Read urhobo Jerimaya 31 Bible Online

Jerimaya 31 - urhobo bible

Jerimaya 31

¹Vwẹ ọke yena, eriyin Ọrovwohwo tare, ke me cha dia Ọghẹnẹ rẹ uvwiẹ rẹ Izrẹl ejobi, ayen ke cha dia ihwo mẹ.

²Enẹ Ọrovwohwo tare: Ihwo re vabọ rẹ ọlọkọ ke mrẹ ẹserọphẹ vwẹ aghwa; vwẹ ọke rẹ Izrẹl vwọ guọnọ omerovwo,

³Ọrovwohwo da vwẹ oma nẹ vwẹ ogboko. Ẹguọnọ ro jẹrhẹriẹ ri bẹdẹ bẹdẹ me vwọ guọnọ owẹ, ọtioye na uyota mẹ je herọ kẹ wẹ.

⁴Me je rhọma bọn wẹ, ka je bọn wẹ, E ọmọtobẹ Izrẹl! Wọ cha rhoma vwẹ eshẹghẹshẹghẹ rhuẹrẹ oma wẹn, wọ cha ro ehegbe rẹ otu re ghọghọ.

⁵Wọ cha rhoma kọn ogba ri vain vwẹ enu rẹ igbenu ri Samaria, ekekankọn cha kọn, ayen cha re emamọ na.

⁶Kidie ẹdẹ hero rẹ erhẹrotọ che vwo se vwẹ orere rẹ ugbenu rẹ Ifrem: Vrẹn, re e yeri kpo Zayọn, bru Ọrovwohwo Ọghẹnẹ rẹ avwanre.

⁷Kidie enẹ Ọrovwohwo tare: vwẹ ọmavwerhovwẹ so une gangan fiki ri Jekọp, je kpare edo do fiki rẹ olori rẹ irere na; ghwoghwo jiro wọ tanẹ, Ọrovwohwo sivwi ihwo rọye nure, iri ghwu chekọ vwẹ Izrẹl.

⁸Nighe, me cha reyọ ayen nẹ orho rẹ obọhwerẹ ọnre rhe, koko ayen nẹ oboshesheri rẹ akpọ rhe, irhuẹro vẹ ikpono dia ohri rayen, aye vẹ ọmọ kugbe ọ rọ chuẹ uvwiẹ gbe koko; usun rode na, ayen che rhivwi rhe etinẹ.

⁹Ayen che rhivwi cha, vẹ oviẹ ji kugbe uchebro mi vwo sun ayen rhivwi. Mi che ru ayen yan vwẹ orhoma rẹ ame, vwẹ idjerhe ọphiọnphiọn rẹ ayen de je she, kidie mẹvwẹ ọse kẹ Izrẹl, Ifrem ji ọmọkpako mẹ.

¹⁰Nyo ota rẹ Ọrovwohwo, E ẹgborho na, rere wo ghwoghwo vwẹ erhuru rẹ obo ogboko na, ta nẹ, Ọ rọ hra Izrẹl na ji che koko, ọ je cha sẹro rọye kirobo rẹ osuigegede sẹro rẹ igegede rọye.

¹¹Kidie Ọrovwohwo tan Jekọp nure, ọ je tan nẹ abọ rẹ ọ rọ gan nọ.

¹²Ayen cha rhe rhe so une gangan vwẹ ugbenu ri Zayọn, kẹ ayen ghọghọ vwẹ erhuvwu rẹ Ọrovwohwo; vwẹ enu rẹ eka, tẹ wain tẹ evwri, ji te enu rẹ emọ rẹ igegede vẹ uchuru, eyere rayen cha họhọ ogba re ku ame ku, oma gbe rhọ ayen ọfa-a.

¹³Kẹsiẹye emete na ke cha ghọghọ vwẹ ehegbe, oma je cha vwerhe imighene re eshare vẹ ekpako na. Me rhẹriẹ uvweri rayen phihọ aghọghọ, me sasa ayen oma, ukpe rẹ uvweri ke me kẹ ayen omavwerhovwẹ.

¹⁴Ke me vwẹ emu esiri buebu vwọ ghẹrẹ ẹnwẹn rẹ irherẹn na, erhuvwu mẹ cha vọn ihwo mẹ evun, eriyin Ọrovwohwo tare.

¹⁵Enẹ Ọrovwohwo tare: E nyo urhuru vwi Rama, unuebo vẹ oviẹ ọgangan, Rechẹl herọ viẹ kẹ emọ rọye; ọ siẹn uchebrọ fiki rẹ emọ rọye na, fikiridie ayen gbe herọ-ọ.

¹⁶Enẹ Ọrovwohwo tare: Si urhuru wẹn nẹ oviẹ, ji si ero wẹn nẹ ame oviẹ, kidie a cha hwa osa fiki rẹ iruo wẹn, eriyin Ọrovwohwo tare, ayen che rhivwi nẹ otọ rẹ ọvweghrẹ na cha.

¹⁷Iphiẹrohọ herọ kẹ we vwẹ obaro, eriyin Ọrovwohwo tare, emọ wẹn ji che rhivwi rhe orho rayen.

¹⁸Mi nyo Ifrem rọ herọ viẹ, We re fa vwẹ, a da je fa vwẹ, kerẹ ọmọ rẹ erhuẹn re je yono; reyọ ovwẹ rhivwi rere a reyọ ovwọ, kidie wẹ hẹ Ọrovwohwo Ọghẹnẹ mẹ.

¹⁹Kidie me vwo beghe ghwru nu, mi de kurhẹriẹ; re vwo yono uvwe nu, me da teye ekpoghowọ mẹ, oma vo vwẹ, mi de kpogho, fikiridie me ghwa omaẹvuọ rẹ emeghene mẹ.

²⁰Ifrem ọmọ ọghaghare mẹ na? Ọmọ rọ je vwe o ruẹ? Kidie ọke kọke me da ta ota kpahọ ejobi ye me je karọ phihọ Eriyin na udu mẹ kọ viẹ kpahọ; omuẹro mi che ni aruẹdọ roye, eriyin Ọrovwohwo tare.

²¹Ka eka phihọ idjerhe kẹ oma wẹn, ru obo ri sun we kẹ oma wẹn; nabọ roro idjerhe rode na, idjerhe wọ wan yaran na. Rhivwi, E ọmọtobẹ rẹ Izrẹl, rhivwi rhe irere wẹn nana.

²²Mavọ wo sioma uko krite, E ọmọtẹ rẹ o mudiagaa na? Kidie Ọrovwohwo ma emu ọkpokpọ vwẹ akpọ na, aye esivwo kẹ ọshare.

²³Enẹ Ọrovwohwo rẹ otuofovwi na tare, Ọghẹnẹ rẹ Izrẹl: Ayen cha rhoma ta eta nana vwẹ otọ ri Juda vẹ irere rọye ọke re me da vwẹ oyovwe rayen rhe nu: Ọrovwohwo bruba kẹ wẹ, E ẹdia rẹ ọvwata, E ugbenu ọfuanfọn!

²⁴Juda vẹ irere ejobi ke gba dia etiyin kugbe, te eghwẹrẹ vẹ ayen otu re vẹ igegede rayen gbe ghoro.

²⁵Kidie mi che ru ẹnwẹn rẹ oma rhọ gan, me cha rhọvwọ, ẹnwẹn kẹnwẹn rẹ oma rhọ.

²⁶Koyire me da rhọvwọ mi vwọ no, ovwerhẹ me da miẹmiẹ ovwẹ.

²⁷Nighe, ẹdẹ cha, eriyin Ọrovwohwo tare, re me cha vwẹ omamọ rẹ ohwo vẹ eranvwe vwọ kọn uwevwi rẹ Izrẹl vẹ uwevwi ri Juda.

²⁸O de rhi te re kirobo me rhẹrẹ ayen vwọ kọrọ ayen vwẹ ayen ghwiọtọ na, vwọ gere ayen she, vwọ ghwọrọ ayen, vwọ ghwẹ umiovwo rhe ayen na, ọtiọye me je cha rhẹrẹ ayen mu ayen vi kọn ayen, eriyin Ọrovwohwo tare.

²⁹Ayen gbe ta vwẹ ẹdẹ yena ọfa-a: Ese na rare otiẹ ekianke ako ke ghẹnghẹn emọ na.

³⁰Ekevuọvo dohwo dumwemwu rọye ri gbe ghwu phihọ ohwo ọvuọvo rọ rare otiẹ ekianke, ako ke ghẹnghẹn.

³¹Nighe, ẹdẹ na che te eriyin Ọrovwohwo tare, ri mi che vwo nene uwevwi rẹ Izrẹl vẹ uwevwi ri Juda re ọphọ ọkpokpọ.

³²Ọ dia oghẹre rẹ ọphọ re me vẹ esẹ rayen rere vwẹ ọke me vwọ vwẹ obọ tẹtẹ ayen nẹ otọ rẹ Ijipt rhe na-a, ọphọ mẹ yena ayen miovwiro, dede na me je dia ọshare kẹ ayen vwẹ ọke yena, eriyin Ọrovwohwo na tare.

³³Ẹkẹvuọvo ọnana hẹ ọphọ re me vẹ uwevwi rẹ Izrẹl cha re, ọke yena da wan nu, eriyin Ọrovwohwo tare: Ki mi che phi urhi mẹ phihọ evun rayen, mi ji che siọ phihọ udu rayen; ke me dia Ọghẹnẹ rayen, ayen ke dia ihwo mẹ.

³⁴Ohwo rhe se yọnọ ọrivẹ eyẹ omoni rọye ọfa-a, nẹ, Riẹn Ọrovwohwo na, kidie ayen ejobi cha riẹn vwẹ, nẹ otete rayen re te ọrode rayen, eriyin Ọrovwohwo tare, kidie me cha vwẹ orukuruku rayen vrẹn ayen, me gbe cha karohọ umwemwu rayen ọfa-a.

³⁵Enẹ Ọrovwohwo na tare, ọ rọ ma ọnre ra vwọ mrorẹ vwẹ uvo, ọ da gbẹn idjerhe kẹ emeranvwe vẹ isiọ re dia urhukpẹ kẹ ason. Ọ rọ kpare ame rẹ urhie rọ da sẹghẹ; Ọrovwohwo rẹ otuofovwi ọye hẹ odẹ rọye.

³⁶Emama nana de se re otọ, eriyin Ọrovwohwo na tare, kẹsiẹye uvwie re Izrẹl ki se fue rọ de jẹ ẹgborho ẹdia vwẹ obaro mẹ bẹdẹ.

³⁷Enẹ Ọrovwohwo na tare: A da sa vwanvwẹ idjuvwu rẹ enu na, ya je sa guọnọ uchivwo rẹ obotọ rẹ akpọ na phia, kẹsiẹye mi ki che ku uvwiẹ rẹ Izrẹl fia vwi fiki rẹ obo rẹ ayen ruru, eriyin Ọrovwohwo tare.

³⁸Nighe, ẹdẹ cha, eriyin Ọrovwohwo na tare, ra cha vwọ rhuẹrẹ orho na bọn kẹ Ọrovwohwo nẹ uwevwi rẹ ohẹrhẹ ri Hananẹl re te Unurhoro rẹ Akakọ na.

³⁹Urhiẹ rẹ ẹvwanvwọn na ko gro kpo obaro, phiọnphiọn re te ugbenu ri Garẹb, kẹsiẹye ọ ke gere kpo Goa.

⁴⁰Iyara rẹ irivwi na ejobi vẹ iwurhie na, kugbe idju na ejobi rhiri re te uto ri Kidrọn, te akakọ rẹ Unurhoro rẹ Iyesi na ro ni obaro ọnre na, cha dia fuanfọn kẹ Ọrovwohwo. E gbi che ghwie ọfa-a e gbi ji kuo kufia bẹdẹ-ẹ.