Read urhobo Uvwerhe 4 Bible Online

Uvwerhe 4 - urhobo bible

Uvwerhe 4

¹Mavọ oro na rhoma rhi dje mavọ omamọ rẹ oro na rhe rhoma rhẹriẹ! Rẹ ibieragha efuanfon na rhe vwọ hra vwẹ unuada rẹ urhuvwu kurhuvwu.

²Emọ eghaghanre ri Zayọn, re ghanre te omamọ rẹ ovwavwọn rẹ oro, mavọ a vwọ vwẹ ayen roro ichẹ rẹ ekpẹn iruo re ọmema vwẹ obọ ru!

³Vwevwe rẹ ẹrha je vwẹ evie kẹ emọ rọye ẹkẹvuọvo ọmọtẹ rẹ ihwo mẹ rhi hirhe phihọ ihwo ebrabra, kerẹ ogomugoro vwẹ evun rẹ aghwa.

⁴Ẹrẹvwe rẹ ọmọ ro vie evie yamuo ọhwa fiki rẹ urhuru rẹ ame, emọ na herọ yara emuọre, ẹkẹvuọvo a mrẹ ohwo rọ kẹ aye-en.

⁵Ihwo re re unuavwerhe e ra ghwọrọ vwẹ evun rẹ urhuvwu, otu re vwẹ isene yono emua erhuo broma phihọ iwurhie.

⁶Kidie efafa ra fa ọmọtẹ rẹ ihwo mẹ rhonọ ehwe ri Sodom, ra guọghọre vwẹ ẹroẹbrẹ na, ọ dianẹ a vwẹ obọ te-e.

⁷Isun rọye fon nọ imichọ e je fon nọ ameivie, oma rayen vwa bọdọ kerẹ irhu, erhuvwu rẹ oma rayen da họhọ oragha ro lo wrowro.

⁸Asakiephana opharo rayen bi nọ ubi, e rhe vughe ayen vwẹ urhuvwu-u, ohọroma rayen dọn jẹ ibeku rayen vwo, ọ da rhe ya kpahra kere urhe.

⁹Aghọghọ herọ kẹ otu rẹ ọlọkọ hweri nọ otu rẹ owẹvwe hweri ri vwioro kuẹfia fiki rẹ ọkarovwẹ rẹ emamọ rẹ aghwa.

¹⁰Eya ri gbe arodọvwẹ da vwẹ abọ rayen chere emọ rayen re, e da rhe dia emuọre rayen vwẹ evun rẹ ẹghwọrọ rẹ ọmọtẹ rẹ ihwo mẹ.

¹¹Ọrovwohwo da kpa ophu rọye rhe, o de ku ọtotorhẹ rẹ ophu rọye kuo, o de koko erhanre phihọ Zayọn, rọ torhẹ ichivwo rọye.

¹²Ivie rẹ akpọ na segbuyota-a, eyẹ otu re dia akpọ na-a, rere ọvweghrẹ sa vwọ ro anurhoro ri Jerusalẹm.

¹³Ọna ki fiki rẹ umwemwu rẹ emraro rọye kugbe orukuruku rẹ irherẹn rọye, ri sun ọbara rẹ evwata na ekueku vwẹ ohri rọye.

¹⁴Ayen di ghoro, ohrohribo, Wan evun rẹ Irhuvwu na, e da vwẹ ọbara gbe oma rayen ẹgua rẹ ohwo gbi se dje obọ te iwun raye-en.

¹⁵Wan nẹ etiyin! Ovwan re pha gbegbe na! ihwo ki kperẹ kẹ ayen; wan nẹ etiyin! Wan nẹ etiyin! We dje obọ te-e! Ayen de rhi hirhe phihọ ovwisunsun vẹ osoghoro; ihwo ke ta vwẹ ohri rẹ ẹgborho na, Ayen vẹ avwanre gbe dia kugbe ọfa-a.

¹⁶Okpuyovwi rẹ Ọrovwohwo ọvo cha hra ayen ejobi, o gbi che se ayen gbe emuọvo ọfa-a, ọghọ gbe herọ kẹ irherẹn na-a, ẹroesiri gbe herọ kẹ ekpakọ na-a.

¹⁷Rẹ avwanre vwọ djẹ ẹhẹhẹrhẹ na, ẹro rẹ avwanre de rhu. Ọchuko rẹ avwanre kẹ odiodi, rẹ avwanre vwọ rhẹrẹ na ẹgborho re je se sivwo kọye avwanre rhẹrẹ na.

¹⁸Ihwo kẹ tọn ẹro vi ichiyi rẹ avwanre o gbi jẹ avwanre sa yan vwẹ evun rẹ irhuvwu rẹ avwanre-e. Oba rẹ avwanre sikẹre re e kere ẹdẹ rẹ avwanre mu nure, kidie oba rẹ avwanre tere.

¹⁹E re vwọ tua avwanre na djẹ phẹre nọ avwanre, nọ ekala re hẹ obenu e vwọ tua avwanre vwẹ enu rẹ igbenu; ayen fiọnko hẹrhẹ avwanre vwẹ evun rẹ aghwa.

²⁰Ẹnwẹn rẹ inwe rẹ avwanre ọ rẹ Ọrovwohwo vwẹ ọri ghworo na e de muo vwẹ ukpotọ rayen, ọ re avwanre ta kpahe nẹ, Otọ rẹ uhoho rọye avwanre cha dia vwẹ ohri rẹ ẹgborho na.

²¹Ghọghọ re oma vwerhe owẹ, E emetẹ rẹ Idọm, ovwan re dia otọ rẹ Uz; ẹkẹvuọvo uko na je cha wan ovwan vrẹn; idi ki che mu ovwan kẹ ovwan cha ban phihọ.

²²Ehwẹ rẹ orukuruku rẹ ovwan, E ọmọtẹ ri Zayọn ọ gbare, o gbi che je ovwan vwo vwẹ imu ọfa-a ẹkẹvuọvo orukuruku wẹn E ọmọtẹ rẹ Idọm, ko hwe ko che rhie imwemwu wẹn phihọ.