Read urhobo Jerimaya 41 Bible Online

Jerimaya 41 - urhobo bible

Jerimaya 41

¹Vwẹ emeranvwe righwrẹ Ishmẹl ọmọ ri Netanaya, ọmọ rẹ Elishama, ọ rẹ orua rẹ ovie na, ọvo vwẹ oruiruo rode rẹ ovie na vẹ eshare ihwe de bru Gedalaya ọmọ rẹ Ahikam rhe vwẹ obi Mizpa. Rẹ ayen vwọ re emu vwi Mizpa,

²Ishmẹl ọmọ ri Netanaya vẹ ihwo ihwe na de vrẹn vwẹ ọlọkọ nyavwe Gedalaya ọmọ rẹ Ahikam, ọmọ ri Shafan, e de hwe ghwu, ohwo rẹ ovie ri Babilọn vwo mu osun rẹ otọ na.

³Ishmẹl de ji hwe ihwo ri Ju ejobi re vẹ Gedalaya gba obi Mizpa, ji te ihwo re ofovwi ri Kaldia rọ mrẹre vwẹ etiyin.

⁴Ẹdẹ rivẹ ro vwo hwe Gedalaya nu, tavwe rẹ ohwo ke rhe riẹn,

⁵eshare ujọne de nẹ Shikẹm vẹ Shilo kugbe Samaria rhe, vẹ etuegba ra wanre kugbe emwa rẹ hẹre, vẹ oma rayen ri bru era, re ghwa izobo rẹ eka vẹ adjija cha rẹ ayen cha vwọ kẹ okẹ vwẹ obi uwevwi rẹ Ọrovwohwo na.

⁶Etiyin Ishmẹl rẹ ọmọ ri Netanaya de nẹ Mizpa rhe rhe vwa ayen, ọ cha yọ viẹ. Ọ vwọ vwa ayen, ọ da ta kẹ ayen, Wa rọ uwevwi bru Gedalaya ọmọ rẹ Ahikam ra.

⁷Ayen vwo ro evun rẹ orere na, Ishmẹl ọmọ ri Ketanaya vẹ ihwo re vẹ ọye gba herọ na de hwe ayen ghwu, o de mu ayen phihọ evun rẹ orhare ọvo.

⁸Ẹkẹvuọvo eshare ihwe vwẹ usun rayen na da ta kẹ Ishmẹl nẹ, Wo hwe avwanre-e, kidie avwanre vwo erhu rẹ eka, bali, evwri, vẹ ọnyọn re sinu vwẹ obo udju. Eriyin na o rhe hwe ayen kugbe otu raye-en.

⁹Orhare rẹ Ishmẹl mu irivwi rẹ ihwo ro hweri na phihọ da dia orhare rode na rẹ Asa rẹ Ovie na tọnre vwọ choma rọye fiki rẹ Basha ovie re Izrẹl ro kpare ofovwi bro cha; Ishmẹl ọmọ ri Netanaya da ghwẹ otu re hweri na vọn.

¹⁰Kẹsiẹye Ishmẹl ki mu ihwo ri chekọ vwi Mizpa na ejobi ighuvwu, emetẹ rẹ ovie vẹ ihwo ri chekọ vwi Mizpa ejobi, ihwo ri Kehuzaradan, onotu rẹ ohẹrhẹ na, phihọ obọ ri Gedalaya ọmọ re Ahikam. Ishmẹl ọmọ ri Netanaya de mu ayen ighuvwu ọ da vwẹ ayen kpo otọ rẹ ihwo rẹ Ammọn.

¹¹Ẹkẹvuọvo ọke ri Johanan ọmọ ri Karia vẹ isun rẹ ofovwi re vẹ ọye gba herọ vwo nyo umwemwu rẹ Ishmẹl ọmọ ri Netanaya ruru,

¹²ayen da reyọ ihwo rayen ejobi ra họnre Ishmẹl ọmọ ri Netanaya. Ayen da rhe vwa vwẹ ẹtẹrhe rode na vwi Gibiọn.

¹³Ọke rẹ ihwo re vẹ Ishmẹl gba herọ vwọ mrẹ Johanan ọmọ ri Karia vẹ isun rẹ ọfọvwi re vwọ kpahọ, ayen da ghọghọ.

¹⁴Eriyin na ihwo rẹ Ishmẹl muru ighuvwu nẹ Mizpa rhe na da rhoma rhivwi kpo uko, ayen da yan bru Johanan ọmọ ri Karia.

¹⁵Ẹkẹvuọvo Ishmẹl ọmọ ri Netanaya vẹ ihwo ẹrenre djẹ va Johanan abo ayen da yan bru ihwo rẹ Ammọn.

¹⁶Ọye ri Johanan ọmọ ri Karia vẹ isun re ofovwi na ejobi da reyọ ihwo ri chekọ na ejobi rẹ Ishmẹl ọmọ ri Netanaya muru ighuvwu nẹ Mizpa rhe ro hwe Gedalaya ọmọ rẹ Alukam nu na — otu rẹ ofovwi, eya, imitete, vẹ eghwara, Johanan da reyọ ayen nẹ Gibiọn rhe.

¹⁷Ayen da yanran ra dia Gerut Chimham rọ kẹrẹ Bẹtlẹhẹm, ayen ki roro nẹ ayen yan kpo Ijipt.

¹⁸Fikirẹ ihwo ri Kaldia, kidie ayen djẹ oshọ rayen, fikiridie Ishmẹl ọmọ ri Netanaya hwe Gedalaya ọmọ rẹ Ahikam, ohwo rẹ ovie ri Babilọn vwo mu osun rẹ otọ na.