Read urhobo Jerimaya 33 Bible Online

Jerimaya 33 - urhobo bible

Jerimaya 33

¹Ota rẹ Ọrovwohwo na da rhoma bru Jerimaya rhe vwẹ obọ rivẹ, yọ je hẹ uwodi vwẹ ọguan rẹ ohẹrhẹ.

²Enẹ Ọrovwohwo rọ ma akpọ na tare, Ọrovwohwo ro farọ ro vwiro mu — Ọrovwohwo hẹ odẹ rọye,

³se vwe ki mi nyo kẹ wẹn, ke me ta imu ride re djahere na kẹ wẹ e rẹ wọ je riẹn devo-o.

⁴Kidie enẹ Ọrovwohwo na, Ọghẹnẹ rẹ Izrẹl tare kpahe iwevwi rẹ orho nana vẹ iwevwi rẹ lvie ri Juda re kporo she ra vwo gba ogba hẹrhẹ imu vẹ ọlọkọ.

⁵Ihwo ri Kaldia na cha ohọnre ayen me rhe vwẹ irivwi rẹ eshare ri mi che hwe vwẹ ophu vẹ ivuemiovwo mẹ vọn ayen; kidie mi si opharo mẹ nu kẹ orho nana vwi fiki rẹ umwemwu rayen.

⁶Nighe, me cha vwẹ omakpokpọ vẹ esivwo rhe ki mi sivwi ayen ke me vwẹ oyovwe buebu vẹ ofuvwegbe mẹ phia kẹ ayen.

⁷Me cha vwẹ oyovwe ri Juda vẹ oyovwe rẹ Izrẹl rhivwi rhe ayen, ke me rhoma bọn ayen kirobo rẹ ayen epha vwẹ ẹsosuọ.

⁸Ke me cha hworhẹ ayen nẹ abe rẹ umwemwu rẹ ayen ru kpahe ovwẹ na, ke me vwẹ abe rayen vẹ omẹriọ rayen ghovwo ayen.

⁹O nana kọ dia odẹ rẹ aghọghọ kẹ vwẹ, kugbe ejiro vẹ urinrin vwẹ obaro rẹ irere rẹ akpo na ri che nyo erhuvwu ri mi che ru kẹ ayen, oshọ ko mu ayen rẹ ayen de kpogho vwi fiki rẹ erhuvwu vẹ oyovwe ejobi re me rhuẹrẹ hẹrhẹ na.

¹⁰Enẹ Ọrovwohwo tare. Etinẹ na re wa ta nẹ, o fefe ohwo herọ-ọ eyẹ kẹ eranvwe-e, vwe irere ri Juda vẹ irhuvwu ri Jerusalẹm ra kua fiotọ na, ri vwo ohwo-o eyẹ ohwo rọ dia-a eyẹ kẹ eranvwe-e,

¹¹a cha rhoma nyo urhuru rẹ ehwẹ vẹ omavwerhovwẹ, urhuru rẹ ọshare rẹ ọpha vẹ urhuru rẹ ọpha, urhuru rẹ otu re so une, re ayen da ghwẹ ẹkpẹvwẹ cha uwevwi rẹ Ọrovwohwo na. Vwẹ ẹkpẹvwẹ kẹ Ọrovwohwo rẹ otuofovwi na, kidie Ọrovwohwo na yovwiri kidie ẹguọnọ rọye ro jẹrhẹriẹ na dia bẹdẹ! kidie me cha vwẹ oyovwe rẹ otọ na rhivwi rhe kerẹ ọ rẹ ẹsọsuọ, eriyin Ọrovwohwo tare.

¹²Kidie enẹ Ọrovwohwo rẹ otuofovwi tare: Vwẹ etinẹ rẹ ofefe na, rẹ ohwo eyẹ eranvwe epha-a na, vwẹ evun rẹ irere rọye ejobi na, kọ rhoma dia asan rẹ isuigegede da vwẹ igegede rayen kpo oma erovwo.

¹³Vwẹ irere rẹ obenu rẹ ugbenu na, vwẹ irere ri Shefela na, vẹ evun rẹ irere ri Nẹgẹb na, vwẹ otọ ri Benjamin na, vwẹ asan rẹ yariẹ Jerusalẹm, kugbe evun rẹ irere ri Juda, igegede je cha rhoma yan nẹ obọ rẹ ohwo ro kere ayen, eriyin Ọrovwohwo tare.

¹⁴Nighe, ẹdẹ cha, eriyin Ọrovwohwo tare ri mi che vwo ru ive mẹ gba kẹ uwevwi rẹ Izrẹl vẹ uwevwi ri Juda.

¹⁵Vwẹ ẹdẹ yena kugbe ọke yena ki mi che ru re Oghọn rẹ ọvwata vwo yoro phia kẹ Devid, kọ bru orhiẹn rẹ esiri vẹ ọ rẹ ọvwata vwẹ otọ na.

¹⁶Vwẹ ẹdẹ yena Juda kọ rhọ Jerusalẹm kọ dia vwẹ egbẹrhẹnẹdẹ. Kẹ ọ na odẹ re che vwo se, Ọrovwohwo na ọvwata rẹ avwanre.

¹⁷Kidie enẹ Ọrovwohwo tare ohwo ro tidia ekete rẹ uwevwi rẹ Izrẹl gbe kare Devid bẹdẹ-ẹ.

¹⁸Irherẹn ri Livae re torhẹ izobo rẹ ẹtorhẹ, re torhẹ izobo rẹ oka, kugbe i ri ze izobo, gbe sa kare vwẹ obaro mẹ bẹdẹ-ẹ.

¹⁹Ota rẹ Ọrovwohwo de bru Jerimaya rhe:

²⁰Enẹ Ọrovwohwo tare, Ọ da dianẹ wo se miovwi ọphọ re me vẹ uvo gba re kugbe ọphọ re mẹ vẹ ason gba re, rẹ uvo vẹ ason gbe phia vwẹ ọke re bruphihọ kẹ aye-en,

²¹kẹsiẹye e ki miovwo ọphọ me ri mi nene Devid rẹ odibo mẹ re na, ro ki jẹ ọmọ ro tidia ekete rọye evwo, kugbe ọphọ mẹ re me vẹ irherẹn mẹ emọ ri Livae ri gbe odibo kẹ vwẹ na.

²²Kirobo re se keri otuofovwi rẹ obo odjuvwu na-a ra je sa vwavwẹ ubu rẹ abadi na-a na, ọtiọye mi che ru uvwiẹ ri Devid odibo mẹ buẹ phihọ, kugbe irherẹn ri Livae ri gbe odibo kẹ vwẹ na.

²³Ota rẹ Ọrovwohwo de bru Jerimaya rhe.

²⁴Wọ nabo ni obo rẹ ihwo nana ta na mu, Ọrovwohwo siẹn erua ivẹ rọ sanọre na? Ọtiọna ayen jẹn ihwo mẹ fia rere ayen vwo jẹn ẹgborho ẹdia vwẹ obaro rayen ọfa.

²⁵Enẹ Ọrovwohwo tare. Ọ dianẹ me rha vwẹ ọphọ mẹ mu kẹ uvo vẹ ason ji kugbe ekuakua rẹ obo odjuvwu vẹ akpọ-ọ,

²⁶kẹsiẹye me ke siẹn uvwie ri Jekọp vẹ Devid odibo mẹ mia rha sanọ ọvo vwẹ emọ rọye na nẹ ọ re uvie vwẹ enu rẹ uvwiẹ rẹ Ebraham, Aizik, vẹ Jekọp ofa-a. Kidie me cha vwẹ oyovwe rayen rhivwi rhe ki mi ji che ni arodọvwẹ rayen.