Read urhobo Uvwerhe 5 Bible Online

Uvwerhe 5 - urhobo bible

Uvwerhe 5

¹Karophihọ E Ọrovwohwo, obo re phia kẹ avwanre, gbe ni ophọphọvwe rẹ avwanre!

²A rhẹriẹ uku rẹ avwanre vwọ kẹ erhorha, iwevwi rẹ avwanre kẹ ihwo rẹ isiorho.

³Avwanre hirhe phihọ emọphrorivwi ri vwo ọsẹ-ẹ, ini rẹ avwanre da rhe họhọ eyauku.

⁴Avwanre hwa osa rẹ ame rẹ avwanre dare avwanre je dẹ irhe.

⁵Ọghrọrọn rẹ ohọre rẹ avwanre kọye e vwo si avwanre, oma rẹ avwanre gbi vwo omaerovwo-o.

⁶Avwanre ke yara emu miẹ Ijipt, kugbe Asiria, rere evun kọ vọn avwanre.

⁷Esẹ rẹ avwanre ru imwuemwu, ayen gbe herọ-ọ avwanre ke ghwa oghwa rẹ orukuruku rayen.

⁸Eviẹn keye sun avwanre, o gbi vwo ohwo ro sivwi avwanre nẹ obọ raye-en.

⁹Vwẹ evun rẹ ughwu etiyin emuọre rẹ avwanre nẹ cha fiki rẹ ọlọkọ rọ hẹ evun rẹ aghwa.

¹⁰Oma rẹ avwanre kọ rhorha kerẹ enyerhanre vẹ ọtotorhẹ rẹ owẹvwe.

¹¹Aphọphẹ eya vwi Zayọn, kugbe emetobẹ re hẹ Juda.

¹²A gba abọ rẹ isun si enu, e gbi rhe mu ọghọ kẹ ekpako-o.

¹³A gba imighene na nẹ i gbe wuye vwẹ enu rẹ uwuye, emeshare na vẹ oghwa rẹ irhe ke gba yẹghrẹn.

¹⁴Ekpako na yan jẹ unu ra wa rua orere vwo; imighene je yan jẹ ihwehworo vwo.

¹⁵Aghọghọ rẹ udu rẹ avwanre reri; ehegbe rẹ avwanre hirhe phihọ omemuohọ.

¹⁶Erhu rẹ uvie na she nẹ uyovwi rẹ avwanre; ekan kẹ avwanre, kidie avwanre ru imwuemwu!

¹⁷Fiki rẹ ọtiọna na udu rẹ avwanre kọ mwa ọga; fiki rẹ emu nana ẹro rẹ avwanre dje mu koi,

¹⁸Kidie ugbenu ri Zayọn hirhe phihọ ofefe kẹ etiyin ẹrha dia de kọ.

¹⁹Ẹkẹvuọvo wẹ E Ọrovwohwo wọ re bẹdẹ, ekete wẹn kọ dia rhiri re te uvwiẹ ejobi.

²⁰Die avwanre vwo chọrọ owẹ ẹro bẹdẹ, die wọ vwọ siẹn avwanre kri te enẹ?

²¹Sẹ avwanre te oma wẹn E Ọrovwohwo, rere avwanre si kẹre owẹ. Ru ẹdẹ rẹ avwanre ọkpokpọ kerẹ ọke rẹ awanre.

²²Gbenẹ wọ siẹn avwanre tototo? Kẹ ophu wẹn ghine gan kpahe avwanre gangan?