Read urhobo Jerimaya 23 Bible Online

Jerimaya 23 - urhobo bible

Jerimaya 23

¹Ekan kẹ isuigegede re ghwọrọ re je hra igegede re me ghẹrẹ na! eriyin Ọrovwohwo tare.

²Ọtioye na enẹ Ọrovwohwo, Ọghẹnẹ rẹ Izrẹl tare, kpahe isuigegede ri nẹ ihwo mẹ: wa hra ukoko rẹ igegede mẹ, wa djẹ ayen ghwru, wa vwẹ ẹro te aye-en. Nighe, Me cha mrẹ ovwan fiki rẹ iruo omiomiovwi rẹ ovwan, eriyin Ọrovwohwo tare.

³Ke me ghwẹ igegede mẹ ri chekọ nẹ asan me djẹ ayen ra ejobi rhe, me ghwẹ ayen rhivwi rhe ukoko rayen, ayen ki vwiẹ ji bu phihọ.

⁴Me cha vwẹ isuigegede re vwẹ ẹro te ayen mu kẹ ayen, oshọ rhe mu ayen ọfa-a, udu gbi bru aye-en, ọvuọvo gbi ghwru no-o, eriyin Ọrovwohwo tare.

⁵Nighe, ẹdẹ cha, Ọrovwohwo tare, me cha vwọ kpare oghọn rẹ ọvwata kẹ Devid, kọ re uvie kerẹ ovie ọghwanghwanre, ko brorhiẹ rẹ ọsoso vẹ ọvwata vwẹ otọ na.

⁶Juda kọ rhọ vwẹ ẹdẹ rọye na, Izrẹl kọ dia egbẹrhẹnẹdẹ. Ọnana ọye odẹ re vwo se Ọrovwohwo ọvwata rẹ avwanre.

⁷Ọtiọye na, gbe nighe, ẹdẹ cha, Ọrovwohwo tare, rẹ ihwo gbe cha ta ọfa-a, kirobo rẹ Ọrovwohwo herọ rọ reyọ ihwo rẹ Izrẹl nẹ otọ rẹ Ijipt rhe na,

⁸ẹkẹvuọvo kirobo rẹ Ọrovwohwo herọ rọ reyọ uvwiẹ rẹ uwevwi rẹ Izrẹl ji sun ayen nẹ orho rẹ obọhwẹre ọnre rhe kugbe irho rọ djẹ ayen ra ejobi na. Ayen ke dia otọ rẹ obọ rayen.

⁹Vwọ kpahe emraro na: Udu mẹ guọghọre vwẹ evun me, ibeku mẹ ejobi kpoghori, Me họhọ ohwo rọ da udi rhe họhọ ohwo rẹ udi muẹ fiki rẹ Ọrovwohwo na kugbe fiki rẹ eta efuanfon rọye.

¹⁰Kidie otọ na vọnre vẹ igberadja; fiki rẹ ekan otọ na vwo muomahọ, odi rẹ aghwa na ejobi je ya re. Idjerhe rayen omiomiovwi, ẹgba rayen shehọ-ọ.

¹¹Tẹ ọmraro tẹ orherẹn riẹn Ọghẹnẹ-ẹ, vwẹ evun rẹ uwevwi mẹ me da mrẹ umwemwu rayen vughe eriyin Ọrovwohwo tare.

¹²Ọtiọye na idjerhe rayen kọ dia kẹ ayen kerẹ idjerhe rọ ghworiẹ vwẹ ebri, ra cha djẹ ayen rua rẹ ayen de she; kidie me cha ghwẹ umiovwo rhe ayen vwẹ ukpe rẹ ehwe rayen, eriyin Ọrovwohwo tare.

¹³Vwẹ evun rẹ emraro ri Sameria na me da mrẹ emuọvo rẹ ọchọre, ayen vwẹ Baal mraro ayen de sun Izrẹl rẹ ihwo mẹ ghwru.

¹⁴Ẹkẹvuọvo vwẹ emraro ri Jerusalẹm me mrẹ emuọvo ro muoshọ, ayen gbe igberadja ayen je yan vwẹ evun rẹ ofian, ayen ru obọ rẹ iruimwemwu gan, vwẹ eriyin ọ ro kurhẹriẹ nẹ umwemwu gbe herọ-ọ ayen ejobi da họhọ Sodọm kẹ vwẹ, ihwo re dia da họhọ Gomora.

¹⁵Ọtiọye na enẹ Ọrovwohwo rẹ otuofovwi na ta kpahe emraro na: Nighe, me cha vwẹ emu ro muenu ghẹrẹ ayen, me ke ayen ame rẹ obi da, kidie vwẹ obọ rẹ emraro ri Jerusalẹm Jẹn ọghẹnẹ ẹriẹn rhe wan ro otọ na ejobi.

¹⁶Enẹ Ọrovwohwo rẹ otuofovwi na tare, Wọ kerhọn rẹ eta rẹ emraro re mraro kẹ wẹ na-a, re ghwẹ iphiẹrohọ ifefe vọn wẹ oma na, emramrẹ re iroro rayen ayen ta na, ọ dia ọ ro nẹ unu rẹ Ọrovwohwo na rhe-e.

¹⁷Ayen dje eta efa kẹ otu re siẹn ota rẹ Ọrovwohwo na. O che yovwẹ kẹ ovwan ji te ayen ihwo ri nene udu ọgangan rẹ evun rẹ rayen nẹ, Umiovwo se te ovwa-an.

¹⁸Kono vwẹ ohri rayen na ri mudia vwẹ ẹguare rẹ Ọrovwohwo na, vwo vughe eyẹ ji nyo ota rọye, eyẹ ono vwẹ oma totọ vwọ kerhọn rẹ ota rọye?

¹⁹Nighe, ogiribo rẹ Ọrovwohwo! Ophu rọye ro otafe re, ọdju rode; ọ cha enu rẹ iriumwemwu na.

²⁰Ophu rẹ Ọrovwohwo se rhivwi-i bẹsiẹ ro vwo brorhiẹ rẹ imu re hẹ udu rọye re nu. Vwẹ ẹdẹ rẹ okuko na wa cha riẹn phephe.

²¹Mi ji emraro na-a, yẹ ayen djẹ, Me ta kẹ aye-en yẹ ayen mraro.

²²Ọ dianẹ ke ayen mudia vwẹ ẹguare mẹ, manẹ ayen ghwoghwo ota mẹ kẹ ihwo mẹ, manẹ ayen ku ayen rhẹriẹ nẹ idjerhe umwemwu rayen, ji nẹ umiovwo rẹ eyere rayen.

²³Mẹvwẹ Ọghẹnẹ rọ kẹrobọ, eriyin Ọrovwohwo tare, me dia Ọghẹnẹ rẹ ogboko-o?

²⁴Ohwo se si oma nu vwẹ asan rọ djahere mi de jẹ mrẹ, eriyin Ọrovwohwo tare. Ọ dia mẹvwẹ re ghwẹ odjuvwu vẹ akpọ na vọn eriyin Ọrovwohwo tare.

²⁵Emraro re vwẹ odẹ mẹ mraro rẹ efian na mi nyo obo rẹ ayen ta nẹ, Me vwerhẹ evwerhẹ, Me vwerhẹ evwerhẹ!

²⁶Mavo efian dia krite vwo vwẹ evun rẹ emraro re vwọrọn efian na, re mraro rẹ ophiẹvwe rẹ udu rẹ obọ rayen na,

²⁷ri roro nẹ ayen ru ihwo mẹ re odẹ mẹ da chọrọ ayen ẹro vwẹ oma rẹ evwerhẹ rayen rẹ ayen ta kẹ ohwohwo na, yan nene Baal na?

²⁸E jẹ ọmraro rọ vwerhẹ evwerhẹ ta evwerhẹ rọye, ẹkẹvuọvo e jẹ ọ ro vwo ota mẹ vwẹ esegbuyota ta. Didi emu odi ve ọka gbe vwo kugbe? eriyin Ọrovwohwo tare.

²⁹Ọ dianẹ ota mẹ họhọ erhanre, eriyin Ọrovwohwo tare, ọ je họhọ ubrogba rọ guọghọ oragha ivwivwuvwu na?

³⁰Vwe ọtiọye na, gbe nighe, mi mu kpahe emraro na, eriyin Ọrovwohwo tare, iri cho ota mẹ miẹ ohwohwo na.

³¹Nighe, mi mu kpahe emraro na, eriyin Ọrovwohwo tare, e re vwẹ ẹrẹnvwe rayen tanẹ, eriyin Ọrovwohwo tare.

³²Nighe, Mi mu kpahe otu re mraro rẹ evwerhẹ rẹ efian, eriyin Ọrovwohwo tare, kugbe otu re ta kẹ ayen me vwẹ efian evwọrọ vẹ ozighi rayen vwo sun ihwo mẹ ghwru yi mi ji aye-en me je kẹ ayen oganga-an; ayen dia erere kẹ ihwo nana-a, eriyin Ọrovwohwo tare.

³³Ọke rẹ ọvo vwẹ usun rẹ ihwo nana, eyẹ ọmraro ọvo, eyẹ orherẹn ọvo da nọ wẹ nẹ, Die tobọ hẹ oghwa rẹ Ọrovwohwo vwo? ku wo nyo kẹ ayen nẹ, ovwan oghwa na mi phi ovwan kufia, eriyin Ọrovwohwo tare.

³⁴Vwọ kẹ ọmraro na, orherẹn, eyẹ ọvo vwẹ ihwo na rọ tare nẹ, Oghwa rẹ Ọrovwohwo na, Mi ru ohwo yena vẹ uwevwi rọye emu ọgangan.

³⁵Enẹ wọ ta, dohwo dọrivẹ rọye bru ra re dohwo doniọvo rọye ji bru ra, Die Ọrovwohwo kpahere vwo? eyẹ, Die Ọrovwohwo tare vwo?

³⁶Ẹkẹvuọvo wo gbi se odẹ rẹ oghwa rẹ Ọrovwohwo na ọfa-a, kidie oghwa na ọye ota rẹ ohwo ọvuọvo, wa rhẹriẹ eta rẹ Ọghẹnẹ ri bẹdẹ na, Ọrovwohwo rẹ otuofovwi na, Ọghẹne rẹ avwanre na.

³⁷Enẹ wọ ta kẹ ọmrarọ na, Die Ọrovwohwo kpahe kẹ wẹ? eyẹ, Die Ọrovwohwo ta kẹ wẹ?

³⁸Ẹkẹvuọvo ọ da dianẹ wọ tare nẹ, Oghwa rẹ Ọrovwohwo, enẹ Ọrovwohwo tare, fikiridie wọ ta eta nana nure, Oghwa rẹ Ọrovwohwo na, oke mi vwo ju we na, ta nẹ, Oghwa rẹ Ọrovwohwo na,

³⁹ọtiọye na, gbe nighe, uyota me cha kpare owẹ kpenu mi de phi we nẹ obaro mẹ, wẹ vẹ orere re me kẹ wẹ vẹ esẹ wẹn na.

⁴⁰Ki nu mu oghwa rẹ ehwe ri bẹdẹ na vẹ omavovwẹ ri rhiri kpahe enu wẹ, ro ju we ẹro ẹchọrọ.