Read urhobo Jerimaya 24 Bible Online

Jerimaya 24 - urhobo bible

Jerimaya 24

¹Ri Nẹbukadreza ovie ri Babilọn vwo mu Jekonaya ọmọ re Jehọiakim, ovie ri Juda, kugbe isun ri Juda, te ewena, te idjogun, nẹ Jerusalẹm rhe, ro vwo mu ayen imu vwo kpo Babilọn, Ọrovwohwo da vwẹ emramrẹ nana vwọ nẹ vwẹ. Nighe, ibere ri fig ivẹ da hẹ obaro rẹ uwevwi rẹ Ọrovwohwo na.

²Obere ọvo vwo omamọ ri fig, e re họhọ fig ri ke vwie, ẹkẹvuọvo obere rivẹ de vwo fig imiomiovwi gangan, imiovwi nọ i gbi ja re-e.

³Ọrovwohwo ke ta kẹ vwẹ, Die wọ miẹre, Jerimaya? Me da ta, Fig, omamọ ri fig na yovwiri gangan, fig omiomiovwi gangan, imiovwi nọ i gbi ja re-e.

⁴Kẹsiẹye ota rẹ Ọrovwohwo ki bru vwe rhe.

⁵Enẹ Ọrovwohwo Ọghẹnẹ rẹ Izrẹl tare, Kirobo rẹ omamọ ri fig nana epha na, ọtiọye mi ji ni otu re mu nẹ Juda kpo imu na nẹ iyovwiri, ihwo mi mu nẹ etinẹ na vwo kpo oto rẹ ihwo ri Kaldia.

⁶Me vwẹ ẹro mẹ ni ayen fiki rẹ erhuvwu, me cha reyọ ayen rhe otọ nana, mi che mu ayen vi, me gbe ghwọrọ aye-en, me kọn ayen, mi gbi che ghwie aye-en.

⁷Me kẹ ayen udu rẹ ayen vwọ riẹn nẹ mẹvwẹ Ọrovwohwo na; ayen cha dia ihwo mẹ ke me dia Ọghẹnẹ rayen, kidie ayen cha vwẹ udu rayen ejobi rhivwi bru uvwe rhe.

⁸Ẹkẹvuọvo enẹ Ọrovwohwo tare, Kirobo ri fig imiomiovwi na ri miovwi nọ re ja re-e na, epha na, ọtiọye mi che ru Zedikaya rẹ ovie ri Juda, te isun rọye, otu ri chekọ vwi Jerusalẹm re jẹ hẹ otọ nana, kugbe ayen otu re dia otọ rẹ Ijipt.

⁹Mi che ru ayen vwọ dia ometuo rode kẹ ivie re akpọ na, ayen ke dia ehwẹjẹ, ayen ke dia ọhare, ra mienuhọ vẹ ekan vwẹ asan kasan me cha djẹ ayen ra ejobi.

¹⁰Ki mi ji ọlọkọ vẹ owẹvwe, kugbe emiavwe bru ayen ra, bẹsiẹye re ayen vwọ ghwọrọ tototo nẹ otọ re me kẹ ayen vẹ esẹ rayen na.