Read urhobo Jerimaya 16 Bible Online

Jerimaya 16 - urhobo bible

Jerimaya 16

¹Ota rẹ Ọrovwohwo de bru vwe rhe:

²Wọ cha reyọ aye-e, wo ji vwiẹ emeshare vẹ emetẹ vwẹ etinẹ na-a.

³Kidie enẹ Ọrovwohwo ta kpahe emeshare vẹ emete re che vwiẹ vwẹ etinẹ na, kpahe iniemọ ri vwiẹ ayen te esemọ ri vwiẹ ayen vwẹ oto nana.

⁴Emiavwe ọbrabra che hwe ayen. A cha viẹ aye-en, e ji che shi aye-en; ayen cha họhọ isọn vwẹ enu rẹ otọ na. Ọlọkọ vẹ owẹvwe che hwe ayen, irivwi rayen ke dia emuọre kẹ emephran rẹ enu kugbe eranvwe rẹ akpọ na.

⁵Kidie enẹ Ọrovwohwo tare: Wọ ruẹ uwevwi rẹ uvweri-i, eyẹ wọ yanran ra viẹ-ẹ, wo muomahọ kẹ aye-en, kidie mi si ufuoma mẹ nẹ obọ rẹ ihwo nana rẹ, eriyin Ọrovwohwo tare, te ẹguọnọ ro jẹrhẹrie vẹ arodọvwẹ mẹ mi mie ayen.

⁶Ihwo ride vẹ ihwo itete che ghwẹ vwẹ otọ nana, e che shi aye-en, ọ rọ viẹ ayen gbe dia-a eyẹ kẹ ọ ro bru ẹto eyẹ ọ rọ wanrẹ uyovwi kẹ aye-en.

⁷Ohwo che bru ikara kẹ ọ rọ vweri uvweri-i, ro vwo bruche fiki rẹ ohwo rọye ro ghwuru na-a; ohwo je vwẹ uko rẹ uchebro kẹ vwi fiki rẹ ọsẹ eyẹ oni rọye-e.

⁸Wo che kpo uwevwi rẹ orẹ rere wọ vẹ ayen vwọ tidia re je da-a.

⁹Kidie enẹ Ọrovwohwo rẹ otuofovwi na tare, Ọghẹnẹ rẹ Izrẹl na, Nighe, mi che ru rere urhuru rẹ omavwerhovwẹ vẹ urhuru rẹ aghọghọ, urhuru rẹ ọshare rẹ ọpha kugbe urhuru rẹ ọpha de ghwru nẹ etine na, vwẹ aro rẹ ovwan na ejobi.

¹⁰Ọke wọ da ta eta na ejobi kẹ ihwo nana re, rẹ ayen da ta kẹ wẹ, Die nẹrhẹ Ọrovwohwo ghwoghwo umiovwo rode nana kpahe avwanre vwo? Die ọye orukuruku rẹ avwanre? Didi umwemwu me ru kpahe Ọrovwohwo rẹ Ọghẹnẹ rẹ avwanre vwo?

¹¹Etiyin wọ ke vuẹ ayen nẹ: Fikiridie esẹ rẹ ovwan sen vwẹ, eriyin Ọrovwohwo tare, ayen de nene edjọ efa ayen da ga ayen, ayen da vwẹ uyovwi kpotọ kẹ ayen, ayen da sen vwẹ, ayen gbe yọnrọn urhi mẹ-ẹ,

¹²fikiridie we ru miovwi vrẹn esẹ rẹ ovwan, gbe nighe, ovwan dohwo dudu ọgangan rọye je yan nene, wa rhọvwe kerhọn mẹ-ẹ;

¹³ọtiọye na mi che phi ovwan nẹ otọ nana kpo otọ rẹ esẹ rẹ ovwan rẹ ovwan riẹnre-e, kẹ etiyin wa da ga edjọ efa re te ason te uvo, kidie mi che ni ovwan ẹro-o.

¹⁴Ọtiọye na, nighe, ẹdẹ cha, eriyin Ọrovwohwo tare, a gbe ta ọfa-a nẹ, Obo rẹ Ọrovwohwo herọ rọ si ihwo rẹ Izrẹl nẹ otọ rẹ Ijipt rhe na,

¹⁵nẹ Obo rẹ Ọrovwohwo herọ rọ si ihwo rẹ Izrẹl nẹ ọrho rẹ obọhwẹre ọnre vẹ irho na ejobi vwẹ asan rọ dje ayen ra na. Kidie me cha vwẹ ayen rhivwi cha otọ re me vwọ kẹ esẹ rayen na.

¹⁶Nighe, mi ji ikọn re se ihwiyeri buebu, eriyin Ọrovwohwo tare, ihwiyeri na ki che mu ayen, ukuko rọye ki mi ji re se irhuẹ rhe, kẹ ayen cha bẹrẹ ibefi nẹ ugbenu ọvo re te ugbenu rivẹ, ji te ẹgbogho rẹ eragha na.

¹⁷Kidie ibiẹro mẹ mrẹ idjerhe rayen ejobi, e djahe kẹ vwẹ-ẹ, umwemwu rayen je djahe kẹ ibiẹro mẹ-ẹ.

¹⁸Me hwa osa rẹ orukuruku vẹ imwemwu rayen kpahe kẹ ayen, fikiridie ayen vwẹ irivwi rẹ edjọ rayen ri mioma na vwo imovwi otọ mẹ, ayen vwẹ ẹgua-egbe rayen vọn ukuẹriọ mẹ.

¹⁹E Ọrovwohwo, ogagan mẹ vẹ odjahọ mẹ, adjẹrhọ mẹ vwẹ ẹdẹ rẹ ukpokpogho, wọwẹ ẹgborho na ejobi che bre cha nẹ oba re akpo rhe tanẹ: Esẹ rẹ avwanre reuku rẹ emu ọvuọvo-o jokpa rẹ efian ọvo, erharhe rẹ emu ri fi erere-e?

²⁰Ohwo se ru edjọ kẹ oma rọye? E re dia edjọ-ọ!

²¹Ọtiọye na, gbe nighe, mi che jẹ ayen riẹn, obọ ọvo nana mi che dje ọrho vẹ ẹgha mẹ kẹ ayen, ayen ke riẹn nẹ odẹ mẹ hẹ Ọrovwohwo.