Read urhobo Jerimaya 25 Bible Online

Jerimaya 25 - urhobo bible

Jerimaya 25

¹Ota ro bru Jẹrimaya rhe kpahe ihwo ri Juda ejobi, vwẹ ẹgbukpe rẹne ri Jehoiakim rẹ ọmọ ri Josaya, ovie ri Juda (oyena ẹgbukpe rẹsosuo ri Nebukadreza ovie ri Babilọn),

²ri Jerimaya rẹ ọmraro na ta kẹ ihwo ri Juda ejobi kugbe ihwo re dia Jerusalẹm.

³Etiyin ikpe uje gbẹ erha re, nẹ ẹgbukpe ihwe gbẹ erha ri Josaya ọmọ rẹ Amọn ovie ri Juda na, rhi te nonẹ na, ota rẹ Ọrovwohwo na bru vwe rhe, me je ta kẹ ovwan ẹtẹta kẹ, dede na wa kerhọ-ọn.

⁴Wa kerhọ-ọn wa je vwẹ erhọn kpotọ re we nyo-o, owene Ọrovwohwo na jẹ idibo na emraro na ejobi bru ovwan rhe vwẹ ọke ejobi,

⁵tanẹ, rhẹriẹ asakiephana ovwan na ejobi, nẹ idjerhe umwemwu vẹ iruo ebrabra rọye na, re wa dia otọ rẹ Ọrovwohwo vwọ kẹ ovwan vẹ esẹ rẹ ovwan nẹ awanre rhe rhiri bẹdẹ;

⁶ovwan yan nene eghẹnẹ efa re wa ga ayen, shiguẹ kẹ aye-en, eyẹ wa vwẹ iruo rẹ abo rẹ ovwan kpare ovwẹ ophu-u. Me gbe wan ovwan oma-a.

⁷Dede na wa kerhọn mẹ-ẹ, eriyin Ọrovwohwo tare, nẹ wa vwẹ iruo rẹ abọ rẹ ovwan kpare ovwẹ ophu vwọ kẹ umiovwo rẹ obọ rẹ ovwan.

⁸Ọtiọye na enẹ Ọrovwohwo rẹ otuofovwi na tare, Fiki rẹ obo ri we nyo eta mẹ-ẹ na,

⁹gbe nighe, mi che se uvwiẹ rẹ obọhwẹre ọnre cha, eriyin Ọrovwohwo tare, kugbe Nebukadreza ovie ri Babilọn, odibo mẹ na, me ghwẹ ayen rhe vwọ họnre otọ nana vẹ ihwo re dia, je kpahe irere nana re yarierẹ na; me cha ghwọrọ ayen tọtọtọ, mi de ru ayen imuosho vẹ unuẹfiọn, kugbe ihwo ra hwe bẹdẹ.

¹⁰Ọ rọ ma rho, mi che si urhuru rẹ omavwerhovwẹ vẹ urhuru rẹ aghọghọ, urhuru rẹ oshare rẹ ọpha vẹ urhuru rẹ ọpha nẹ ayen obọ, ẹnọ rẹ elanọ vẹ elo rẹ urhukpẹ.

¹¹Otọ nana soso na che hirhe phihọ umiovwo kọ dia ofefe, irere nana cha ga ovie ri Babilọn ikpe ujorha gbẹ ihwe.

¹²Siẹ rẹ ikpe ujorha gbẹ ihwe na da gba nure, ki mi ru ovie ri Babilọn vẹ orere yena djadja, otọ rẹ ihwo ri Kaldia na, fiki rẹ orukuruku rayen, eriyin Ọrovwohwo tare, ki mi ru ayen ofefe bẹdẹ bẹdẹ.

¹³Mi che ru otọ yana kiroho re me ta kpahọ na ejobi, emu kemu re siri vwẹ ọbe nana ọ ri Jerimaya mraro rọye kpahe irere na ejobi.

¹⁴Kidie irere buebu vẹ ivie ride na cha vwẹ evo rayen ru eviẹn, obo rẹ umwemwu rayen vẹ iruo rẹ abọ rayen epha me cha hwa osa kẹ ayen te.

¹⁵Enẹ Ọrovwohwo, Ọghẹnẹ rẹ Izrẹl, ta kẹ vwẹ: Reyọ uko ri wain re ophu na nẹ obọ mẹ, re wo ru irere ejobi ri mi ju we bru ra na re ayen da.

¹⁶Ayen cha da ayen ki yeghrẹ ayen ke mua orhuẹ vwi fiki rẹ ọlọkọ ri mi che ji phihọ ọhri rayen na.

¹⁷Me da reyọ uko na nẹ obọ rẹ Ọrovwohwo mi de ru irere rẹ Ọrovwohwo ju vwe bru ra na ejobi ayen da da.

¹⁸Jerusalẹm vẹ irere ri Juda, ivie vẹ isun rọye, re e vwo ru ayen ofefe ra vwọ ghwọrọ ayen, ru ayen unuefiọn vẹ ekan, kirobọ rọ epha nọne na.

¹⁹Fẹro ovie rẹ Ijipt, idibo rọye, isun rọye, ihwo rọye ejobi,

²⁰kugbe erhorha re hẹ ohri rayen, ivie rẹ otọ rẹ Uz ejobi, vẹ ivie rẹ otọ ri Filistia ejobi (Ashakẹlọn, Gaza, Ekrọn, vẹ umuku rẹ Ashdọd),

²¹Idọm, Moab, kugbe emọ rẹ Ammọn.

²²Ivie ri Taya ejobi, ivie ri Saidọn ejobi, kugbe ivie rẹ erhuru re wan abadi vrẹn na;

²³Dedan, Tema, Buz vẹ otu ri bre akakọ rẹ ẹto rayen na;

²⁴ivie rẹ Arebia ejobi vẹ ivie rẹ ivwiẹ ri yeri kugbe na ejobi re dia aton na.

²⁵Ivie ri Zimri ejobi, ivie rẹ Elam ejobi, kugbe ivie ri Midia ejobi.

²⁶Ivie rẹ obọhwẹre ọnre ejobi, te iri sheri vẹ ere kẹre, ohwo kpahe ohwo, vẹ uvie rẹ akpọ na ejobi re hẹ enu rẹ otọ na. Ayen da da nu ovie ri Babilọn kọ da.

²⁷Kẹsiẹye wọ ke ta kẹ ayen, Enẹ Ọrovwohwo rẹ otuofovwi na, Ọghẹnẹ rẹ Izrẹl tare, Wa da re idi mu ovwan we geri, we she we gbi vrẹn ofa-a, fiki rẹ ọlọkọ re me vwọ cha ọhri rẹ ovwan na.

²⁸Ayen gbe rhọvwe mie we uko na da-a, ko wọ ta kẹ ayen nẹ, Enẹ Ọrovwohwo rẹ otuofovwi na tare, Ovwan jẹ da-a!

²⁹Kidie gbe nighe, mi mu umiovwọ phihọ eruo vwẹ orere re vwo se odẹ mẹ na re, kẹ ovwan dia re e je ovwan eruo gangan? E se je ovwan eruo ganga-an, kidie mi se ọlọkọ rhe kpahe ihwo re dia akpọ na, eriyin Ọrovwohwo rẹ otuofovwi na tare.

³⁰Vwẹ ọtiọye na, wọ me mraro rẹ eta nana kpahe ayen, wọ ta kẹ ayen nẹ: Ọrovwohwo cha van nẹ enu cha, O che do urhuru nẹ ẹdia ọfuanfon rọye rhe; Ọ cha van gangan kpahe igegede rọye kperi, kere ihwo ri chiyi edi, kpahe ihwo re dia akpọ na ejobi.

³¹Edo na rhoma do te oba rẹ akpọ na re, kidie Ọrovwohwo vwo ẹdjọ kpahe irere na, ọ vẹ ihwo na ejobi che guẹdjọ, iruimwemwu ọ cha vwẹ ọlọkọ hwe ayen, eriyin Ọrovwohwo tare.

³²Enẹ Ọrovwohwo rẹ otuofovwi na tare: Nighe, umiovwo nẹ orere ra ro orere re, O se ogidi rode na nẹ oba rẹ akpo na rhe!

³³Otu rẹ Ọrovwohwo hweri vwẹ ẹdẹ yena cha riẹn nẹ oba rẹ akpọ ọvo re te ọrivẹ. A cha viẹ aye-en, e ji koko aye-en, e ji shi aye-en, ayen cha dia isọn vwẹ enu rẹ otọ na.

³⁴Viẹ, ovwan isuigegede, re we kperi, gbunie vwẹ iwurhie, ovwan ilori rẹ igegede na, Kidie ẹdẹ rẹ ehwe vẹ ọ rẹ ohra rẹ ovwan rhire wo che she kerẹ egbo yoyovwi

³⁵Urhurho rhe chekọ kẹ isuigegede na-a, eyẹ ẹdjẹnọ gbe herọ kẹ ikru rẹ igegede na-a.

³⁶Kerhọn rẹ ekpere rẹ isuigegede na, vẹ oviẹ rẹ ilori rẹ igegede na! Kidie Ọrovwohwo che miovwẹ odi rẹ igegede na kufia,

³⁷e ji kpokpo igegede re hẹ evun rẹ ufuoma na, fiki rẹ ophu ọtuatua rẹ Ọrovwohwo na.

³⁸Ọ ya jẹ emwa rọye vwọ kerẹ okpohrokpo, kidie otọ rayen ghwọrọ kufia fiki rẹ ọlọkọ rẹ Ọrovwohwo na, kugbe fiki rẹ ophu ọtuatua rọye na.