ ame họ ayen.

⁷O de ku ewun rẹ agbada phihọ oma, ọ da vwẹ umuehu vwo muo, kẹsiẹye o ki ku adagba phihọ oma, o de ku ibuluku phihọ, ọ da vwẹ umuehu rẹ ibuluku na ra nabọ rhuo yoyovwi vwo muo, ọ da nabọ churo muo.

⁸Kọye o ki rhi ku adja phihọ, o de phi Utẹ vẹ Agbragha phihọ evun re adja na.

⁹Ọ da vwẹ erhu tughẹ uyovwi rọye, ọ da sa ọsete rẹ oro rọ dia erhu rẹ uvie ọfuanfon na mu obaro rẹ erhu na kirobo rẹ Ọrovwohwo ji iji kẹ Mosis.

¹⁰Kẹsiẹye Mosis ke reyọ evwri re vwo ghworo na, o ki rhi ku ori ku ọgarivi na vi kemu kemu rọ evun rọye ejobi, o ki ru ayen fon.

¹¹Ọ ke fẹrẹ emerha rẹ evwri na ku agbada na abọ ighwrẹn, o ke vwẹ evwri ghworo agbada na vẹ ekuakua re hẹ enu rọye ejobi, kugbe oze re ku ame phihọ vwẹ evun rẹ utughẹ na te obotọ rọye rere o vwo ru ayen fon.

¹²Ọ da vwẹ evwri na te uyovwi rẹ Erọn, o de Vwo ghworo, o de ruo fon.

¹³Mosis da reyọ emọ rẹ Erọn na, o de ku ewun phihọ ayen, ọ da vwẹ umuehu mu ayen, ọ da vwẹ erhu tughẹ ayen, kirobo rẹ Ọrovwohwo ji iji kẹ Mosis.

¹⁴Kẹsiẹye ọ ke reyọ erhuẹn ọshare re vwo ze izobo re umwemwu na, Erọn vẹ emọ rọye da ghwẹ abọ rayen kpahe uyovwi rẹ erhuẹn re vwo ze izobo rẹ umwemwu na.

¹⁵Kọye Mosis de hwe, ọ da reyọ ọbara na, ọ da vwẹ urhiabọ te ighoro rẹ agbada na ejobi riariẹ, o de phorho ẹgua nẹ agbada na, o de ku ọbara na ku obotọ re awọ rẹ agbada na, o de ruo fon ọ da gọ ẹgua ejobi kẹ agbada na.

¹⁶Ọ da rha reyọ ivwri ri rhurhu ivun rẹ eranvwe na ejobi, vẹ ekuakua rẹ irhue vwọ ba ibiehu ivẹ na ve ivwri re tamu ayen, Mosis da torhẹ ayen vwẹ enu rẹ agbada na.

¹⁷Ẹkẹvuọvo erhuẹn ọshare na, ophiẹn rọye vẹ uvwo rọye, te isọn rọye, ọ da torhẹ ayen vwẹ obotafe rẹ erhọn na, kirobo rẹ Ọrovwohwo na ji iji kẹ Mosis.

¹⁸Kẹsiẹye ọ ke rhe vwẹ egbo rẹ izobo rẹ ẹtorhẹ na phia, Erọn vẹ emọ rọye da ghwẹ abọ kpahe uyovwi rẹ egbo na

¹⁹Kọye Mosis ki hwe, o de ku ọbara rọye ku enu rẹ agbada na riariẹ

²⁰A ke rhe nyavwe egbo na krẹkrẹ, kẹsiẹye Mosis ke torhẹ ẹkẹn na ejobi kugbe uyovwi rọye vẹ ivwri rọye ejobi.

²¹Ọke ra vwọ vwẹ ame hworhẹ ivun rọye vẹ awọ rọye nu, Mosis da torhẹ egbo na ejobi Vwẹ enu rẹ agbada, kerẹ izobo rẹ ẹtorhẹ, ro gbo ọnrhe ororo, izobo rẹ erhanre kẹ Ọrovwohwo, kirobo rẹ Ọrovwohwo ji urhi kẹ Mosis.

²²Kẹsiẹye ọ ke rhe reyọ egbo rẹ ivẹ na rhe egbo ra cha vwọ vwẹ irherẹn mu na; Etiyin Erọn vẹ emọ rọye da ghwa abo rayen kpahe uyovwi rẹ egbo na.

²³Mosis de hwe, ọ da reyọ emerha rẹ ọbara rọye o de vwo te eroro rẹ orhọn rẹ obọrhe re Erọn kugbe urhiabọ rode ro obọrhe rọye vẹ urhiawọ rode ro owọrhe rọye.

²⁴A ke vwẹ emọ rẹ Erọn vwọ phia, kọye Mosis da vwẹ emerha rẹ ọbara na vwo te ẹroro rẹ erhọn rẹ obọrhe rayen kugbe urhiabọ rode rẹ obọrhe rayen ve urhiawọ rode rẹ owọrhe rayen, Mosis ki ku ọbara na ku agbada na riariẹ

²⁵Kẹsiẹye ọ ke reyọ ivwri rẹ eranvwe na vẹ urhurhuvwu rọye, vwọ ba ivwri ri rhurhu ivun rọye, kugbe ekuakua rẹ irhue, kugbe ibiehu ivẹ na vẹ ivwri rẹ ayen, kugbe ekpoghowọ rẹ obọrhe rọye,

²⁶o si ikara ro jephuo ọvo nẹ evun rẹ obere rẹ ikara ro jephuo ro obaro rẹ Ọrovwohwo na rhe, kugbe ikara phepheghe kugbe ikara vẹ evwri vẹ ikara ro phepheghe ọvo, ọ da vwẹ ayen kpahe enu rẹ ivwri na vẹ ekpoghowọ rẹ obọrhe na,

²⁷O de mu enana ejobi phihọ abọ rẹ Erọn vẹ abọ rẹ emọ rọye, O de dju ayen vwọ kpẹvwẹ akpẹvwẹ rẹ edjuo vwẹ obaro rẹ Ọrovwohwo

²⁸Kẹsiẹye Mosis ke rhoma reyọ ayen nẹ abọ rayen, ọ da torhẹ ayen vwẹ enu rẹ agbada na vwọ ba izobo rẹ ẹtorhẹ na, rọ dia izobo rẹ evwomuo rẹ irherẹn na, ẹkpẹvwẹ rẹ erhanre ro gbo ọnrhen ororo kẹ Ọrovwohwo.

²⁹Mosis ke rha reyọ ivie na, o ki dju ayen vwo ze izobo rẹ edjuo kẹ Ọrovwohwo, ọyena kọye ẹkẹn ro te Mosis vwẹ oma rẹ egbo re vwo ze izobo rẹ evwomuo rẹ irherẹn na, kirobo rẹ Ọrovwohwo ji iji kẹ Mosis

³⁰Kẹsiẹye Mosis ke rha reyọ evwri re vwo ghworo na kugbe ọbara rọ hẹ enu rẹ agbada na ọ ke fẹnrẹ ku Erọn vẹ iwun rọye, ọ ke rha fẹnrẹ ku emọ rọye vẹ iwun rayen, kọye o vwo ru Erọn vẹ iwun rọye fon, eriyin je vwẹ emọ rọye vẹ iwun rayen.

³¹Mosis da ta kẹ Erọn vẹ emọ rọye nẹ, Ovwan chere eranvwe na vwẹ unurhoro rẹ utughẹ ra da vwa oma na, rere ovwan dia Etiyin riọ kugbe ikara rọ hẹ evun rẹ obere rẹ izobo rẹ evwomuo na, kirobo re Me tare jovwo na, nẹ, Erọn vẹ emọ rọye re riọ;

³²Obo rẹ ovwan rẹ chekọ vwẹ eranvwe na vẹ ikara na wa Me torhẹ ayen.

³³Ovwan wan nẹ asan ẹchẹ rẹ utughẹ ra da vwa na rua otafe-e bẹsiẹ rẹ ẹdẹ ighwrẹn vwo te-e, bẹsiẹ rẹ ẹdẹ rẹ evwomuo rẹ ovwan vwọ gba, kidie ẹdẹ ighwrẹn ọye evwomuo rẹ ovwan na reyọ.

³⁴Ọtiobo re ruro nonẹ na ọtiọye Ọrovwohwo tare nẹ e ruo kẹ ovwan rere e vwo phorho ẹgua rẹ ovwan nu kẹ ovwan.

³⁵Asan unuẹchẹ rẹ utughẹ ra da vwa oma na Etiyin ovwan dia te ason te uvo ẹdẹ ighwrẹn, yẹ ovwan ruẹ obo rẹ Ọrovwohwo tare nẹ e ru, ovwan de rhe ghwu kidie ọtiọye e ji vwe.

³⁶Kọye Erọn vẹ emọ rọye de ghine ru emu na ejobi kirobo rẹ Ọrovwohwo ji urhi rọye kẹ Mosis.