Read urhobo Jerimaya 22 Bible Online

Jerimaya 22 - urhobo bible

Jerimaya 22

¹Enẹ Ọrovwohwo tare, Wotọ kpo uwevwi rẹ ovie ri Juda, wọ ta ota nana vwẹ etiyin nẹ,

²Nyo ota rẹ Ọrovwohwo na, E Ovie ri Juda, ro tidia ekete ri Devid na, wọwẹ, vẹ idibo wẹn re rua anurhoro nana.

³Enẹ Ọrovwohwo tare: Ru obo ri shehọ vẹ ọsoso, sivwi ohwo re shenyẹ nẹ abọ rẹ ohwo ro shenyẹ na. Wo rue oruchọ eyẹ wọ ji gbe ozighi kẹ ọrhorha-a, ọmọphrori-i vwi-i, kugbe ayeuku-u, wo ji sun ọbara rẹ ọvwata vwẹ etinẹ na-a.

⁴Kidie ọ da dianẹ we ghine nyo ota nana we de ruo, kẹsiẹye ivie ri tidia vwẹ ekete ri Devid ke ro inurhoro rẹ etinẹ na, vẹ akpẹrẹ vẹ iyesi, ayen, vẹ idibo rayen, kugbe ihwo rayen.

⁵Ẹkẹvuọvo wa gbe kerhọn rẹ eta nana-a, ye me vwẹ oma mẹ duvwu iyori, eriyin Ọrovwohwo tare, nẹ uwevwi nana cha dia ofefe.

⁶Kidie enẹ Ọrovwohwo tare kpahe uwevwi rẹ ovie ri Juda: Wọ họhọ Giliad kẹ vwẹ, kerẹ enu ri Libanọn, dede na uyota mi che ru we phihọ aton, phihọ orere re jẹ dia.

⁷Me cha reyọ otu re ghwọrọ vwọ họnre owẹ, dohwo dekuakua rọye, ayen che she emamọ ri igẹdu wẹn kuoto, a da ghwe ayen phihọ erhanre.

⁸Ihwo rẹ irere buebu cha wan orere nana vrẹn dohwo dọrivẹ rọye cha ta kẹ, Die nẹrhẹ Ọrovwohwo ru okporere nana emu ọtiọnana?

⁹Ayen ke kpahe, Fikiridie ayen siẹn ọphọ rẹ Ọrovwohwo rẹ Ọghẹnẹ rayen, ayen da vwẹ uyovwi kpotọ kẹ eghẹnẹ efa, ayen da gọ ayen.

¹⁰Wọ viẹ ọ ro ghwuru na-a, wo ji vwerhe-e, ẹkẹvuọvo viẹ kẹ ọ rọ yanran na gangan kidie o gbi rhivwi rhe ọfa-a rhe mrẹ orere rọye-e.

¹¹Kidie Ọrovwohwo tare kpahe Shalọm rẹ ọmọ ri Josaya, ọvie ri Juda, rọ re uvie vwẹ ẹdia ri Josaya rẹ ọse rọye nuru ọ ro nẹ etinẹ yanran na. O gbi rhivwi rhe etinẹ ofa-a,

¹²ẹkẹvuọvo asan rẹ ayen muro ra na, oboyi o de ghwu ọ gbe mrẹ otọ nana ọfa-a.

¹³Ekan kẹ ohwo rọ vwẹ umwemwu bọn uwevwi rọye, rọ vwẹ oshenyẹ bọn igedege rọye, ro ru ọrivẹ rọye rọ ga ghevweghe, yẹ ọ hwa osa rọye kẹ-ẹ,

¹⁴rọ tanẹ, me cha bọn uwevwi rode vẹ ivun phẹphẹ vwẹ obenu, re ji bru evakpo buebu phihọ, phi echẹ ri igedu phihọ evakpo na, vwẹ oda ọvwavware rharọ.

¹⁵Wo roro nẹ wẹ ovie fikiridie wọ dia uwevwi ri igedu? Ọ dianẹ ọse wẹn re ria je da, yẹ o brorhiẹ ọsoso vẹ ọ rẹ ọvwata? Kẹsiẹye o ki yovwi kẹ.

¹⁶O brorhiẹ rẹ igbere vẹ ọ rẹ uvwohwo, etiyin o de yovwi. O dia ọna a vwọ riẹn vwẹ-ẹ? Enẹ Ọrovwohwo tare.

¹⁷Ẹkẹvuọvo wọ vwẹ ibiẹro vẹ udu vwọ kẹ erere ọchọchọ ọvo, vwo sun ọbara rẹ evwata te otọ, ji vwo ru oshenyẹ vẹ ozighi.

¹⁸Ọtiọye na enẹ Ọrovwohwo ta kpahe Johaikim ọmọ ri Josaya, ovie ri Juda: Ayen gbe viẹ kẹ-ẹ, tanẹ E oniọvo me! eyẹ E oniọvo mẹ rẹ ọmọte! Ayen gbe viẹ kẹ-ẹ, tanẹ, E ọrovwohwo eyẹ E ọrho rọye!

¹⁹Obo re shi ekẹtẹkẹtẹ ọye esho, e kpono e mi do phihọ abọ oboyi rẹ inurhoro ri Jerusalẹm.

²⁰Yan kpo Lebanọn, wo kperi, je kpare urhuru wẹn vwi Beshan, viẹ nẹ Abarim rhe kidie esen wẹn ejobi a ghwọrọ ayen.

²¹Me ta kẹ wẹ vwẹ evun rẹ oyovwe wẹn, ẹkẹvuọvo wọ tare, Me cha kerhọ-ọn, Ọnana uruemu wẹn nẹ emọ rhe, nẹ wo nyo urhuru mẹ-ẹ.

²²Odju che sun isuigode wẹn, e che mu esen wẹn kpo ighuvwu kẹsiẹye oma ke vo wẹ ku wo kpogho fiki rẹ umwemwu wẹn ejobi.

²³E ohwo rọ dia Lebanọn, rọ bọn ẹho phihọ ohri ri igedu. Mavọ wọ guan te re odjadja de bru we rhe, ọtie odjadja rẹ aye rọ chuẹ uvwiẹ!

²⁴Obo me herọ na, eriyin Ọrovwohwo tare, owenẹ Konaya ọmọ ri Jehoiakim, ovie ri Juda, dia ubiosa rẹ obọrhe mẹ dede, me je bẹrẹ owẹ kufia ghene.

²⁵Mi de phi we phihọ obọ rẹ ohwo rọ guọnọ arhọ wẹn, phihọ obọ rẹ ohwo rẹ oshọ rọye mu we, tobọ phihọ obọ ri Nẹbukadreza ovie ri Babilọn ji phihọ obọ rẹ ihwo ri Kaldia.

²⁶Mi do we vẹ oni ro vwiẹ wẹ kpo orere ọfa, asan re de vwiẹ wẹ-ẹ, oboyi wo de ghwu.

²⁷Ẹkẹvuọvo otọ re ayen guọnọre nẹ ayen rhivwi ra na, ayen che se rhivwi ra-a.

²⁸Ohwo nana Konaya na, ochẹ ro fi emuọvo-o ro ghwuru, ochẹ ra vwẹ ẹro te-e? Die sorọ evwo do vẹ emọ rọye kufia kpo otọ re ayen riẹnre-e?

²⁹E otọ, otọ, otọ nyo ota rẹ Ọrovwohwo!

³⁰Enẹ Ọrovwohwo tare: Si ohwo nana phihọ otọ kere ẹgan, ohwo ro che yovwẹ kẹ vwẹ ẹdẹ rọye ejobi-i, kidie ọmọ rọye ọvuọvo cha dia ẹdia rọye-e vwo tidia ekete ri Devid, vwọ rhoma re uvie vwi Juda.