Read urhobo Jerimaya 11 Bible Online

Jerimaya 11 - urhobo bible

Jerimaya 11

¹Ota ro nẹ obọ rẹ Ọrovwohwo bru Jerimaya rhe:

²Nyo eta rẹ ọphọ nana, rere wọ ta kẹ ihwo ri Juda kugbe otu re dia Jerusalẹm.

³Ku wo ta kẹ ayen nẹ, Enẹ Ọrovwohwo na tare, Ọghẹnẹ rẹ Izrẹl. Ekan kẹ ohwo kohwo rọ kerhọn rẹ eta rẹ ọphọ nana-a,

⁴ri mi ji iji kẹ esẹ rẹ ovwan re me vwọ reyọ ayen nẹ otọ rẹ Ijipt cha, nẹ erhanre rẹ utehru, ta nẹ, Kerhọn rẹ urhuru mẹ, re we ru obọ me ta kẹ ovwan, kẹ ovwan dia ihwo mẹ, ke me je dia Ọghẹnẹ rẹ ovwan,

⁵re me vwọ hwa ive mi veri kẹ esẹ rẹ ovwan nẹ me vwẹ otọ rọ djẹ ọkẹre rẹ ame rẹ ivie vẹ ọnyọn kẹ ayen, ọtiobo rọ epha nonẹ na. Me da kpahẹ nẹ, Eriyin ọdia, Ọrovwohwo.

⁶Ọrovwohwo da ta kẹ vwẹ nẹ, ghwoghwo eta nana ejobi na phia vwẹ irere ri Juda kugbe irhuvwu ri Jerusalẹm: Nyo eta rẹ ọphọ nana re we ru ayen.

⁷Kidie me da nabọ kpokpa kẹ esẹ rẹ ovwan re me vwọ reyọ ayen nẹ otọ rẹ Ijipt cha, kọke kọke rhi te nonẹ na, tanẹ, Nyo urhuru mẹ.

⁸Dede na ayen nyori-i eyẹ ayen je kerhọ-ọn; ẹkẹvuọvo dohwo dudu ọgangan rẹ umwemwu rọye je yan phihọ. Ọtiọye re me da ghwa eta rẹ ọphọ nana kpahe ayen, ri mi jiji kẹ ayen nẹ ayen ru, ẹkẹvuọvo ayen ruro-o.

⁹Ọrovwohwo ke rhoma ta kẹ vwẹ, nẹ ozighi herọ vwẹ uherevie rẹ ihwo ri Juda vẹ otu re dia Jerusalẹm.

¹⁰Ayen rhivwi kpo umiovwo rẹ esẹ rayen ride, ihwo re rhọvwe nyo eta mẹ-ẹ ayen yan nene edjọ efa vwo ga ayen, uwevwi rẹ Izrẹl vẹ uwevwi ri Juda miovwo ọphọ ri mi nene esẹ rayen re na.

¹¹Vwẹ ọtiọye na, enẹ Ọrovwohwo tare, Nighe, me cha vwẹ umiovwo rhe ayen rẹ ayen je se no, owenẹ ayen viẹ se vwe dede, me cha kerhọn raye-en.

¹²Kẹsiẹye irere ri Juda vẹ ihwo re dia Jerusalẹm ejobi ke yanran re kperi se edjọ rẹ ayen torhẹ insẹns kẹ na, yẹ ayen se sivwi ayen vwẹ ọke rẹ ukpokpogho raye-en.

¹³Kidie obo rẹ irere rẹ ovwan bute eriyin edjọ rẹ ovwan ji bute, E Juda, kirobo rẹ irhuvwu wẹn bute etiọye egbada re vwo vi kẹ omaẹvuọ rẹ ovwan ji bute vwi Jerusalẹm, egbada ra da torhẹ insẹns kẹ Baal.

¹⁴Vwẹ ọtiọye na wọ rẹ kẹ ihwo nana-a, wọ kpare urhuru rẹ oviẹ eyẹ ẹrhovwo fiki rẹ aye-en, kidie ọke rẹ ayen de se vwe vwẹ ọke rẹ ukpokpogho rayen mi gbi nyo-o.

¹⁵Didi ogangan avwebọ mẹ vwori vwẹ uwevwi mẹ, ro vwo ru ogbegbiru nu na? Kẹ ive vẹ izobo rẹ eranvwe sa rhẹriẹ ẹghwọrọ wẹ na? Wo se phuoma?

¹⁶Ọrovwohwo se we dẹvure, Urhe rẹ oliv djidjidji, yoyovwi vẹ omamọ rẹ ibi, ẹkẹvuọvo ọ cha vwẹ edo rẹ ogiribo rode na vwo phi erhanre phihọ eghọn rọye ke torhẹ.

¹⁷Ọrovwohwo rẹ otuofovwi na, rọ kọn we na, ghwoghwo umiovwo kpahe owẹ, fiki rẹ umwemwu rẹ uwevwi rẹ Izrẹl vẹ uwevwi ri Juda ruru, vwọ nẹrhẹ ovwẹ phihọ ophu rẹ ayen vwo torhẹ incẹns kẹ Baal.

¹⁸Ọrovwohwo vwe rọ phia kẹ vwẹ me da riẹn etiyin wo ki dje uruemu umwemwu rayen kẹ vwẹ.

¹⁹Ẹkẹvuọvo ke me epha dẹndẹn kerẹ ọmọ rẹ ogegede re suẹn kpo ehwe. Me rha riẹn ta nẹ mẹvwẹ ayen jẹ iroro kpaha-a, tanẹ e ja ghwọrọ urhe na vẹ ibi rọye, rere ma nyavwọ nẹ otọ rẹ ihwo ekpokpọ, rere e jẹn odẹ rọye ekarophihọ.

²⁰Ẹkẹvuọvo, E Ọrovwohwo rẹ otuofovwi, ro brorhiẹ rẹ esiri, rọ davwẹ udu vẹ iroro nẹ, jẹn uvwe mrẹ ihri wẹn vwẹ enu rayen, kidie wọwẹ mi gu ẹdjọ mẹ kẹ.

²¹Ọtiọye na enẹ Ọrovwohwo tare, kpahe ihwo rẹ Anatọt, re guọnọ arhọ wẹn na, re ta, Wọ vwẹ odẹ rẹ Ọrovwohwo mraro-o, avwanre da vwẹ obọ rẹ avwanre hwe we —

²²ọtiọye na enẹ Ọrovwohwo rẹ otuofovwi na tare, Mi che hwe ayen; imighene na che ghwu ughwu rẹ ọlọkọ; owẹvwe che hwe emeshare vẹ emete rayen ghwu;

²³ọvuọvo rayen rhe chekọ-ọ. Kidie me cha vwẹ umiovwo rhurhu ihwo rẹ Anatọt, vwẹ ukpe rẹ ehwe rayen.