Read urhobo Jerimaya 51 Bible Online

Jerimaya 51 - urhobo bible

Jerimaya 51

¹Enẹ Ọrovwohwo tare: Nighe, me cha kpare erhi rẹ oghwọrọ ọvo vwọ kpahe Babilọn, vwo kpahe ihwo ri Kaldia.

²Ki mi che ji otu re fa kpo Babilọn, ayen ke cha fa, ayen che ruo phihọ ofefe, ọke re ayen da cha vwọ suọ nẹ abọ kabo rhe vwẹ ẹdẹ rẹ ukpokpogho.

³Wo je ọsedada siẹ umurhabọ rọye-e, wo jo mudia vwẹ enu rẹ ewun rẹ utehru rọye-e, Wo sivwẹ imighene rọye-e; ghwọrọ unofovwi rọye ejobi nu.

⁴Ayen che she ghwẹ vwẹ otọ rẹ ihwo ri Kaldia, a cha wan ayen oma vwẹ irhuvwu rọye.

⁵Kidie Izrẹl vi Juda a je siẹn aye-en Ọrovwohwo Ọghẹnẹ yẹ otuofovwi rayen; ẹkẹvuọvo otọ ri Kaldia vọnre vẹ abe vwọ kpahe Ọfuanfon Ọvuọvo ri Izrẹl na.

⁶Djẹ nẹ uherevie ri Babilọn, jẹn dohwo darhọ rọye sivwi! Wo je bru uwe kufia vwẹ ehwe rọye na-a, kidie ọnana ọke rẹ ihriẹriọ rẹ Ọrovwohwo, osa rọ hwa kẹ.

⁷Babilọn uko rẹ oro vwẹ obọ rẹ Ọrovwohwo jovwo, o da nẹrhẹ idi mu akpọ na ejobi; ẹgborho na da da wain rọye, ọtiọye na ẹgborho na da mwo orhuẹ.

⁸Kpregede ọye Babilọn she guọghọ; viẹ ke! Kẹ umwuodirhẹ fiki rẹ odjadja rọye na; ọkeọvo e mi se sivwo vwobọ.

⁹Mane mie sivwi Babilọn, ẹkẹvuọvo esivwiro-o. Siọn, rere wo jẹn avwanre dohwo dorere rọye yanran; kidie orhiẹn rọye te odjuvwu re a kpaerọ kpo irharheghe nure.

¹⁰Ọrovwohwo vwẹ ase rẹ avwanre rhire, mọ, re ghwoghwo vwi Zayọn iruo rẹ Ọrovwohwo Ọghẹnẹ rẹ avwanre na.

¹¹Nọ edada na! Reyọ ekpọfia na! Ọrovwohwo kpare udu rẹ ivie rẹ Mid nure, fikiridie iroro rọye kpahe Babilọn iroro rẹ oghwọrọ, kidie ọye ihriẹriọ rẹ Ọrovwọhwo na, ihri fiki rẹ uwevwi rọye.

¹²Vwẹ aphiana tan kpahe igbẹhẹ ri Babilọn; jẹn ohẹrhẹ na gan vwẹ erhẹrotọ mu, jẹn ihwo hwa phihọ. Kidie Ọrovwohwo jẹ iroro na ọye ji ruo obo rọ tare kpahe ihwo ri Babilọn.

¹³E ovwan re dia orhọma rẹ ame buebu, ri feri na, oba rẹ ovwan tere, ufi rẹ arhọ rẹ ovwan vwrẹre

¹⁴Ọrovwohwo rẹ otuofovwi vwẹ oma rọye ve nure; Omuẹro me cha ghwẹ we vọn vẹ ihwo, kirobo rẹ ebaka buẹ ye, ayen che do edo rẹ ephiokparobọ vwẹ enu wẹn.

¹⁵Ọ rọ vwẹ ogangan rọye ma akpọ na, rọ vwẹ aghwanre rọye mu akpọ na vi, rọ vwẹ erianriẹn rọye na vwọ riẹn idjuvwu phihọ.

¹⁶O de rhie urhuru rọye edọ rẹ ame kọ dia vwẹ idjuvwu, ọ me nẹrhẹ evwru mu nẹ oba rẹ akpọ na rhe. O de ru enu ẹnyavwọ kẹ osio, ọ da vwẹ odju nẹ ighẹn rọye rhe.

¹⁷Ihwo ejobi ekpa i vwo erianriẹ-ẹn ogun kogun ro duvwu iro oma vorọ fiki rẹ ema ro duvwuru kidie ema rọye efian ayen vwo ẹnwẹn vwe evun raye-en.

¹⁸Ayen fi emuọvo-o, iruo rẹ ophiẹnvwe ayen cha ghwọrọ vwẹ ọke rẹ ehwe rayen;

¹⁹Ọ dia etiọna ẹkẹn ri Jekọp họhọre-e, kidie ọye re ma imu ejobi, Izrẹl je orua rẹ ukuẹriọ rọye; Ọrovwohwo rẹ otuofovwi ọye odẹ rọye.

²⁰Wẹ ọye umomo vẹ ekuakua rẹ ofovwi mẹ wẹ me vwọ guọghọ ẹgborho na ibribro; wẹ me vwọ ghwọrọ uvie

²¹wẹ me vwọ guọghọ iyesi vẹ ọ rọ gua ibribro; wẹ me vwọ guọghọ ekpẹrẹ vẹ ọ rọ gua ibribro;

²²wẹ me vwọ guọghọ ọshare vẹ aye ibribro; wẹ me vwọ guọghọ ọmare ọshare vẹ eghene ibribro; wẹ me vwọ guọghọ eghene ọshare vẹ ọmọte ukoni Ibriobro,

²³wẹ me vwọ guọghọ osuigegede vẹ igegede rọye ibribro, wẹ me vwọ guọghọ ọghwẹrẹ vẹ otu rọye ibribro, wẹ me vwọ guọghọ isun vẹ inotu.

²⁴Me cha reihri ri Babilọn vẹ ihwo ri Kaldia ejobi vwẹ irharo wẹn koko na vwi fiki rẹ umiovwo rẹ ayen ruru vwi Zayọn, eriyin Ọrovwohwo tare.

²⁵Nighere me vwọ so wẹ, E ugbenu rọ ghwọrọ na, eriyin Ọrovwohwo tare, rọ ghwọrọ akpo soso na; me cha riẹn obọ mẹ kpahe owẹ, mi de ghorie uwe nẹ ẹgbogho na rheotọ, mi de ru uwe ugbenu ra torhẹre.

²⁶E rhe mie we olalọ ọvuọvo vwọ bọn ubienyẹ-ẹ kugbe olalọ ọvuọvo re vwo ru uchivwo-o, ẹkẹvuọvo ẹghwọrọ kufia ri bẹdẹ wọ cha dia, eriyin Ọrovwohwo tare.

²⁷Vwẹ aphiana vi vwẹ akpọ na, hwọrọ owanre vwẹ ohri rẹ ẹghorho na; rhuẹrẹ ẹgborho na kẹ ofovwi ra vwọ suọ, se uvie na koko vwọ suọ, Ararat, Mini, vẹ Ashkinaz, vwẹ onotu ọvo mu vwọ suọ ghwe iyesi rhe kerẹ ebaka ri do.

²⁸Rhuẹrẹ ẹgborho na kẹ ofovwi ra vwọ suọ, ivie ri Mid kugbe isun rayen vẹ ediachavwẹ rayen, vẹ otọ kotọ rẹ uvie rayen.

²⁹Otọ na kpogho chahoma vwẹ odjadja, kidie iroro rẹ Ọrovwohwo jẹn kpahe Babilọn ji mudia, ro vwo ru otọ ri Babilọn ofefe, ohwo cha dia-a.

³⁰Egba rẹ ofovwi ri Babilọn fue ohọnre re, ayen da oma ji vwẹ ogba ọgangan rayen, ogangan rayen reri, ayen rhi hirhe phihọ eya, ẹdia rọye herọ tọrhẹ, a guọghọ itehru rọye nure.

³¹Ọdjonẹ ọvo djẹre ra vwa ọfa, ikọn ọvo ra vwa ọfa, ra vuẹ ovie ri Babilọn nẹ e mu orere rọye vwẹ abọ kabọ,

³²ayen reyọ asan ushuame na nure, a vwẹ erhanre torhẹ edaji na nure, Uguegue mu otu rẹ ofovwi na.

³³Kidie enẹ Ọrovwohwo rẹ otuofovwi, Ọghẹnẹ rẹ Izrẹl tare; Ọmọtẹ ri Babilọn họhọ utuwevwi re de duvwu eka vwẹ oke re de chiyo nu, dede na vwẹ ọmọke emerha yẹ ọke rẹ orhọ roye kọ cha rhe.

³⁴Nebukadreza ovie rẹ Babilọn ọ re vwẹ, ọ guọghọ ovwẹ o ru vwe phihọ oravwọ ofefe, ọ rọ vwẹ kerẹ eniame, ọ vwẹ asan avwerhe mẹ vọn evun rọye, o mi vwe kufia.

³⁵Ogidi ro gidi uvwe vẹ imoni mẹ dia enu ri Babilọn jẹ ohwo rọ dia Zayon tanẹ, Ọbara mẹ hẹ enu rẹ ihwo ri Kaldia, jẹn Jerusalẹm ta.

³⁶Ọtiọye na enẹ Ọrovwohwo tare; Nighe, mi mie we unu vwo gu me reihri kẹ wẹ ki mi che se abadi rọye kpọ mi de ru ogbugbu rọye ya,

³⁷Babilọn ko che hirhe phihọ ẹko rẹ erhurhu urhuen rẹ ẹrha emuoshọ vẹ unuefiọn, ohwo rha dia-a.

³⁸Ayen che koko kperi kerẹ ikpohrokpo; ayen cha guan kerẹ emo rẹ ikpohrokpo.

³⁹Ọke rẹ ophu de mu ayen re ki mi mu emuọre kẹ ayen re, ke me vwẹ idi mu ayen, bẹsiẹ rẹ ayen vwọ shero ovwerhẹ ke vwerhẹ ovwerhẹ ri bẹdẹ ayen rha rhọvwọ-ọ, eriyin Ọrovwohwo tare.

⁴⁰Me cha ghwẹ ayen rhe kerẹ emigodẹ re che hwe, kerẹ egbo vẹ ẹkpro.

⁴¹Mavọ e mu Babilọn, ejiro rẹ akpọ ejobi de fuen! Mavọ Babilọn rhoma rhe dia emuoshọ vwẹ ohri rẹ ẹgborho na!

⁴²Abadi bru Babilọn rhire, ọgbogho rọye rhurhu edo rọye muotọ.

⁴³Irere rọye hirhe phihọ emuoshọ, otọ rẹ ohwo jẹ dia, rẹ ọmọ rẹ ohwo jẹ wanvrẹn.

⁴⁴Mi che hwe Bẹl vwi Babilọn, mi de si obo rọ rọre na nẹ unu rọye rhe. Ẹgborho na rha ghwiẹ bro ra ọfa-a, igbẹhẹ ri Babilọn she nure.

⁴⁵We vrẹn nẹ uherevie rọye, ihwo mẹ! Dohwo darhọ rọye sivwi nẹ ophu ọgangan rẹ Ọrovwohwo na!

⁴⁶We jẹn udu bru ovwa-an, wa djẹ oshọ vwẹ iyẹnrẹn re nyori vwẹ otọ na-a, rẹ iyẹnrẹn na de do rhe vwẹ ukpe ọvo vwẹ ukuko rọye iyẹnrẹn na mi rhe do rhe vwẹ ukpe ọfa, rẹ ogidi da hẹ otọ na, rẹ osun de mu kpahe osun.

⁴⁷Ọtiọye na, gbe nighe, ẹdẹ cha rhe, mi che vwo hwe ema ri Babilọn na; oma cha vo otọ rọye na ejobi ihwo rọye re hweri che she teye uherevie rọye.

⁴⁸Kẹsiẹye idjuvwu vẹ akpọ, vẹ obo re hẹ evun rayen ejobi, ke so une rẹ aghogho phihọ uyovwi ri Babilọn, kidie ẹghwọrọ che nẹ obọrhe ọnre cha vwo suọ, etiyin Ọrovwohwo tare.

⁴⁹Fiki rẹ ihwo rẹ Izrẹl re hweri na Babilọn se she, vwọ kẹ Babilọn o she kẹ ehwe rẹ akpọ na ejobi.

⁵⁰Wẹ rọ djẹ vabo rẹ ọlọkọ na, yanran wo muẹdia fọ-ọ Karohọ Ọrovwohwo vwẹ ogboko, jẹn iroro ri Jerusalẹm ro wẹ evun.

⁵¹A vwẹ avwanre jehwe, kidie me nyo ehweje, omaẹphọphọ rhurhu avwanre opharo, kidie erhorha rhe evun rẹ asan ọfuanfon rẹ uwevwi rẹ Ọrovwohwo na.

⁵²Ọtioye na, gbe nighe, ẹdẹ cha rhe, eriyin Ọrovwohwo tare, re me da cha vwẹ ema rọye guẹdjọ, vwẹ otọ rọye ejobi ihwo re woma cha viẹ.

⁵³Owenẹ Babilọn yeri kpenu te odjuvwu, owenẹ ọ gba ogba ọgangan kpenu yariẹ oma, dede ẹghwọrọ che nẹ obọ mẹ bro ra, eriyin Ọrovwohwo tare.

⁵⁴Kerhon, unuebo nẹ Babilọn cha! Edo rẹ ẹghwọrọ rode nẹ otọ rẹ ihwo ri Kaldia rhe!

⁵⁵Kidie Ọrovwohwo na guọghọ Bailọn te otọ, O rhurhu unu rẹ egba rọye Ẹgbogho rayen do kerẹ ame obuebu, edo rẹ urhuru rayen kpare.

⁵⁶Kidie oghwọrọ bruro rhire, rhe enu ri Babilọn, e mu egba ofovwi rọye e vwirhi umurhabọ rayen ibribro, kidie Ọrovwohwo ọye Ọghẹnẹ rẹ ọ hwa osa, o ghine cha hwa osa.

⁵⁷Mi che ru isun vẹ evweagnwanre rọye re idi de mu ayen, osun vẹ olotu kugbe egbofovwi rọye, ayen cha vwerhẹ ovwerhẹ ri bẹdẹ ayen rha rhọvwọ-ọ, Ovie na tarọ, ọ rẹ odẹ rọye hẹ Ọrovwohwo rẹ otuofovwi na.

⁵⁸Enẹ Ọrovwohwo rẹ otuofovwi tare. Igbẹhẹ rode ri Babilọn na e che kporo te otọ riẹriẹriẹ inurhoro rọye ri kpenu na cha tua vwẹ erhanre. Ihwo na wian kufia, omẹrhọ rẹ ẹghorho na kọ rẹ erhanre.

⁵⁹Ota ri Jerimaya ọmraro na ji urhi kẹ Siraya ọmọ ri Neraya ọmọ ri Masiya, ọke ro vwo nene Zẹdikaya ovie ri Juda kpo Babilọn, vwẹ ukpe rẹ ẹne rẹ ẹriọ rọye. Siraya da dia ohwo rọ vwẹ ẹro te emuọre.

⁶⁰Jerimaya de si umiovwo ro te Babilọn ejobi phihọ ọbe, eta nana ejobi re siri kpahe Babilọn na.

⁶¹Jerimaya da ta kẹ Siraya: Ọke wo de te Babilọn, mrẹ nẹ wọ se eta nana ejobi,

⁶²tanẹ, E Ọrovwohwo, wẹ re ta kpahe etinẹ na nẹ wo che bro fia, rere emuọvo vwo je dia, ihwo eyẹ eranvwe, kọ dia ofefe bẹdẹ.

⁶³Ọke wo de se ọbe nana re nu, gba gba oragha muo, ru wo phio phihọ uherevie ri Yufretis,

⁶⁴re wo ta, Enẹ Babilọn che divwi, o gbi vrẹn ọfa-a, fiki rẹ umiovwo ri mi che muẹ nyẹ na. Ọtiọna eta ri Jerimaya bare.