Read urhobo Uvwerhe 3 Bible Online

Uvwerhe 3 - urhobo bible

Uvwerhe 3

¹Mẹvwẹ hẹ ohwo rọ re oja vwẹ otọ rẹ ọkpọ rẹ ophu rọye.

²Ọ djẹ vwẹ ọ da reyọ ovwẹ phihọ evun rẹ ebri ro jẹ orẹmrẹ evwọ;

³Omuẹro ọ rhẹriẹ obọ rọye ku vwe enenẹ vwẹ ẹdẹ na ejobi.

⁴Ọ da nẹrhẹ uvwo mẹ kugbe ohọroma mẹ dọn, o de vwirhi ibeku mẹ.

⁵Ọ rhiẹ imu ọ hwaphihọ riariẹ ovwẹ vẹ ukpokpogho rọ yara korokoro.

⁶Ọ da nẹrhẹ ovwẹ dia evun rẹ ebri, kerẹ ohwo ro ghwru rhahae.

⁷Ọ vwẹ igbẹhẹ gba ogba riariẹ ovwẹ phihọ rere mi vwo jẹ sa djẹ vabọ. O de kru ejọnrọn ehọhọ nyẹ vwẹ;

⁸Obo ri mi kperi se ukẹcha te na, Ọ kerhọn rẹ erhovwo mẹ-ẹ.

⁹Ọ vwẹ elanọ re sheri vwo gbe idjerhe mẹ di, O de ru idjerhe mẹ gugunu.

¹⁰Ọ da họhọ okorhi ro fiọnko, kere okpohrokpo ro sioma nu.

¹¹O sun vwe ghwru nẹ idjerhe mẹ ọ da chẹghẹ ovwẹ kẹnẹ kẹnẹ; Ọ da nẹrhẹ ovwẹ dia ofefe.

¹²O wurhu umurhabo rọye ọ da vwẹ ovwẹ ru uko rẹ ubigẹ rọye.

¹³Ọ da sa ibige rẹ ekpo rọye i de kporo ro udu mẹ;

¹⁴Mi hirhe phihọ ehwẹjẹ kẹ ihwo ejobi, ko mẹvwẹ ayen sua kọke kọke.

¹⁵Obo re yara ọye ọ vwọ vọn evun mẹ, Ọ da vwẹ akoro vwọ vọn vwẹ evun.

¹⁶Ọ da reyọ ako mẹ vwọ chẹghẹ ibiekpẹn, ọ da vwẹ ovwẹ gbule iwurhie.

¹⁷Erhi mẹ gbe riẹn ufuoma-a, aghọghọ da chọrọ ovwẹ ẹro.

¹⁸Kọye me vwọ ta, “urinrin mẹ reri, otiọye ji te iphiẹrohọ mẹ nẹ obọ rẹ Ọrovwohwo rhe.”

¹⁹Karophihọ oma ẹlaghọ mẹ vẹ eyarọ mẹ, akoro kugbe akrasa.

²⁰Erhi mẹ roro vwẹ ọke ejobi, oma de ru vwe kuọrọ.

²¹Ẹkẹvuọvo ọna me rhe karohọ, ọ da nẹrhẹ ovwẹ vwo iphiẹrohọ.

²²Ẹguọnọ ro jẹrhẹriẹ rẹ Ọrovwohwo na o re-e, arodọvwẹ rọye vwo oba-a.

²³Okpokpọ ọ dia kirhiọke kirhiọke, uyota wẹn ọ pha rhuarho.

²⁴“Ọrovwohwo ọye hẹ ẹkẹn mẹ” ọtiọye erhi me tare, fiki rẹ ọtiọye na ki mi phi ẹro phihọ.

²⁵Ọrovwohwo yoma kẹ otu re sa hẹrhẹ, vwọ kẹ erhi rọ guọnerọ.

²⁶Oyoma rere ohwo hwe oma mu hẹrhẹ esivwo rẹ Ọrovwohwo na.

²⁷Oyoma rere ohwo vwọ ghwa urhekpe rọye vwẹ ọke rẹ emoha rọye.

²⁸E jẹn ọye ọvo tidia fọ gbiei siẹ ro de muo nyẹ nu.

²⁹Jẹn ọ bọvwọn unu rhu ekpẹn ọke ọvo iphiẹrohọ me rhe dia vwohọ.

³⁰Jẹn ọ reyọ ọhwa rọye vwọ kẹ ọrọ teyọ na, rere ọ vọn vẹ isọn-ẹriọ.

³¹Kidie Ọrovwohwo sa djẹ kufia bẹdẹ-ẹ,

³²ẹkẹvuọvo, owene ọ vwẹ oja riọ dede o ji ni arodọvwẹ kirobo rẹ ẹguọnọ rọye ro jẹrhẹriẹ na bute.

³³Kidie ọ di mu ohwo ọvuovo lagha-a eyẹ ọ nẹrhẹ ophu di muẹ emọ rẹ ihwo-o.

³⁴Rere o vwo chiyi otu re mu phihọ uwodi vwẹ akpọ na muotọ,

³⁵rere o vwo dje ẹkẹn ute ro te ohwo kufia vwẹ obaro rẹ Ọro Me kpenu na,

³⁶rere ọ vwọ rhẹriẹ iroro rẹ ohwo rẹ Ọrovwohwo rhọvwe phihọ-ọ.

³⁷Ono ri ji urhi o de ghine ruo gba, jokpa nẹ Ọrovwohwo vwi ro mu.

³⁸Ọ dia unu rẹ Ọro me kpenu na ọye uyoyovwi vẹ umiovwo nurhe?

³⁹Die ohwo ọkpokpọ vwo brenu, rẹ ohwo vwọ ta ota rẹ ehwe fiki rẹ imwemwu rọye?

⁴⁰E jẹn avwanre davwẹ idjerhe rẹ avwanre ni, rere e rhivwi bru Ọrovwohwo na

⁴¹E jẹn avwanre kpare udu vẹ abọ rẹ avwanre kpenu, bru Ọghẹnẹ vwẹ obo odjuvwu

⁴²“Avwanre gbe urhi avwanre ji mukpahọ, yi wo ji vwo ghovwo-o.

⁴³Wọ vwẹ ophu phopho oma wọ da vwọ tua avwanre, wọ da vwẹ aroesio hwe avwanre;

⁴⁴Wọ vwe egho phopho oma wẹn rere ẹrhovwo ọvuọvo vwo je sa wan vrẹn.

⁴⁵Wọ vwẹ avwanre ru ekuakua rẹ erhurhu vwẹ ohri rẹ ihwo na.

⁴⁶Ivwrighrẹ rẹ avwanre ejobi ra gbọ kuẹ avwanre.

⁴⁷Uguegue vẹ oshọemuo de rhurhu avwanre muotọ, ẹkuafiotọ kugbe ẹghwọrọ

⁴⁸ẹro mẹ ke djẹ ọkẹre kerẹ ame rẹ urhie fiki rẹ ẹghwọrọ rẹ ọmọtẹ rẹ ihwo mẹ.

⁴⁹Ẹro mẹ djẹ ọkere ro jẹ ẹka, o vwo omaerovwo-o;

⁵⁰bẹsiẹ re Ọrovwohwo vwọ dia odjuvwu de ni je mrẹ;

⁵¹ẹro mẹ kọ nẹrhẹ ivun miovwo uvwe fiki rẹ urhiẹvwe rẹ emetẹ rẹ orere mẹ.

⁵²Ivwighrẹ mẹ ke de djẹ uyo mẹ ekueku kerẹsiẹ ra djẹ uyo rẹ ọphran,

⁵³ayen do vwe ọkpokpọ phihọ ukpotọ ayen da vwẹ ibieragha phi vwe,

⁵⁴ame revwe phihọ me da ta nẹ, Mi ghwruru.

⁵⁵Mi de se odẹ wẹn Ọrovwohwo, nẹ obotọ rẹ ukpotọ na rhe,

⁵⁶Wo de ghine nyo orẹ mẹ, Wo di erhọn wẹn kẹ ekperẹ rẹ ukoẹcha mẹ-ẹ.

⁵⁷Wo de ghine sikẹrẹ ovwẹ vwẹ ọke re mi vwo se we, wọ da ta, ‘Wọ djẹ oshọ-ọ!’

⁵⁸Wọ da chọ ochọ mẹ, E Ọrovwohwo, wọ da tan arhọ mẹ hirhe.

⁵⁹Wọ mrẹ obo re ruvwe chọ te, E Ọrovwohwo, gbe bru orhiẹn na kẹ vwẹ

⁶⁰Wọ mrẹ ihriẹriọ rayen ejobi, iroro rayen jẹ kpahe ovwẹ.

⁶¹“Wo nyo ọjẹfia rayen E Ọrovwohwo, iroro rayen je kpahe ovwẹ.

⁶²Ẹbẹrunu vẹ iroro rayen otu ri hwe vwe na e vwọ so vwẹ ọke ejobi

⁶³Nighe etidia kugbe evrẹn rayen, Mẹvwẹ ayen vwọ sua ine rayen.

⁶⁴Hwa osa ke ayen, E Ọrovwohwo, kirobo rẹ iruo rẹ abọ rayen epha.

⁶⁵Wọ vwẹ udu rẹ ibeghe vwọ ke ayen; ekan wẹn kọ dia enu rẹ ayen.

⁶⁶Wọ vwọ tua ayen vwẹ ophu wẹn wọ me ghwọrọ ayen nẹ otọ rẹ idjuvwu wẹn na, E Ọrovwohwo.”