Read urhobo Jerimaya 29 Bible Online

Jerimaya 29 - urhobo bible

Jerimaya 29

¹Enana eta rẹ ọbe ri Jẹrimaya rẹ ọmraro na si nẹ Jerusalẹm rhe ekpako rẹ ighuvwu na, ji rhe irherẹn na, te emraro na, vẹ ihwo na ejobi, ihwo ri Nebukadneza mu ighuvwu nẹ Jerusalẹm kpo Babilọn na.

²Ọnana ọke rẹ Ovie Jekonaya, vẹ oni rẹ ovie, eghwara na, isun ri Juda vi Jerusalẹm, ewena na, kugbe idjogu na vwo nẹ Jerusalẹm nu.

³Elasa ọmọ ri Shefan vẹ Gemaraya ọmọ ri Hilkaya vwẹ obọ rọyen ghwa ọbe na, ihwo ri Zedikaya ovie na ji kpo Babilọn bru Nebukadneza ovie ri Babilọn na. Ọ da tanẹ

⁴Enẹ Ọrovwohwo rẹ otuofovwi, Ọghẹnẹ rẹ Izrẹl, tare, kẹ ighuvwu ejobi ri mi ji nẹ Jerusalẹm vwo kpo imu vwi Babilọn.

⁵Ovwan bọn iwevwi re ovwan dia ayen, voro idju re wa re emu rayen.

⁶Reyọ eya re we vwiẹ emeshare vẹ emetẹ; wa reyọ eya kẹ emeshare rẹ ovwan wa vwẹ emetẹ rẹ ovwan kpo orọnvwe, re ayen vwiẹ emeshare vẹ emetẹ; we bu vwẹ oboyin, wa havwa-a.

⁷Ẹkẹvuọvo wa guọnọ erhuvwu rẹ orere ri mi ji ovwan de kpo ighuvwu na, ovwan mia rẹ Ọrovwohwo kẹ, kidie erhuvwu rọye ovwan de vwo erhuvwu.

⁸Kidie enẹ Ọrovwohwo rẹ otuofovwi, Ọghẹnẹ rẹ Izrẹl, tare. We jẹ emraro vẹ eboepha re hẹ uherevie rẹ ovwan na phiẹ ovwa-an, wa kerhọn rẹ evwerhẹ re ayen vwerhe na-a,

⁹kidie ofian ayen mraro rọye kẹ ovwan vwẹ odẹ mẹ na, mi ji aye-en eriyin Ọrovwohwo tare.

¹⁰Kidie enẹ Ọrovwohwo tare: Ọke rẹ ikpe ujorha gbẹ ihwe da gba vwẹ Babilọn nu, ki mi bru ovwan cha, ri ru ive me gba kẹ ovwan vwọ reyọ ovwan rhivwi rhe asan etinẹ na.

¹¹Kidie me rien iroro ri mi vwo kẹ ovwan, eriyin Ọrovwohwo tare, iroro rẹ erhuvwu ọ dia ọ rẹ umiovwo me cha vwọ kẹ ovwan vwẹ ọke rọ cha vẹ iphiẹrohọ.

¹²Kẹsiẹye we ki se vwe rhe nẹ ẹrhovwo kẹ vwẹ, ki mi nyo ovwan.

¹³Ko wa guọnọ ovwẹ ko wa mrẹ vwẹ vwẹ ọke re wa da vwẹ udu rẹ ovwan guọnọ ovwe.

¹⁴Ovwan ke mrẹ vwẹ, eriyin Ọrovwohwo tare, ke me vwẹ ughwẹ rẹ ovwan rhivwi rhe ovwan ke me ghwe ovwan nẹ ẹgborho vẹ asan re me djẹ ovwan ra ejobi rhe, eriyin Ọrovwohwo tare, me je ghwa ovwan rhivwi nẹ asan ri mi mu ovwan ra kpo ighuvwu na.

¹⁵Fikiridie wa tare nẹ, Ọrovwohwo na vwẹ emraro kẹ avwanre vwi Babilọn —

¹⁶Enẹ Ọrovwohwo ta kpahe ovie ro tidia ekete ri Devid, je kpahe ihwo ejobi re dia orere nana, imoni re ovwan re mu nene ovwan kpo imu na-a.

¹⁷Enẹ Ọrovwohwo rẹ otuofovwi tare, Nighe, me cha vwẹ ọlọkọ vẹ owẹvwe kugbe ọtiekọ mu ayen, ji ru ayen kerẹ orharhe ri fig ro miovwiri rẹ ọ gbe ja re-e.

¹⁸Ọlọkọ vẹ owẹvwe, kugbe ọtiekọ mi che vwo nene ayen, mi mi rhi ru ayen phiyọ imuoshọ kẹ ivie rẹ akpo na ejobi, re ayen vwọ dia ekan, osho, unuefiọn, vẹ ehwẹjẹ vwẹ uherevie rẹ irere ejobi re me djẹ ayen na.

¹⁹Fikiridie ayen davwẹ erhọn rẹ eta mẹ na-a ri mu jẹ idibo mẹ rẹ emraro na nẹ e ra ta kẹ ayen kẹsiẹ kẹsiẹ, eriyin Ọrovwohwo tare, ẹkẹvuọvo wa cha kerhọ-ọn, eriyin Ọrovwohwo tare.

²⁰Gbe nyo ota rẹ Ọrovwohwo, ovwan ighuvwu na ejobi ri mi ji nẹ Jerusalẹm vwo kpo imu vwi Babilọn na:

²¹Enẹ Ọrovwohwo rẹ otuofovwi, Ọghẹnẹ rẹ Izrẹl, tare, kpahe Ehab ọmo ri Kolaya vẹ Zedikaya ọmọ ri Masaya, rẹ mraro rẹ efian kẹ ovwan vwẹ odẹ mẹ nighe, me cha reyọ ayen vwọ kpo obọ ri Nebukadreza ovie ri Babilọn, ọ che hwe ayen ghwẹ vwẹ irharo wẹn.

²²Fikiridie ayen ighuvwu re muru nẹ Juda kpo Babilọn na a cha vwẹ ekan nana harhe ayen, Ọrovwohwo ru ovwan kerẹ Zedikaya vẹ Ehab, e rẹ ovie ri Babilọn torhẹre vwẹ erhanre na,

²³fikiridie ayen ru uruemu rẹ ẹkpa vwẹ Izrẹl ayen vẹ eya rẹ irivẹ rayen gbe ọfanrhiẹn, ayen da vwẹ odẹ mẹ ta eta rẹ efian re me vuẹ ayen nẹ ayen ta-a. Mẹvwẹ ohwo rọ riẹnre, mẹvwẹ je he oseri, eriyin Ọrovwohwo tare.

²⁴Shemaya ri Nehelam wọ cha ta kẹ nẹ:

²⁵Enẹ Ọrovwohwo rẹ otuofovwi, Ọghẹnẹ rẹ Izrẹl tare; Wọ vwẹ odẹ wẹn si ọbe rhe ihwo ejobi re hẹ obo Jerusalẹm, ji vwo rhe Zefanaya ọmọ ri Masaya orherẹn na, kugbe irherẹn na ejobi, ta nẹ,

²⁶Ọrovwohwo na vwo vwẹ mu orherẹn vwẹ ẹdia rẹ Jehoiada rẹ orherẹn na, wo vwo mu vwẹ uwevwi rẹ Ọrovwohwo na vwe enu rẹ ọrhuẹ kọrhuẹ rọ mraro ejobi, re wọ vwẹ igoni vẹ ọghrọrọ gba.

²⁷Die sorọ wọ gbe ghwọ ku Jerimaya rẹ Anatọt rọ mraro kẹ wẹ na-a?

²⁸Kidie ọ vue ovuẹ rhe avwanre vwi Babilọn, ta nẹ, Ovwan ighuvwu na cha dia kre kri, bọn uwevwi re wa dia ayen, voro udju re wa re emamọ rayen.

²⁹Zefanaya rẹ orherẹn na de se ọbe nana kẹ Jerimaya rẹ ọmraro na nyo.

³⁰Kẹsiẹye ota rẹ Ọrovwohwo ki bru Jerimaya rhe.

³¹Vuẹ ovuẹ rhe ighuvwu na, ta nẹ, Enẹ Ọrovwohwo ta kpahe Shemaya ri Nehelam: Fiki rẹ obo ri Shemaya vwọ mraro yi mi ji ro-o na, ro vwo ru ovwan vwọ vwẹ ẹro so ofian na,

³²otiọye na enẹ Ọrovwohwo tare. Nighe, Mi che ru Shemaya ri Nehelam vẹ uvwiẹ rọye gangan, o gbi che vwo ohwo rọ dia uherevie rẹ ihwo nana rọ mrẹ emu esiri ri mi che ru kẹ ihwo mẹ na-a, eriyin Ọrovwohwo na tare, kidie ọ ta ota omiomiovwi kpahe Ọrovwohwo na.