Read urhobo Livitikọs 9 Bible Online

Livitikọs 9 - urhobo bible

Livitikọs 9

¹Vwẹ ẹdẹ rẹrenren vwo te Mosis de se Erọn vẹ emọ rọye kugbe ekpako rẹ Izrẹl ejobi koko,

²Ọ da ta kẹ Erọn nẹ, Reyọ ọmọ rẹ erhuẹn rẹ ọshare vwo ze izobo rẹ umwemwu, wọ reyọ egbo vwo ze izobo rẹ ẹtorhẹ, ayen ivẹ na vwo eka-an, rere wọ vwẹ ayen ze vwẹ obaro rẹ Ọrovwohwo na.

³Wọ Me ta kẹ ihwo rẹ Izrẹl, Reyọ okri vwo ze izobo rẹ umwemwu, rere wọ reyọ ọmọ rẹ erhuẹn kugbe omogodẹ rẹ ẹgbukpe ọvo ro jẹ ekan evwo, vwo ze izobo rẹ ẹtorhẹ,

⁴kugbe erhuẹn ọshare ọvo kugbe egbo vwo ze izobo rẹ ufuoma, vwẹ obaro rẹ Ọrovwohwo, kugbe izobo rẹ ọka ra vwẹ evwri gua kugbe, kidie nonẹ na Ọrovwohwo cha vwẹ oma phia kẹ wẹ.

⁵Ayen da vwẹ emu na vwọ rhe obaro rẹ utughẹ ra da vwa oma na kirobo ri Mosis tare na, ihwo na ejobi de rhi koko vwẹ obaro rẹ Ọrovwohwo.

⁶Kọye Mosis da ta nẹ, Ọnana emu rẹ Ọrovwohwo tare nẹ we ru; urinrin rẹ Ọrovwohwo kọ cha phia kẹ ovwan.

⁷Kẹsiẹye Mosis ke rha ta kẹ Erọn nẹ, Gbe si kẹrẹ agbada na, rere wo ze izobo rẹ umwemwu wẹn vẹ izobo rẹ ẹtorhẹ rere wọ gọ ẹgua nẹ oma wẹ vẹ ihwo na ejobi, re wọ vwẹ ẹkpẹvwẹ rẹ otu ejobi na rhe, rere wọ gọ ẹgua nẹ ayen oma, kirobo rẹ Ọrovwohwo na ji iji rọye na.

⁸Kọye Erọn de ghine bi kerẹ agbada na, o de hwe ọmọ rẹ erhuẹn rẹ izobo rẹ umwemwu na, vwo ze kẹ oma rọye.

⁹Emọ rẹ Erọn ki mu ọbara rọye vwọ kẹ, O de duvwu urhiabọ rọye phihọ ọbara na vwo te ighoro rẹ agbada na, kẹsiẹye o ki ku ọbara na ku otọ rẹ awọ rẹ agbada na;

¹⁰ẹkẹvuọvo ivwri rọye kugbe ibiehu rọye vwọ ba ekuakua rẹ irhue rẹ eranvwe re vwo ze izobo rẹ umwemwu na ọ da torhẹ ayen vwẹ enu rẹ agbada na, kirobo rẹ Ọrovwohwo na ji iji kẹ Mosis.

¹¹Uvwo rẹ eranvwe na kugbe ophiẹn rọye ọ da torhẹ ayen vwẹ obo otafe rẹ erhọn na.

¹²O ki hwe eranvwe rẹ izobo rẹ ẹtorhẹ na; emọ rẹ Erọn de mu ọbara rọye kẹ, o de kuo ku agbada na riariẹ.

¹³Ayen da vwẹ izobo rẹ ẹtorhẹ vwọ kẹ ibribro, te uyovwi rọye, ọ ke torhẹ ayen vwẹ enu rẹ agbada na.

¹⁴Ọ da hworhẹ ivun rọye vẹ awọ rọye, ọ da torhẹ ayen kugbe izobo rẹ ẹtorhẹ na vwọ enu rẹ agbada na.

¹⁵Kẹsiẹye ọ ke rhe vwọ ẹkpẹvwẹ rẹ otu ejobi vwọ nẹ, ọ ke reyọ ẹvwe rẹ izobo rẹ umwemwu rẹ ihwo ejobi na, o de hwe, o ki vwo ze izobo fiki rẹ umwemwu kerẹ izobo rẹ umwemwu rẹ ẹsosuọ na.

¹⁶Ọ ke vwẹ izobo rẹ ẹtorhẹ na vwọ nẹ, o ki ze kirobo rẹ urhi na epha.

¹⁷Ọ ke vwẹ izobo rẹ ọka na vwọ nẹ, ọ da ghwẹ obọ vọn no rhe, ọ da torhẹ vwẹ enu rẹ agbada na vwẹ orhoma rọ izobo rẹ ẹtorhẹ vwẹ irhiọke na.

¹⁸Kẹsiẹye o ki hwe erhuẹn rẹ ọshare na vẹ egbo na re vwo ze izobo rẹ ufuoma rẹ ihwo ejobi na; emọ rẹ Erọn de mu ọbara na kẹ, kọye o ku phihọ agbada na riariẹ,

¹⁹te ivwri rẹ erhuẹn na vẹ e rẹ egbo na, te urhurhuvwu rọye, vẹ ivwri ri rhurhu ivun rọye kugbe ibiehu rọye vẹ ekuakua rẹ irhue,

²⁰ayen da ghwẹ ivwri na phihọ enu rẹ ivie rẹ eranvwe na, ọ da torhẹ ivwri na vwẹ enu rẹ agbada na,

²¹ẹkẹvuọvo ivie rẹ eranvwe na kugbe ekpoghowọ rẹ obọrhe rọye, Erọn de dju ayen vwo ze izobo rẹ edjuo vwẹ obaro rẹ Ọrovwohwo kirobo ri Mosis tare.

²²Kẹsiẹye Erọn ke kpare abọ rọye kpenu vwẹ obaro rẹ ihwo na ejobi ọ da nẹ ẹrhovwo kẹ ayen, ọ ke rhe otọ rhe asan re de ze izobo rẹ umwemwu vẹ ọ re ufuoma vẹ ọ ra torhẹre na.

²³Mosis vẹ Erọn da ro evun rẹ utughẹ ra da vwa oma na, rẹ ayen vwo nẹ evun rọye rhe ayen da nẹ ẹrhovwo kẹ ihwo na, Etiyin urinrin rẹ Ọrovwohwo da phia kẹ ihwo na ejobi.

²⁴Kọye erhanre da la phia e da torhẹ izobo rẹ ẹtorhẹ na kugbe ivwri re hẹ enu rẹ agbada na, rẹ ihwo na ejobi vwọ mrẹ Ọnana re ayen de kperi gangan ayen de she bọvwọ opharo rhuotọ.