Read urhobo Jerimaya 18 Bible Online

Jerimaya 18 - urhobo bible

Jerimaya 18

¹Ota ro nẹ obọ rẹ Ọrovwohwo bru Jerimaya rhe.

²Kparoma, wọ yan kpo uwevwi rẹ ọmaichẹ, ki mi ru we nyo eta mẹ vwẹ etiyin.

³Ọye me da yanran kpo uwevwi rẹ ọmaichẹ na, yọ vwẹ adjuge ru iruo vwẹ etiyin.

⁴Ochẹ rọ vwẹ ema na ma na de miọvwi vwẹ obọ rẹ ọmaichẹ na, ọ da rhoma ma phihọ ochẹ ọfa, ọtiobo ro je ọmaichẹ na nẹ ọye ruo.

⁵Etiyin ota rẹ Ọrovwohwo de bru vwe rhe:

⁶E uwevwi rẹ Izrẹl, me gbe sa vwẹ ovwan ru kirobo rẹ omaiche nana ruru na? eriyin Ọrovwohwo tare. Nighe, obo rẹ ọphiẹn na epha vwẹ obọ ọmechẹ, eriyin ovwan e pha vwẹ obọ mẹ, E uwevwi rẹ Izrẹl.

⁷Ọ da dianẹ mi ghwoghwo kpahe orere eyẹ uvie nẹ ọkeọvo mi che ghwie notọ re me ghwọrọ,

⁸ọ da dianẹ orere yena, re me ta ota kpahe na, kurhẹriẹ nẹ umiovwo rọye, ki mi ji kurhẹriẹ jẹ umiovwo ri mi rori nẹ mi ruo jovwo na.

⁹Ọ da dianẹ mi ghwoghwo kpahe orere eyẹ uvie nẹ ọkeọvo me bọn re me je kọn,

¹⁰ọ da dianẹ o ru umwemwu vwẹ aro mẹ, ro gbi nyo urhuru mẹ-ẹ, ki mi kurhẹriẹ nẹ emu esiri ri mi rori nẹ mi ru kẹ jovwo na.

¹¹Ọtiọye na gba ta kẹ ihwo ri Juda vwẹ asakiephana re wọ je ta kẹ ihwo re dia Jerusalẹm, Enẹ Ọrovwohwo tare, Nighe, me herọ choma re umiovwo kpahe owẹ, me je jẹ iroro kpahe owẹ. Dohwo didjerhe umwemwu rọye kurhẹriẹ nu wa rhuẹrẹ idjerhe vẹ eyere rẹ ovwan phihọ.

¹²Ẹkẹvuọvo ayen da ta nẹ, Ọyena emu gheghe! Me nene iroro rẹ obọ rẹ avwanre, avwanre ohwo ọvuọvo ru kirobo rẹ udu ọgangan rẹ avwanre epha.

¹³Vwẹ ọtiọye na enẹ Ọrovwohwo tare: Nọ vwẹ uherevie rẹ irere na, ono nyo oghẹre nana dẹvure? Ọmọtobẹ rẹ Izrẹl ru emu ọbrabra.

¹⁴Kẹ imicho ri Lebanọn she nẹ oragha ri Sairọn rhe? Kẹ ame rẹ ugbenu sa djẹ kpo, ame odjidjiro rẹ ivwori rọ djẹ ọkẹre na?

¹⁵Ẹkẹvuọvo me chọrọ ihwo mẹ ẹro, ayen torhẹ insẹns kẹ eghẹnẹ rẹ efian, ayen yẹghrẹ vwẹ idjerhe rayen, vwẹ idjerhe rẹ awanre na, ri hirhe phihọ obẹnẹ rọ dia idjerhe rọde-e.

¹⁶Ayen ru otọ rayen phihọ emu rẹ oshọ emu ra fiọn unu kẹ bẹdẹ. Oshọ mu ohwo kohwo rọ wan rọ vrẹn o mi kpogho uyovwi.

¹⁷Kerẹ odju ro nẹ obaro ọnre cha eriyin me cha hra ayen vwẹ obaro rẹ ọvweghrẹ roye. Obuko mẹ me vwo ni ayen, ọ dia opharọ mẹ-ẹ, vwẹ ẹdẹ rẹ oghwọrọ rayen.

¹⁸Etiyin ayen da ta, wa yanrhe, ra jẹn iroro rhurhu Jerimaya, kidie urhi se miovwi nẹ obọ rẹ orherẹn rhe-e, eyẹ iroro ẹjẹ sa phiẹn ọvweghwanre-e, ota ji se nẹ obọ rẹ ọmraro na rhe-e. Wa rhe, re a vwẹ ẹrẹnvwe hwe, e ja kerhọn rẹ eta rọye ọvuọvo-o.

¹⁹Kerhọn mẹ, E Ọrovwohwo, wo nyo orẹ mẹ.

²⁰A san vwẹ umiovwo vwọ hwa osa rẹ erhuvwu? Dede na ye ayen tọn ọgọdọ kẹ arhọ mẹ. Karohọ obo ri mi mudia vwẹ obaro wẹn vwọ ta ota yoyovwi kpahe ayen, wo vwo ku ophu wẹn rhẹriẹ nẹ oma rẹ ayen.

²¹Ọtiọye na vwẹ owẹvwe hwe emọ rayen vwẹ ayen kẹ ogangan rẹ ọlọkọ, jẹn eya rayen dia egan vẹ eyauku. Jẹn emiavwe hwe eshare rayen, ra vwẹ ọlọkọ hwe ighene rayen vwẹ ofovwi.

²²E je nyo oviẹ vwẹ iwevwi rayen, vwẹ ọke wo de ji igbulegbu bru ayen ra kpregede! Kidie ayen tọn ọgọdọ re mi she ruọ, ayen kpahe ufi hẹrhẹ ovwẹ.

²³Ẹkẹvuọvo E Ọrovwohwo, wọwẹ re riẹn iroro rẹ ayen vwọ guọnọ ovwẹ hwe. Wọ vwẹ orukuruku rayen vwo ghovwo aye-en, wo ji phoro umwemwu rayen nẹ obaro wẹ-ẹ. Jẹn ayen she ghwiotọ vwẹ obaro wẹn, ru ayen gangan vwẹ ọke rẹ ophu wẹn na.