Read urhobo Jerimaya 13 Bible Online

Jerimaya 13 - urhobo bible

Jerimaya 13

¹Enẹ Ọrovwohwo ta kẹ vwẹ, Yanra ra dẹ otehun rẹ ukpoyibo vwo rhuo ehun wẹn, wo dje phihọ ame-e.

²Me da ra dẹ otehun na kirobo rẹ Ọrovwohwo na tare, vwo rhuo ehun mẹ.

³Ota rẹ Ọrovwohwo ki bru uvwe rhe vwẹ obọ rivẹ,

⁴Reyọ otehun wọ dẹre na, rọ hẹ ehun wẹn na, wo vrẹn, yanra kpo Yufretis, wo sionu vwẹ eghogho rẹ oragha na.

⁵Eriyin mi de ghine yanran re sio nu vwi Yufretis, kirobo rẹ Ọrovwohwo jiji kẹ vwẹ.

⁶Ẹdẹ buebu vwọ wan nu, Ọrovwohwo da ta kẹ vwẹ nẹ, Vrẹn yanran kpo Yufretis, re wọ reyọ otehun me ta kẹ wẹ nẹ wo si nu vwẹ etiyin na.

⁷Etiyin me da yanran kpo Yufretis, ra tọn, me ke reyọ otehum na nẹ asan mi de sionu rhe. Ki nighe, otehun na miovwiri; o gbi fi emuọvo-o.

⁸Ota rẹ Ọrovwohwo de bru uvwe rhe:

⁹Enẹ Ọrovwohwo tare: Ọtiọye me tobọ miovwi eheri ri Juda kugbe okpeheri ri Jerusalẹm.

¹⁰Ihwo umwemwu nana, re senre nẹ ayen nyo eta mẹ-ẹ na, re vwẹ udu ọgangan nene udu rẹ obọ rayen vwọ yan nene edjọ efa vwọ gan ayen je vwẹ uyovwi te otọ kẹ ayen na, ayen cha dia kerẹ otehun nana, ro fi emuọvo-o na.

¹¹Kidie obo rẹ otehun ta muẹ ehun rẹ ohwo ye, ọtiọye mi ru uwevwi rẹ Izrẹl ejobi kugbe uwevwi ri Juda ejobi ne tamu uvwe, eriyin Ọrovwohwo tare, rere ayen vwọ dia ihwo mẹ vwẹ odẹ, ejiro, kugbe urinrin, ẹkẹvuọvo ayen kerhọ-ọn.

¹²Ku wọ ta ota nana kẹ ayen, Enẹ Ọrovwohwo Ọghẹnẹ rẹ Izrẹl tare, e chẹ ku wain vọn ochẹ kochẹ. Ayen ke ta kẹ, Avwanre gbe riẹn nẹ e che ku wain vọn ochẹ kochẹ?

¹³Ku wọ ta kẹ ayen, Enẹ Ọrovwohwo tare: Nighe, idi che muẹ ihwo rẹ otọ na ejobi, ivie ri tidia vwẹ ekete ri Devid, irherẹn, emraro, vẹ ihwo ri Jerusalẹm ejobi.

¹⁴Ki mi che geri ayen ohwohwo teye ohwo, esemọ vẹ emọ kugbe, eriyin Ọrovwohwo tare, mi che nẹ aruẹdọ-ọ eye me re ehrọre-e, ri mi di ji ayen eghwọrọ-ọ,

¹⁵Nyo wọ kerhọn, wo herẹ-ẹ, Kidie Ọrovwohwo ta nure.

¹⁶Vwẹ urinrin kẹ Ọrovwohwo Ọghẹnẹ wẹn tavwe rọ ke vwẹ ebri rhe, tavwe rẹ awọ wẹn ke yẹghrẹn vwẹ igbenu rẹ urhukpẹ rẹ ovwọvwọn. Ri we ji vwo rhẹro rẹ uvo ọ me rhẹriẹ phihọ ebri o mi hirhe phihọ ebri rode.

¹⁷Ẹkẹvuọvo wa gbe kerhọ-ọn, ẹnwẹn mẹ kọ bẹbẹ viẹ fiki rẹ eheri wẹn, ibiẹro mẹ ke gangan ame oviẹ mẹ ko hwẹ rhe patapata fikiridie emu igegede rẹ Ọrovwohwo imu.

¹⁸Ta kẹ ovie vẹ oni rọye; Reyọ agbara ro kpotọ, kidie erhu rẹ uvie oyoyivwi wẹn na nẹ uyovwi wẹn nure.

¹⁹Irere ri Nẹgẹb na, a karẹ ẹchẹ gbe ayen o gbi vwo ohwo ro rhiẹ aye-en; E mu Juda ejobi kpo ighuvwu, ayen ejobi tototo kpo ighuvwu.

²⁰Kpare aro wọ mrẹ ihwo ri nẹ obohwẹre ọnre rhe, Igegede ra kẹ wẹ na kẹ erhọ? omamọ rẹ igegede wẹn na?

²¹Kidie wo ta, siẹ ra da vwẹ ayen mu vwẹ enu wẹn ihwo ru wo rori nẹ igbeyan wẹn? wọ gbe rhovwo ako fia kerẹ aye rọ chuẹ uvwiẹ?

²²Ọ da dianẹ wọ ta vwẹ udu wẹn, Die sorọ rẹ enana vwo bru uwẹ rhe? fiki rẹ ọrho rẹ umwemwu wẹn a vwọ kparẹ eshamwa wẹn wọ da re oja fiki rẹ omaẹdja wẹn.

²³Kẹ ohwo rẹ Itiopia se wene ọphioma rọye gbenẹ edjanakpo se wene ipe rọye? Ọ da dia ọtiọye yi wo ji se ru emu esiri, wẹ rẹ umwemwu riẹriẹ oma nure na.

²⁴Me cha hra wẹ kere iphopho rẹ odju rẹ aton muẹ.

²⁵Ọnana kọye ẹkẹn wẹn ẹkẹn re me vwavwe kẹ wẹ, eriyin Ọrovwohwo tare, kidie me chọrọ owẹ ẹro, wọ da vwẹ ẹro so efian.

²⁶Mẹvwẹ ọvo cha kpare eshamwa wẹn rhurhu opharo wẹn, ka mrẹ omẹvuọ wẹn.

²⁷Me mrẹ egua egbe wẹn nure, igberadja vẹ efian wẹn, ọfarhiẹ vẹ obẹnẹ kugbe igberadja ọbrabra wẹn, Vwẹ enu rẹ igbenu vwẹ aghwa. Ekan kẹ wẹ, E Jerusalẹm! Mavọ okrite ra ke họ wẹ fon?