Read urhobo Jerimaya 39 Bible Online

Jerimaya 39 - urhobo bible

Jerimaya 39

¹Vwẹ ẹgbukpe rirhiri ri Zedikaya ovie ri Juda, vwẹ emeranvwe rihwe, Nebukadreza ovie ri Babilọn vẹ unuofovwi rọye ejobi da rhe ri mu kpahe Jerusalẹm o de phio kua,

²vwẹ ẹgbukpe uhwọvo ri Zedikaya, vwẹ emeranvwe rẹne, vwẹ ẹdẹ rirhiri rẹ emeranvwe na, e de bru unu phihọ orere na.

³Ra vwọ reyọ Jerusalẹm nu, isun rẹ ovie ri Babilọn ejobi da rhe ri tidia anurhoro rẹ uherevie: Negalshareza Samganebo, Sasekim ri Rabsa, Negalshareza, ri Rabmag, kugbe isun rẹ ovie ri Babilọn ejobi.

⁴Ọke ri Zedikaya vẹ otu ofovwi na ejobi vwọ mrẹ ayen, ayen da djẹ, nẹ orere na vwẹ ason wan idjerhe rẹ ogba rẹ ovie na rẹ unurhoro rọye hẹ uvwre rẹ igbẹhẹ na; ayen da yan hirhe aro ku obo Araba.

⁵Ẹkẹvuọvo unuofovwi rẹ ihwo ri Kaldia da vwọ tua ayen, ayen da djẹ mu Zedikaya vwẹ uphephẹ ri Jeriko, re ayen vwo muo nu, ayen de vwo rhe Nebukadreza ovie ri Babilọn, vwẹ Ribla, vwẹ otọ ri Hamat, o de brorhie hwe.

⁶Ovie na de hwe emọ ri Zẹdikaya vwẹ irharo rọye, ovie ri Babilọn de ji hwe ikpihwo ri Juda ejobi rhe.

⁷O de phre ibiẹro ri Zẹdikaya no, ọ da vwẹ ejọnrọn gba, ayen de muo kpo Babilọn.

⁸Ihwo ri Kaldia na da torhẹ uwevwi rẹ ovie na vẹ uwevwi rẹ ihwo na, ayen da ghwọrọ igbẹhẹ ri Jerusalẹm totọ.

⁹Etiyin Nebuzaradan, onotu rẹ ohẹrhẹ na, de mu ihwo ri chekọ vwẹ orere na ighuvwu kpo Babilọn, tẹ ihwo re djẹ bro, vẹ ihwo ri chekọ.

¹⁰Nebuzaradan, onotu rẹ ohẹrhẹ na, de jẹn ivwiogbere evu vẹ ihwo ri vwo emuọvo-o vwo vwẹ otọ ri Juda, ọ da kẹ ayen ogba ri vain vẹ idju vwẹ ọke yena.

¹¹Nebukadreza ovie ri Babilọn de ji urhi kẹ Nẹbuzaradan, onotu rẹ ohẹrhẹ na, kpahe Jerimaya nẹ,

¹²Reyọ, nabọ vwẹ ẹro te wọ wan oma-a, ru obo rọ guọnọre.

¹³Eriyin na Nebuzaradan onotu rẹ ohẹrhẹ na, Nebushazdan ri Rabsa, Negalshareza rẹ Rahmag vẹ iruiruo ride rẹ ovie ri Babilọn ejobi,

¹⁴de ji ikọn ra reyọ Jerimaya nẹ ọguan rẹ ohẹrhẹ na rhe. Ayen da vwọ ke Gedalaya ọmọ rẹ Ahikam, ọmọ ri Shafan, re ọ reyọ kpọ. Ọtiọye ọ da dia ohri rẹ ihwo na.

¹⁵Re vwo mu Jerimaya phihọ ọguan rẹ ohẹrhẹ na, ota rẹ Ọrovwohwo de bro rhe,

¹⁶Yanran ta kẹ Ebẹdmẹlẹk rẹ ohwo rẹ Ẹtiopia na, Enẹ Ọrovwohwo rẹ otuofovwi, Ọghẹnẹ rẹ Izrẹl tare: Nighe mi che ru eta re me tare kpahe orere nana gba vwi fiki rẹ umiovwo ọ dia fiki rẹ erhuvwu-u, e che ru ayen gba vwẹ obaro wẹn vwẹ ẹdẹ yena.

¹⁷Ẹkẹvuọvo mi che sivwi we vwẹ ẹdẹ yena, Ọrovwohwo re tarọ, e se phi we phihọ obọ rẹ ihwo re wọ djẹ oshọ rayen na-a.

¹⁸Kidie mi ghine che sivwi uwe rhọ, wo se she ro ọlọkọ-ọ, ẹkẹvuọvo wo che vwo urhuarho wẹn kerẹ osa rẹ ofovwi, fikiridie wọ vwẹ ẹro so vwẹ, eriyin Ọrovwohwo tare.