Read urhobo Jerimaya 14 Bible Online

Jerimaya 14 - urhobo bible

Jerimaya 14

¹Ota rẹ Ọrovwohwo ro bru Jerimaya rhe kpahe okpuvo rode na.

²Juda muomahọ Anurhoro rọye re brenu, ihwo rọye ra viẹ vwẹ otọ na, oviẹ ri Jerusalẹm mu kpenu

³Ikpihwo rọye ji idibo rayen kpo amevo, ayen rhi te ẹtẹrhe na, ayen mrẹ ame-e, ayen da ghwa echẹ ifefe rhivwi rhe; oma vo ayen hwe ayen ki kiẹn ayen rhurhu uyovwi rayen.

⁴Fiki rẹ otọ rẹ ofu djeri na Rẹ osio rha rhọ phihọ otọ na-a na, oma da vọ eghwẹrẹ na, ayen de rhurhu iyovwi rayen.

⁵Orherẹ rọ hẹ evun rẹ aghwa mrẹ emọboba rọye djẹ kidie odi herọ-ọ.

⁶Ekẹtẹkẹtẹ rẹ aghwa mudia vwẹ uphephẹ, ẹnwẹn herọ rhọ kerẹ ẹrha; ẹro rhe aye-en kidie ẹbe herọ-ọ

⁷Owenẹ imwemwu re avwanre se oseri hwe avwanre dede, ru emu ọvo fiki rẹ odẹ wẹn E Ọrovwohwo; kidie esiohuko rẹ avwanre buru gangan, avwanre ru umwemwu kpahe owẹ.

⁸E wẹ iphiẹrohọ rẹ Izrẹl, wẹ osivwi rọye vwẹ ọke rẹ ukpokpogho, die nẹrhẹ wọ họhọ ọrhorha vwẹ otọ na, vwọ họhọ ọyoyan rọ vwẹriẹre nẹ ọye vwerhẹ asọn ọvo?

⁹Die nẹrhẹ wọ họhọ ohwo gedegede kẹrẹ ogba ro se sivwẹ-ẹ? ye wẹ, E Ọrovwohwo, wọ hẹ ohri rẹ avwanre, a vwẹ odẹ wẹn se avwanre, wo jẹ avwanre vwo-o.

¹⁰E nẹ Ọrovwohwo ta kpahe ihwo nana: Ayen guọnọ suosuo ọtiọna, ayen sa da awọ rayen ji-i, ọtiọye na Ọrovwohwo gbe reyọ aye-en asakiephana kọ karohọ imwemwu rayen kọ vwẹ oja re ayen fikirẹ imwemwu rayen.

¹¹Ọrovwohwo da ta kẹvwẹ nẹ, Wọ rẹ kẹ erhuvwu rẹ ihwo nana-a.

¹²Owenẹ ayen chirẹ owẹvwe, mi che nyo oviẹ raye-en, owenẹ ayen ji ze izobo rẹ ẹtorhẹ vẹ izobo rẹ eka dede, me rhọvwe reyọ aye-en, ẹkẹvuọvo me vwẹ ọlọkọ vẹ owẹvwe vẹ emiavwe guọghọ ayen.

¹³Me da ta E, Ọrovwohwo Ọghẹnẹ, nighe, emraro na ta kẹ ayen, Wa cha mrẹ ọlọkọ-ọ, wa cha mrẹ owẹvwe-e, ẹkẹvuọvo me cha kẹ ovwan ufuoma ro muẹro vwẹ etinẹ.

¹⁴Ọrovwohwo da ta kẹ vwẹ, Emraro na vwẹ odẹ me mraro rẹ ofian, mi ji ayẹ-ẹn mi ji iji kẹ aye-en eyẹ ta kẹ aye-en, aroẹmrẹ rẹ ofian ayen mrẹ kẹ ovwan na, epha ri fiemu-u, vẹ ọphiọvwẹ rọ hẹ udu rayen.

¹⁵Ọtiọye na enẹ Ọrovwohwo tare kpahe emraro ri mi jiri-i ye vwẹ odẹ mẹ mraro na, ere ta nẹ, ọlọkọ vẹ owẹvwe sa rhe otọ nana-a! ọlọkọ vẹ owẹvwe cha ghwọrọ emraro yena.

¹⁶Ihwo rẹ ayen mraro kẹ na a cha djẹ ayen nẹ irhuvwu ri Jerusalẹm re dia ihwo rẹ owẹvwe vẹ ọlọkọ che hwe, ohwo ro shi ayen gbe dia-a, eya rayen, emeshare rayen, kugbe emetẹ rayen. Kidie mi che kuẹ umwemwu rayen phihọ enu rayen.

¹⁷Ku wọ ta ota nana kẹ ayen, Jẹn ẹro mẹ djẹ ame ason vẹ uvo, wo jẹ ayen ka-a, kidie e bru ora rode na phihọ ọmọtobẹ rẹ ihwo mẹ, a teye rọ miomiovwi.

¹⁸Mi de kpo evun rẹ aghwa nighe, irivwi rẹ ihwo re hweri hẹ oboyi. Ọ da dianẹ me ro evun rẹ orere na nighe, emiavwe rẹ owẹvwe! Kidie te ọmraro vẹ orherẹn nenesi rẹ eki rayen wan otọ na duvwu, ayen gbi vwo iroro-o.

¹⁹Wọ ghwa siẹn Juda tototo? Ki Zayọn ghwe tu erhi wẹn oma? Die wọ vwọ ghwiẹ avwanre, rẹ esivwo gbe herọ kẹ avwanre-e? Avwanre phiẹro phihọ ufuoma, ye erhuvwu cha-a; vwẹ ọke rẹ esivwo, gbe nighe kẹ uguegue.

²⁰Ma rhọvwe umwemwu rẹ avwanre, E Ọrovwohwo, vẹ orukuruku rẹ esẹ rẹ avwanrẹ, kidie me ru umwemwu kpahe owẹ.

²¹Fiki rẹ odẹ wẹn na, wo hwe avwanre-e, wọ rhaphiẹ ekete rẹ urinrin wẹn na-a; karohọ wo miovwo ọphọ wo nene avwanre re na-a.

²²O vwo ẹdjọ ọvo vwẹ usun rẹ edjọ rẹ efian na rọ sa rhọ osio phihọ otọ na? eyẹ kẹ odjuvwu na sa rhọ eghwẹghwẹ? O dia wọwẹ E Ọrovwohwo Ọghẹnẹ rẹ avwanrẹ na-a? Ma vwẹ ẹro so owẹ, kidie wẹ ri ru imu nana ejobi.