Read urhobo Jerimaya 17 Bible Online

Jerimaya 17 - urhobo bible

Jerimaya 17

¹Umwemwu ri Juda ubiurhe rẹ utehru e vwo sio, unegbe ri diamọnd a vwo tuọn phihọ imẹjẹ rẹ udu rayen, kugbe ighoro rọ hẹ enu rẹ ẹshẹ rayen.

²Jẹ emọ rayen karohọ ẹshẹ rayen vẹ ighriki rayen, rẹ ayen ru phihọ orhoma rẹ urhe djidjidji ejobi, kugbe igbenu ri kpenu ejobi.

³Vwẹ enu rẹ igbenu ride vwẹ asan ophephẹ na, efe vẹ ekuakua rẹ ovwan me cha hra ayen wan ubrakpọ na ejobi fiki rẹ umwemwu rayen.

⁴Wa cha rhan obọ rẹ ovwan nẹ ukuẹriọ re me vwọ kẹ ovwan, ki mi che ru ovwan vwọ ga ivwighrẹ rẹ ovwan vwẹ otọ re wa riẹnre-e, kidie vwẹ evun rẹ ophu mẹ ki mi koko erhanre ro cha la bẹdẹ phiyọ.

⁵Enẹ Ọrovwohwo tare: Ekan kẹ ohwo rọ vwẹ ẹro so ohwo rẹ akpọ rọ vwẹ uvwo ru ẹgba rọye, rẹ udu rọye rhẹriẹ jẹn Ọrovwohwo vwo.

⁶Kọ họhọ omodi vwẹ evun rẹ aton ọ sa mrẹ emu esiri rọ cha-a. Ọ cha dia asan ọyaya vwẹ aton na, vwẹ otọ rẹ ughweraka rẹ ohwo dia-a.

⁷Ebruba kẹ ohwo rọ vwẹ ẹro so Ọrovwohwo, rẹ iphiẹrohọ rọye hẹ evun rẹ Ọrovwohwo.

⁸Kọ họhọ urhe ra kọn phihọ asame, rẹ awọ roye djẹ ro ẹtẹrhe, rọ djẹ oshọ rẹ oheri-i, kidie ẹbe rọye epha wọnwọn, ọ rọ ẹnwan rẹ ukpe rẹ uvo rhovworo-o, kidie o jẹn emamọ emọ-ọ.

⁹Udu rẹ ohwo vọnre vẹ ophiẹvwe gangan o miovwiri gangan; ono se vughe?

¹⁰Mẹvwẹ Ọrovwohwo na re hiẹ iroro, me je davwẹ udu nẹ, rọ kẹ ohwo kohwo kirobo rẹ uruemu rọye epha, kirobo rẹ emamọ rọye epha.

¹¹Obo rẹ ọhohowa rhọghọ nẹ ọ sa aye-en na, eriyin ohwo rọ wa idjerhe umwemwu fe epha, vwẹ uherevie rẹ ẹdẹ rọye kẹ ayen yan jovwo, oba rọye ọ me rhe dia ẹkpa.

¹²Ekete rẹ urinrin re mu phihọ nẹ ẹtuọhọ rhe ọye hẹ ẹshẹ rẹ avwanre.

¹³E Ọrovwohwo, iphiẹrohọ rẹ Izrẹl, otu re sen wẹ ejobi oma cha vo ayen, otu ri kurhẹriẹ ju we vwo ke si ayen phihọ akpo na, kidie ayen siẹn Ọrovwohwo na, ẹtẹrhe rẹ ame rẹ urhuarhọ.

¹⁴Sivwẹ uvwe, E Ọrovwohwo, ki mi vwo esivwo, sivwẹ uvwe rhọ, re me vwọ sa rhọ, kidie wẹ yẹn ejiro mẹ.

¹⁵Nighe, ayen ta kẹ vwẹ, Tivọ ota rẹ Ọrovwohwo epha? Gbe jẹn ọ rhe.

¹⁶Me gba wẹ nẹ wọ vwẹ umiovwo rhe-e, eyẹ me je guọnọ ẹdẹ rẹ ẹghwọrọ-ọ, wẹ re riẹnre obo ri nẹ ẹbẹre-unu mẹ rhe e hẹ obaro wẹn.

¹⁷Wọ dia uguegue kẹ vwẹ-ẹ, wọwẹ hẹ asan odjahọ mẹ vwẹ ẹdẹ rẹ ukpokpogho.

¹⁸Otu ri kpokpo uvwe na jẹn oma vo ayen, ẹkẹvuọvo wo jẹ oma vo vwẹ-ẹ, jẹn ofu dje ayen, ẹkẹvuọvo wo jẹn ofu dje vwe-e vwẹ ẹdẹ umwemwu rhe ayen, Guọghọ ayen akuava.

¹⁹Enẹ Ọrovwohwo ta kẹ vwẹ yanran re mudia vwẹ unu rẹ ogba ri Bẹnjamin na, rẹ ivie ri Juda wan ro uwevwi ruẹ otafe na, kugbe unu rẹ ogba ri Jerusalẹm ejobi,

²⁰re wọ ta: Nyo ota rẹ Ọrovwohwo na, ovwan ivie ri Juda, vẹ ihwo ri Jerusalẹm ejobi, re wan inurhoro nana ruẹ uwevwi na.

²¹Enẹ Ọrovwohwo tare: Wa kẹnoma kẹ urhuarho rẹ ovwan, wa ghwa oghwa vwẹ edidjala-a eyẹ wo muo wan anurhoro ri Jerusalẹm vwẹ ẹdẹ na-a.

²²Wa ghwa oghwa nẹ uwevwi rẹ ovwan vwẹ ẹdidjala-a, eyẹ we ru iruo kiruo-o, ẹkẹvuọvo wa yọnrọn ẹdidjala na fuanfọn, ọtiobo ri mi ji iji kẹ esẹ rẹ ovwan.

²³Dede na ayen kerhọ-ọn ayen je vwẹ erhọn rẹ ayen kpo otọ-ọ, ẹkẹvuọvo ayen de ru udu rayen gan rere ayen vwo mrasan je nyo rere ayen vwo reyọ uyono.

²⁴Ẹkẹvuọvo Ọrovwohwo tare nẹ, ọ da dianẹ ovwan kerhọn mẹ, re wa gbe ghwa oghwa wan anurhoro na vwẹ ẹdidjala-a, ẹkẹvuọvo wọ da yọnrọn ẹdidjala na fuanfọn, ru we gbi ru iruo vwọ-ọ,

²⁵Kẹsiẹye ivie ke sa wan anurhoro nana ro orere na, re tidia enu rẹ ekete ri Devid, re gua akpẹrẹ kugbe iyesi, ayen kugbe isun rayen, ihwo ri Juda kugbe ihwo re dia Jerusalẹm; kẹ ihwo dia orere nana bẹdẹ

²⁶Ihwo che nẹ irere ri Juda vẹ asan re yariẹ Jerusalẹm phihọ, nẹ otọ ri Bẹnjamin, nẹ Shefela, nẹ orere rẹ ugbenu, ji nẹ Nẹgẹb rhe, re ghwa izobo rẹ ẹtorhẹ kugbe izobo cha, izobo rẹ ọka kugbe adjija, ke vwẹ ẹkpẹvwẹ rhe uwevwi rẹ Ọrovwohwo na.

²⁷Ẹkẹvuọvo wa kerhọn mẹ-ẹ, vwọ yọnrọn ẹdidjala na fuanfon vwo jẹ oghwa ẹghwa ruẹ anurhoro ri Jerusalẹm vwẹ ẹdidjala-a, ki mi koko erhanre phihọ, anurhoro rọye, kọ ghwọrọ ekete ri Jerusalẹm e gbi se fuo-o.