Read urhobo Jerimaya 28 Bible Online

Jerimaya 28 - urhobo bible

Jerimaya 28

¹Vwẹ ukpe yena ọvo na, vwẹ ẹtuohọ rẹ uvie ẹriọ ri Zedikaya ovie ri Juda, vwẹ emeranvwe rẹ iyori rẹ ẹgbukpe rẹne, Hananaya ọmọ rẹ Azu rẹ ọmraro ro nẹ Gibeọn rhe, da ta kẹ vwẹ vwẹ uwevwi rẹ Ọrovwohwo, vwẹ idaro rẹ irherẹn na vẹ ihwo na ejobi, nẹ,

²Enẹ Ọrovwohwo rẹ otuofovwi Ọghẹnẹ re Izrẹl, tare; Mẹ guọghọ urhekpe rẹ ovie ri Babilọn nure.

³Vwẹ emu rẹ ikpe ivẹ me cha ghwa ekuakua rẹ uwevwi rẹ Ọrovwohwo cha etinẹ, e re Nebukadreza ovie ri Babilọn reyọ nẹ etinẹ kpo Babilọn na.

⁴Me je reyọ Jekonaya ọmọ ri Jehoiakim, ovie ri Juda kpo vẹ ihwo ejobi re mu nẹ Juda kpo Babilọn rhivwi rhe etinẹ, eriyin Ọrovwohwo na tare, kidie me cha guọghọ urhekpe rẹ ovie ri Babilọn.

⁵Jerimaya rẹ ọmraro na da da ta kẹ Hananaya rẹ ọmraro na vwẹ aro rẹ irherẹn na vẹ ihwo ejobi ri mudia vwẹ uwevwi rẹ Ọrovwohwo na.

⁶Jerimaya rẹ ọmraro na da ta, Isẹ! E jẹn Ọrovwohwo ru ọtiọye; e jẹn Ọrovwohwo ru eta ro wọ tare na re dia uyota, re ekuakua ra ghwa nẹ uwevwi rẹ Ọrovwohwo, kpo Babilọn na, vẹ ighivwu na, a rhoma reyọ ayen rhe etinẹ.

⁷Ẹkẹvuọvo nyo ota nana re me ta phihọ erhọn wẹn vẹ erhọn rẹ ihwo nana na.

⁸Emraro re karo kẹ wẹ vẹ ovwẹ nẹ ọke awanre rhe mraro buebu rẹ ofovwi, vẹ owẹvwe kugbe ọtiekọ kpahe irhọ buebu je vwọ kpahe ivie ride na.

⁹Yẹ ọmraro rọ mraro rẹ ufuoma, ọke rẹ ota rẹ ọmraro yena de ghine ru gba, ke vughe nẹ Ọrovwohwo ghine ji ọmraro na.

¹⁰Kọye ọmraro Hananaya da reyọ ahwa rẹ urhekpe nẹ ohọre ri Jerimaya rẹ ọmraro na, ọ da guọghọ.

¹¹Ọye Hananaya rẹ ọmraro na da ta vwẹ aro rẹ ihwo ejobi, nẹ, Enẹ Ọrovwohwo tare: Tobọ enẹ me cha guọghọ urhekpe ri Nebukadneza ovie ri Babilọn nẹ ohọre rẹ ẹgborho ejobi vwẹ emu rẹ ikpe ivẹ. Ẹkẹvuọvo Jerimaya ọmraro na de kpo obo rọ ra.

¹²Ọke ọvo ri Hananaya rẹ ọmraro na vwọ guọghọ igoni rẹ urhekpe nẹ ohọre ri Jẹrimaya rẹ ọmraro na nu, ota rẹ Ọrovwohwo ki bru Jerimaya rhe:

¹³Ra ra vuẹ Hananaya, Enẹ Ọrovwohwo tare: Wọ guọghọ ahwa rẹ urhe, ẹkẹvuọvo mi che ru ọrẹ utehru phihọ ẹdia rayen.

¹⁴Kidie enẹ Ọrovwohwo rẹ otuofovwi, Ọghẹnẹ rẹ Izrẹl, tare: Mi phi ahwa rẹ utehru rẹ ọviẹn phihọ ohọre rẹ ẹgborho nana re ayen dia eviẹn ri Nebukadneza ovie ri Babilọn, ayen cha ga, kidie me je kẹ eranvwe rẹ aghwa dede.

¹⁵Oye Jerimaya rẹ ọmraro na da ta kẹ Hananaya rẹ ọmraro na, Kerhọn, Hananaya, Ọrovwohwo ji we-e, wo ru ihwo nana re vwẹ ẹro so ofian.

¹⁶Vwẹ ọtiọye na enẹ Ọrovwohwo tare. Nighe, mi che si we nẹ otọ rẹ akpọ na. Vwẹ ẹgbukpe nana wo che ghwu, fikiridie wo gbe urhi rẹ Ọrovwohwo na ku.

¹⁷Vwẹ ukpe yena, vwẹ emeranvwe righwrẹ Hananaya rẹ ọmraro na de ghwu.