Read urhobo Jerimaya 35 Bible Online

Jerimaya 35 - urhobo bible

Jerimaya 35

¹Ota rọ nẹ obọ rẹ Ọrovwohwo bru Jerimaya rhe vwẹ ẹdẹ ri Jehoiakim ọmọ ri Josaya ovie ri Juda.

²Yan kpo uwevwi rẹ ihwo ri Rekah na re wo nene ayen ta ota, re wọ reyọ ayen rhe uwevwi rẹ Ọrovwohwo na, vwo rhe ovọ vwe ivun na, wọ ke ayen wain da.

³Eriyin na me da reyọ Jazanaya, ọmọ ri Jerimaya rẹ ọmọ ri Habazinaya, vẹ iniọvo rọye, kugbe emọ rọye ejobi vẹ uwevwi rẹ ihwo ri Rekab na ejobi.

⁴Me da reyọ ayen rhe uwevwi rẹ Ọrovwohwo na. Me davwẹ ayen kpo uvun rẹ emọ ri Hanan ọmọ rẹ Igdalaya, ohwo rẹ Ọghẹnẹ na, rọ kẹrẹ uvun rẹ isun na, vwẹ enu rẹ uvun ri Maeseya ọmọ ri Shalum, rọ rhẹrẹ unurhoro na.

⁵Mi ki mu echẹ ri wain re vọnre na phihọ ọbaro rẹ ihwo ri Rekah, vẹ iko, me da ta kẹ ayen, Wa da wain.

⁶Ẹkẹvuọvo ayen ke kpahe, Avwanre da wain kakaka-a, kidie Jonadab ọmọ ri Rekab, rẹ ọse rẹ avwanre jẹ urhi kẹ avwame nẹ, Wa da wain-i, wa da-a ovwan vẹ emọ rẹ ovwan je da bẹdẹ-ẹ.

⁷Ovwan bọn uwevwi-i; wa kọn emamọ-ọ; wa kọ-ọn siẹvọ ki vwo ogba ri vain-i, ẹkẹvuọvo itughe wa dia vwẹ ẹdẹ rẹ akpo rẹ ovwan ejobi, rere wa vwọ mrasan tọn vwẹ otọ rẹ wa ra na.

⁸Me de nyo urhuru ri Jonadab ọmọ ri Rekab rẹ ọse rẹ avwanre vwẹ obo ro ji urhi kẹ avwanre ejobi, re vwo ji wain ẹda vwẹ ẹdẹ rẹ akpọ re avwanre ejobi, eya rẹ avwanre, emeshare rẹ avwanre, eyẹ emetẹ rẹ avwanre.

⁹Nẹ ma bọn iwevwi dia-a, me vwo ogba ri vain eyẹ udju eyẹrẹ kọn emamọ-ọ;

¹⁰ẹkẹvuọvo itughẹ keye ma dia, avwanre de mu ọghọ kẹ urhi nana vwo ru emu ejobi ri Jonadab ọsẹ rẹ avwanre ji urhi rọye kẹ avwanre.

¹¹Ẹkẹvuọvo ọke rẹ Nebukadreza ovie ri Babilọn vwọ rhe rhi mu kpahe otọ nana re, ma da ta, Wa mọ, ra yanran kpo Jerusalẹm fiki rẹ oshọ rẹ unuofovwi rẹ ihwo ri Kaldia vẹ unuofovwi rẹ ihwo ri Siria na. Kọye ma vwọ dia Jerusalẹm na.

¹²Kẹsiẹye ota rẹ Ọrovwohwo na ki bru Jẹrimaya rhe:

¹³Enẹ Ọrovwohwo rẹ otuofovwi, Ọghẹnẹ rẹ Izrẹl na tare: Yanran ra ta kẹ eshare ri Juda vẹ ihwo re dia Jerusalẹm, Wa reyọ uyono re wa kerhọn rẹ eta mẹ? Eriyin Ọrovwohwo tare.

¹⁴Urhi ri Jonadab ọmọ ri Rekab vwọ kẹ emọ rọye, nẹ ayen da waini-i, ayen yonrọn; ayen dare rhi te none na-a, kidie ayen yọnron urhi rẹ ọsẹ rayen, mi dje ovwan ẹtẹta kẹ, ẹkẹvuọvo wa kerhọn mẹ-ẹ.

¹⁵Mi ji idibo mẹ rẹ emraro na ejobi bru ovwan rhe, mi ji ayen ejojo, nẹ, Dohwo didjerhe umwemwu rọye rhẹriẹ ru, wa rhuẹrẹ eyere rẹ ovwan, vwo je edjọ efa ẹyan nene re we jẹn ayen egọ, re wa sa dia evun rẹ otọ re me kẹ ovwan vẹ esẹ rẹ ovwan na. Ẹkẹvuọvo wa vwẹ erhọn kpọtọ-ọ wa je kerhọn mẹ-ẹ.

¹⁶Emọ ri Jonadab rẹ ọmọ ri Rekab yọnrọn urhi rẹ ọsẹ rayen vwọ kẹ ayen ẹkẹvuọvo ihwo nana nyo vwe-e.

¹⁷Vwẹ ọtiọye na, enẹ Ọrovwohwo Ọghẹnẹ rẹ otuofovwi, Ọghẹnẹ rẹ Izrẹl na tare: Nighe, me cha ghwa umiovwo rhurhu Juda vẹ ihwo ri Jerusalẹm ejobi, umiovwo re me ta kpahe ayen jovwe na, fikiridie me ta kẹ ayen yẹ ayen kerhọ-ọn mi se ayen yẹ ayen nyori-i.

¹⁸Ẹkẹvuọvo Jẹrimaya da ta kẹ uwevwi rẹ ihwo ri Rekab, Enẹ Ọrovwohwo rẹ otuofovwi, Ọghẹnẹ rẹ Izrẹl tare: Fikirobo we vwo nyo iji ri Jonadab ọsẹ rẹ ovwan, vwọ yọnron irhi roye ejobi re ayen de ru obo re ji iji rọye kẹ ovwan ejobi na,

¹⁹ọtiọye na enẹ Ọrovwohwo rẹ otuofovwi, Ọghẹnẹ rẹ Izrẹl na tare: Ohwo ro mudia vwẹ obaro me gbe sa kare Jonadab rẹ ọmọ ri Rekah bẹdẹ-ẹ.