Read urhobo Jerimaya 4 Bible Online

Jerimaya 4 - urhobo bible

Jerimaya 4

¹Ọ da dianẹ wo kurhẹriẹ, E Izrẹl, eriyin Ọrovwohwo tare, mẹvwẹ wo kurhẹriẹ bru rhe. Ọ da dianẹ wo si ẹgua wẹn nẹ obaro mẹ ru wọ gbe phariẹ-ẹ.

²Wo de duvwu iyori, kirobo rẹ Ọrovwohwo herọ na, vwẹ evun rẹ uyota, vẹ ọsoso kugbe ọvwata, irere na ejobi ki vwo ebruba vwẹ oma rọyen, vwẹ oma rọye kọye ayen de vwo urinrin.

³Kidie enẹ Ọrovwohwo ta kẹ eshare ri Juda kugbe ihwo re dia Jerusalẹm: Voro otọ rẹ udju wẹn na, wọ kọn ekankọn phihọ ohri rẹ inwe-e.

⁴Yanvwẹ oma rẹ ovwan kẹ Ọrovwohwo na, we si ohọrọ rẹ obenu na nẹ udu rẹ ovwan, E eshare ri Juda vẹ ihwo re dia Jerusalẹm; ophu mẹ da rhe torhẹ kerẹ erhanre, ọ da la a sa mrẹ ohwo ro fue-e, fiki rẹ uruemu umwemwu rẹ ovwan na.

⁵Do vwi Juda, wo ghwoghwo vwi Jerusalẹm, tanẹ, Hworo owanre wan otọ na duvwu, kperi gangan tanẹ, Ghwẹ oma koko, wo jẹn avwanre yanran kpo irere ra gba ogba riariẹ na.

⁶Kpare aphiana vwo ni Zayọn, djẹ kẹ arhọ wẹn, wo muẹdia-a kidie me ghwa umiovwo nẹ obọhwẹre ọnre cha kugbe ẹghwọrọ rọde na.

⁷Okpohrokpo nẹ evun rẹ etu rọye rhe, ọghwọrọ rẹ ẹgborho na yan phiare; ọ yan nẹ asan rọye re rere ọ ru otọ rẹ ovwan phihọ ofefe irere rẹ ovwan ke cha dia erhurhu ohwo gbe dia aye-en.

⁸Fiki rẹ ọnana, gba vwẹ esiso rhuo, viẹ beroma; kidie ophu ọtuatua rẹ Ọrovwohwo na ji kurhẹriẹ jẹn avwanre vwo-o.

⁹Vwẹ ẹdẹ yena, eriyin Ọrovwohwo tare, udu che nẹ ovie vẹ isun na awọ, oshọ cha vọn irherẹn oma ro de gbe emraro na unu.

¹⁰Etiyin me da ta, E Ọrovwohwo Ọghẹnẹ, uyota wọ ghene phiẹn ihwo nana kugbe Jerusalẹm reghe, nẹ, O che yovwẹ kẹ ovwan, yẹ ọlọkọ te urhuarhọ rayen nure.

¹¹Ka cha ta kẹ ihwo nana vẹ Jerusalẹm vwẹ ọke yena, Odju ọrhorhorho che nẹ ugbenu phrẹphrẹphrẹ rẹ aton na cha che hirhe aro ku ọmọtẹ rẹ ihwo mẹ, ọ dianẹ re ọ vwọ sanọ eyẹ re o vwo ruo fo-on,

¹²odju rọ vọn nọ ọtiọnana cha rhe fiki mẹ. Mẹvwẹ yi guẹdjọ phihọ ayen uyovwi na.

¹³Nighe, ọ cha kerẹ egho, ẹkpẹrẹ rẹ ofovwi rọye họhọ ogiribo iyesi rọye djẹ phẹre nọ ugo — ekan kẹ avwanre, kidie avwanre ghwọre.

¹⁴E Jerusalẹm, họ oma wẹn nẹ orukuruku rọ hẹ udu wẹn, rere wọ vwọ rhọ. Mavọ iroro umwemwu wẹn dia evun wẹn krite?

¹⁵Kidie urhuru ọvo do nẹ Dan rhe, o de ghwoghwo umiovwo nẹ Ugbenu rẹ Ifrem rhe.

¹⁶Vuẹ egborho na nẹ ọ cha, ghwoghwo kẹ Jerusalẹm, Ihwo ri muẹ imu ri nẹ ugbo oshesheri cha; ayen re bunu kẹ irere ri Juda.

¹⁷Ayen yan riariẹ phihọ kerẹ ihwo re rhẹrẹ aghwa fikiridie o ru vwe chọ , eriyin Ọrovwohwo tarẹ.

¹⁸Idjerhe wẹn kugbe uruemu wẹn re ghwa ọnana bru we rhe na. Ọnana ughwu wẹn, kọ yara, o te ubiudu wẹn nure.

¹⁹Odjadja mẹ odjadja mẹ, me rọ chahe oma vwọ! E, igbẹhẹ rẹ udu mẹ! Udu me ra nwẹn frẹfrẹ; Me gbe sa fọ-ọ; Kidie mi nyo edo rẹ ọgban na, ekpẹrẹ rẹ ofovwi.

²⁰Ẹguọghọ nene ẹguọghọ, otọ na ejobi kọ cha dia ofefe kpregede a teyọ itughẹ mẹ she, ibọkpọ mẹ vwẹ ẹro ẹbrẹ na.

²¹Mavọ me mrẹ aphiana na krite mavọ mi nyo edo rẹ ọgban na krite?

²²Kidie ihwo mẹ ẹkpa, ayen riẹn vwẹ-ẹ; ayen emọ igheghẹ, ayen vwo erianriẹ-ẹn. Ayen riẹn obo re ruẹ umwemwu gangan, ẹkẹvuọvo ayen riẹn ọresiri ruẹ-ẹ.

²³Mi de ni akpọ na, me vwọ mrẹ, kẹ ẹghwọrọ kugbe odiodi mi vwo ni obenu, ayen gbi vwo urhukpẹ-ẹ.

²⁴Mi vwo ni igbenu na, me vwọ mrẹ ayen ki kpogho, igbenu itete na herọ kpo uko kpo aro.

²⁵Mi vwo ni, me da mrẹ nẹ, ohwo gbe herọ-ọ, tephran re hẹ obenu na ejobi rhanre kpae.

²⁶Mi vwo ni, me da mrẹ nẹ, otọ ro yovwe emu na kẹ aton, irere rọye ejobi hirhe phihọ erhurhu vwẹ obaro rẹ Ọrovwohwo vẹ obaro rẹ ophu ọtuatua rọyẹ.

²⁷Kidie enẹ Ọrovwohwo na tare, Otọ na soso cha dia ofefe, ẹkẹvuọvo me cha guọghọ totọ-ọ.

²⁸Fiki rẹ ọnana akpọ na ki che muomahọ, obenu ko che bi, kidie me ta nure, me jẹn iroro nure, mi che dogho obọ-ọ mi ji kurhẹriẹ-ẹ.

²⁹Vwẹ umri rẹ ihwo re gua iyesi vẹ esedada orere korere ejobi ke djẹ, ayen djẹ ro etu, ayen re yere eragha, ayen djẹ jẹn irere ejobi vwo, ohwo gbe dia aye-en.

³⁰E wọwẹ, ra kua jovwo na, Die wo rori ru wọ vwọ vwẹ isene rhuẹrẹ oma re wọ vwọ reyọ iro vwọ sẹ fia, ru wọ vwọ vwẹ itiro si ẹro wẹn? Wọ de rhuẹrẹ oma wẹn ghevweghe. Esen wẹn jẹ wẹ fia, ayen guọnọ owẹ hwe.

³¹Mi nyo oviẹ kerẹ oviẹ rẹ aye rọ chuẹ uvwiẹ, vẹ odjadja kerẹ odjadja rẹ aye vwẹ o tu vwiẹ. Ọnana oviẹ rẹ ọmọtẹ ri Zayọn rẹ ofu dje, ọ riẹn abọ rọye gbagbaragba. Eghwo! mi ro sherua vwẹ obọ rẹ izighẹ ri hwe vwe.