Read urhobo Jerimaya 19 Bible Online

Jerimaya 19 - urhobo bible

Jerimaya 19

¹Enẹ Ọrovwohwo tare, Yanran ra dẹ ọmọtoto rẹ ọmaichẹ na, re wọ reyọ evo vwẹ ekpako rẹ ihwo na kugbe evo rẹ ekpako rẹ irherẹn na,

²wọ yan kpọ Iyara rẹ Hinnọm vwẹ asan anurhoro rẹ Igbephẹre na, wo dia etiyin de ghwoghwo eta re me ta kẹ wẹ na.

³Wọ me tanẹ, Nyo ota rẹ Ọrovwohwo na, E ivie ri Juda kugbe ihwo re dia Jerusalẹm, Enẹ Ọrovwohwo rẹ ofovwi na tare, Ọghẹnẹ rẹ Izrẹl, Nighe, me ghwa umiovwo cha etinẹ na rẹ erhọn kerhọn ro nyoro ejobi de shegbe.

⁴Fikiridie ihwo na sen vwẹ, ayen torhẹ incẹnse kẹ eghẹnẹ efa vwo miovwo etinẹ na, eghẹnẹ re ayen vẹ esẹ rayen kugbe ivie ri Juda riẹnre-e, fikiridie ayen ghwa ọbara rẹ evwata rhe vwọ vọn etine na.

⁵Ayen da ma umukpe ro kpenu kẹ Baal ra da torhẹ emeshare vwẹ evun rẹ erhanre kerẹ izobo rẹ ẹtorhẹ kẹ Baal, ọ ri mi ji kẹ aye-en eyẹ ke me je vuẹ aye-en, ọ je ro iroro mẹ-ẹ.

⁶Ọtiọye na, nighe, ẹdẹ cha, eriyin Ọrovwohwo tare, re gbi se etinẹ na Tọfẹt ọfa-a, eyẹ Iyara ri Hinnọm ọfa-a, ẹkẹvuọvo ke se nẹ Iyara re de hwe ihwo.

⁷Vwẹ etinẹ na me da hra iroro ri Juda vẹ iroro ri Jerusalẹm, ki mi ru ihwo rayen re ọlọkọ hwe ayen vwẹ obaro rẹ ivwighrẹ rayen, vwẹ obọ rẹ otu re guọnọ arhọ rayen hwe. Me cha vwẹ irivwi rayen ru emuọre kẹ emephran rẹ obenu na kugbe eranvwe rẹ aghwa na.

⁸Ki mi ru orere nana kọ dia imuoshọ, ra fiọn unu kẹ; ohwo kohwo rọ wa rọ vrẹ ejobi oshọ ko muo kọ cha fiọn unu vwi fiki rẹ eghwọrọ rọye.

⁹Ki mi che ru ayen re ayen da re ugboma rẹ emeshare vẹ emetẹ rayen, dohwo dugboma rẹ ọrivẹ rọyẹ ke cha re vwẹ ọke rẹ imu na vẹ ukpokpogho na, rẹ ivwighrẹ rayen vẹ otu re guọnọ arhọ rayen hwe che vwo kpokpo ayen.

¹⁰Wo mi hwe ọmọtoto na vwẹ obaro rẹ ihwo ri nene uwe yan na.

¹¹Wọ ta kẹ ayen nẹ, Enẹ Ọrovwohwo rẹ otuofovwi tare: Ọtiọye mi che hwe ihwo nana kugbe orere nana, kirobo rẹ ohwo hwe ochẹ rẹ ọmaichẹ, a gbe sa rhuẹrẹ-ẹ. E che shi ihwo vwẹ Tọfẹt fikifidie asan ọfa re shi ihwo phihọ gbe herọ-ọ.

¹²Kẹ enẹ mi che ru kẹ etinẹ na, eriyin Ọrovwohwo tare, eriyin mi ru ihwo roye, ji ru orere nana kerẹ Tọfẹt.

¹³Iwevwi ri Jerusalẹm kugbe iwevwi rẹ ivie ri Juda — iwevwi ra dia enu rayen da torhẹ izobo kẹ otu rẹ obenu ejobi, ra da vwẹ idi gọ iye kẹ eghẹnẹ efa, e che gbe ayen ẹgua vwi Tọfẹt.

¹⁴Etiyin Jerimaya de nẹ Tọfẹt rhe, obo rẹ Ọrovwohwo jiro ra nẹ ọ ra mraro na, ọ de mudia ọguan rẹ uwevwi rẹ Ọrovwohwo, ọ da ta kẹ ihwo na ejobi;

¹⁵Enẹ Ọrovwohwo rẹ otuofovwi, Ọghẹnẹ rẹ Izrẹl, tare, Nighe, me herọ ghwa umiovwo cha orere nana kugbe irere rọye ejobi umiovwo ri mi ghwoghwo kpahọ ejobi, fikiridie ayen gan udu phihọ, ayen rhọvwe nyo eta mẹ-ẹ.