Read urhobo Jerimaya 36 Bible Online

Jerimaya 36 - urhobo bible

Jerimaya 36

¹Vwẹ ukpe rẹ ẹne ri Jehoiakim ọmọ ri Josaya ovie ri Juda na, ota nana de nẹ obọ rẹ Ọrovwohwo bru Jerimaya rhe:

²Reyọ ekpirhi rẹ ọbe wo si eta re me ta kẹ wẹ kpahe Izrẹl vẹ Juda vẹ irere na ejobi phihọ, nẹ ẹdẹ re me vwọ ta ota kẹ we na, nẹ ẹdẹ ri Josaya rhi te ẹdẹ ri none na.

³Siẹvo uwevwi ri Juda mi rhi nyo umiovwo mi roro kpahọ ri mi che ru ayen na, re ayen dohwo didjerhe umwemwu rọye da rhẹriẹ nu, me da vwẹ orukuruku vẹ imwemwu rayen ghovwo ayen.

⁴Jerimaya ki se Barọk ọmọ ri Neraya, Barọk de si eta rẹ Ọrovwohwo rọ ta kẹ Jerimaya na ejobi phihọ ekpirhi rẹ ọbe na vwẹ ọke ri Jerimaya vwo se ayen kẹ.

⁵Jerimaya de ji iji kẹ Barọk, tanẹ: A da vwẹ ji nẹ mi kpo uwevwi rẹ Ọrovwohwo-o.

⁶Ọtiọye na gba ra, vwẹ ẹdẹ rẹ owẹvwe echiro na wo se eta rẹ Ọrovwohwo ru wo si phihọ ọbe ri mi se kẹ wẹ na kẹ ihwo na nyo vwẹ uwevwi rẹ Ọrovwohwo na. Wo ji se ayen kẹ eshare ri Juda ri nẹ irere rayen rhe re ayen nyo ayen rhe.

⁷Siẹvo ye orẹ rayen che kpo obaro rẹ Ọrovwohwo, nẹ dohwo didjerhe umwemwu rọye cha rhẹriẹ nu, kidie ophu vẹ ivuemiovwo rẹ Ọrovwohwo ro roro kpahe ihwo nana rhoro gangan.

⁸Ọye Barọk ọmọ ri Nẹraya de ru obo ri Jerimaya rẹ omraro na ta kẹ nẹ o se eta rẹ Ọrovwohwo na nẹ ọbe rhe vwẹ uwevwi rẹ Ọrovwohwo na.

⁹Ukpe riyori ri Jehoiakim ọmọ ri Josaya, ovie ri Juda, vwẹ emeranvwe rihiri ihwo rẹ Jerusalẹm ejobi vẹ ihwo ri nẹ irere ri Juda rhe Jerusalẹm ejobi de ghwoghwu owẹvwe echiro vwẹ obaro rẹ Ọrovwohwo.

¹⁰Kẹsiẹye, Barọk ki se eta ri Jerimaya nẹ ọbe na rhe kẹ ihwo na ejobi nyo, vwẹ evun rẹ uwevwi rẹ Ọrovwohwo na, vwẹ uvun rẹ Gemaraya ọmọ ri Shefan osiẹbe na, rọ hẹ ọguan ro kpenu na, vwẹ ewan ruọ rẹ Anurhoro ọkpokpọ rẹ uwevwi rẹ Ọrovwohwo na.

¹¹Ọke rẹ Maikaya ọmọ Gemaraya, ọmọ ri Shefan, vwo nyo eta rẹ Ọrovwohwo ri nẹ ọbe na rhe,

¹²ọ da yanran kpo uwevwi rẹ ovie, ra ruẹ uvun rẹ osiẹbe na, isun na ejobi tidia vwẹ etiyin. Elishama osiẹbe na, Dalaya ọmọ ri Shemaya, Ẹlnatan ọmọ rẹ Akbọ, Gẹmaraya ọmo ri Shefan, Zedikaya ọmọ ri Hananaya, kugbe isun na ejobi.

¹³Maikaya ke vuẹ ayen eta re seri ro nyori na, oke ri Barọk vwo se ọbe na kẹ ihwo na nyo.

¹⁴Ọye isun na ejobi de ji Jehudi ọmọ ri Netamaya, ọmọ ri Shelemaya, ọmọ ri Kushi, ra ta kẹ Barọk, Vwẹ obọ wẹn reyọ ọbe wo se kẹ ihwo na nyo na, wọ yanrhe. Ọtiọye Barọk rẹ ọmọ ri Nẹraya, da vwẹ obọ rọye reyọ obẹ na o de bru ayen ra.

¹⁵Ayen da ta kẹ, Tidia re wo se. Ọtiọye Barọk de se kẹ ayen.

¹⁶Ọkẹ rẹ ayen vwo nyo eta na, ayen da rhẹriẹ oma ni ohwohwo vẹ oshọ, ayen ke ta kẹ Barọk nẹ, Avwanre cha vuẹ ovie eta nana ejobi.

¹⁷Ayen da rhoma nọ Barọk, Vuẹ avwanre, Mavọ wọ ru si eta nana ejobi? Ọye se ayen kẹ wẹ si

¹⁸Barọk da kpahe kẹ ayen, Ọye se eta nana ejobi na kẹ vwẹ, ye me vwẹ ink si ayen phihọ ọbe na

¹⁹Isun na da ta kẹ Barọk, Re sioma nu, we vi Jerimaya, wo jẹn ohwo ọvuọvo riẹn asan rẹ ovwan epha-a.

²⁰Ayen vwo phi ọbe phihọ uvun rẹ Elishama rẹ osiẹbe na nu, ayen da ro ọguan rẹ ovie; ayen da ta eta na ejobi ke ovie

²¹Etiyin ovie de ji Jehudi ra reyọ ọbe na, ọ da reyọ nẹ uvun rẹ Elishama rẹ osiẹbe na rhe; Jehudi de se kẹ ovie vẹ isun na ejobi ri mudia yariẹ ovie phihọ na.

²²Ọke na da dia emeranvwe rirhiri, ye ovie na tidia uwevwi rẹ ohwahwa ye erhanre la vwẹ enyerhanre vwẹ obaro rọye.

²³Jehudi ghwe se urhie erha eyẹ ẹne nu, ovie na da vwẹ aphia bru ayen no phihọ erhanre rọ hẹ enyerhanre na, bẹsiẹ rẹ ọbe na ejobi vwo ton vwẹ evun rẹ erhanre na.

²⁴Yẹ ovie na, vẹ idibo rọye ri nyo eta nana na, djẹ oshọ-ọ, ayen bẹrẹ iwun raye-en.

²⁵Dede na nẹ Elnatan vẹ Delaya kugbe Gemaraya rẹ ovie na nẹ ọ torhẹ ọbe na-a, ye ọ kerhọn raye-en.

²⁶Ovie na de ji iji kẹ Jeramil rẹ ọmọ rẹ ovie na vẹ Seraya ọmọ ri Azriẹl kugbe Shelemaya ọmọ rẹ Abdil ne mu Barọk osiẹbe na vẹ Jẹrimaya rẹ ọmraro na, ẹkẹvuọvo Ọrovwohwo de si ayen nu.

²⁷Kọye re rẹ ovie vwọ torhẹ ọbe na vẹ eta ri Jerimaya se kẹ Barọk si na nu, ota rẹ Ọrovwohwo de bru Jerimaya rhe:

²⁸Reyọ ọbe ọfa re wo si eta rẹ ọbe rẹ ẹsosuọ phihọ, e ri Jehoiakim ovie ri Juda torhẹre na. Ku wọ ta kpahe Jehoiakim ovie ri Juda, Enẹ Ọrovwohwo tare, Die nẹrhe wo si eta re ọbe rẹ ẹsosuọ phihọ, e re Jehoiakim ovie ri Juda tọrhẹre na.

²⁹Ku wọ ta kpahe Jehoiakim ovie ri Juda, Enẹ Ọrovwohwo tare, Die nẹrhe wo si phihọ nẹ ovie ri Babilọn ghine cha rhe ọ me rhe ghwọrọ otọ nana, ro de si ohwo vẹ eranvwe no?

³⁰Ọtiọye na enẹ Ọrovwohwo ta kpahe Jehoiakim ovie ri Juda, O che vwo ohwo ro tidia ekete ri Devid na-a, e che mu orivwi rọye kufia phihọ oheri rẹ uvo vẹ ekpahe rẹ ason.

³¹Ki mi che gboja kẹ, vẹ emọ rọye kugbe idibo rọye gangan fiki rẹ orukuruku rayen, ke me cha ghwa emiovwo mi ghwoghwo kpahe ayen jovwo na phihọ enu rayen, vẹ ihwo re dia Jerusalẹm, te ihwo ri Juda, ẹkẹvuọvo ayen rhọvwe nyo-o.

³²Kẹsiẹye Jerimaya ke reyọ ọbe ọfa vwọ kẹ Barọk rẹ osiẹbe na, ọmọ ri Neraya, ọye si eta na ejobi phihọ ọbe ri Jerimaya se kẹ, eta rẹ ọbe rẹ ẹsosuọ ri Jehoiakim ovie ri Juda torhẹre vwẹ erhanre na, e ji phi eghẹre rẹ eta tiọyẹ na efa ba ayen.