Read urhobo Izikiẹl 1 Bible Online

Izikiẹl 1 - urhobo bible

Izikiẹl 1

¹Vwẹ ukpe rẹ ọgban, vwẹ emeranvwe rẹne, vwẹ ẹdẹ riyori rẹ emeranvwe na, re me vwọ hẹ usun rẹ otu re muru na vwẹ oma rẹ urhie ri Keba, idjuvwu na de rhie phihọ, Me da mrẹ emramrẹ rẹ Ọghẹnẹ.

²Vwẹ ẹdẹ riyori rẹ emeranvwe na (ọ da dia ukpe riyori rẹ Ovie Jihoyakin vwọ hẹ imu),

³ota rẹ Ọrovwohwo de bru Izikiẹl rẹ orherẹn na rhe, rẹ ọmọ ri Buzi, vwẹ otọ rẹ ihwo ri Kaldia vwẹ oma rẹ urhie ri Keba, obọ rẹ Ọrovwohwo de she kpahọ vwẹ etiyin.

⁴Mi vwo no, nighe, odju rẹ ogiribo ro nẹ obọhwẹre ọnre cha, vẹ egho rode, ọ vẹ orẹmrẹ ro lo riariẹ, vẹ erhanre rọ nyavwaro kọke kọke, vwẹ uherevie rẹ erhanre na, kerẹ esiẹ rẹ o lo kerẹ ẹrovwo.

⁵Vwẹ uherevie rọye uhọhọ rẹ eranvwe ekpokpọ ẹne de nọ rhe. Kẹ enẹ ayen họhọre: ayen de vwo oma kerẹ ihwo rẹ akpọ,

⁶ẹkẹvuọvo ọvuọvo de vwo epharo ẹne, ọvuọvo rọye de vwo ibekpe ẹne.

⁷Awọ rayen pha phiọnphiọn, ẹhẹrhowọ rayen da họhọ ẹhẹrhowọ rẹ upene rẹ erhuẹn; ki lo kerẹ ẹrovwo ra fare.

⁸Vwẹ obotọ rẹ ibekpe rayen na vwẹ ẹbẹre ẹne na ayen de vwo abọ rẹ ohwo. Ayen ẹne na de vwo epharo rayen kugbe ibekpe rayen ọtiọna:

⁹lbekpe rayen ohwohwo te ohwo; ayen ọvuọvo yan phiọnphiọn kpo obaro, e rhẹriẹ oma-a jẹ ayen yanran.

¹⁰Vwọ kẹ obo rẹ epharo rayen họhọre, ọvuọvo vwo opharo rẹ ohwo vwẹ obaro; ẹne na de vwo opharo rẹ okpohrokpo vwẹ ẹbẹre rẹ obọrhe, ẹne na de vwo opharo rẹ erhuẹn vwẹ ẹbẹre rẹ obọhwẹre, ẹne na de vwo opharo rẹ ugo vwẹ obuko.

¹¹Ọtiọye epharo rayen epha. Ibekpe rayen da riẹn kpenu; eranvwe ọvuọvo vwo ibekpe ivẹ, ibekpe rẹ ọvuọvo de te ibekpe rẹ ọrivẹ, ibekpe ivẹ de rhurhu oma rayen.

¹²Ọvuọvo da yan phiọnphiọn kpo obaro; kasan kasan re erhi na rare, ọye ayen ra, ayen rhẹriẹ oma-a.

¹³Vwẹ uherevie rẹ eranvwe ekpokpọ na emu ọvo da herọ rọ vwara wei kerẹ umwerhanre, kerẹ umurhukpẹ ro kpenẹ kpenẹ vwẹ ohri rẹ eranvwe ekpokpọ na, erhanre na ra la gala gala, enu da nyavwaro nẹ evu rọye rhe.

¹⁴Eranvwe ekpokpọ na ki phọ krẹ krẹ kpenẹ kpenẹ, kerẹ enu rọ nyavwaro.

¹⁵Asakiephana ri mi vwo ni eranvwe ekpokpọ na, Me da mrẹ adjugẹn vwẹ enu rẹ otọ na vwẹ oma rẹ eranvwe ekpokpọ na, ọvuọvo kẹrẹ ayen ẹne na.

¹⁶Vwọ kẹ ugboma rẹ adjugẹn na vẹ obo re ruro wan: ugboma rayen lo wrowro kerẹ ughegbe; ayen ẹne na da họhẹ oma, obo re ru ayen wan da dia kerẹ adjugẹn rọ hẹ evun rẹ adjugẹn.

¹⁷Ọke rẹ ayen da yanran, ayen ẹne na me yan hirhe aro ku asan ọvo ayen rhẹriẹ oma siẹ re ayen da yan na-a.

¹⁸Idjugẹn ẹne de vwo irhiẹ ayen de ji vwo ibigẹn; irhiẹ rayen na da vọn vẹ ibiẹro riariẹ.

¹⁹Ọke rẹ eranvwe ekpokpọ na da yanran, ye idjugẹn na ra yan vwẹ akakọ rẹ ayen; ọke rẹ eranvwe ekpokpọ na de vrẹn nẹ otọ na, idjugẹn na mi vrẹn.

²⁰Kasan kasan rẹ erhi na djeri, etiyin ayen ra, idjugẹn na mi vrẹn nene ayen; kidie erhi rẹ eranvwe ekpokpọ na hẹ evun rẹ idjugẹn na.

²¹Ọke rẹ eyena da yan, enana ke yan; ọke rẹ eyena de mudia, enana mi mudia, kugbe ọke re eyena de vrẹn nẹ otọ na, idjugẹn na mi nene ayen vrẹn; kidie erhi rẹ eranvwe ekpokpọ na hẹ evun rẹ idjugẹn na.

²²Vwẹ obenu rẹ uyovwi rẹ eranvwe ekpokpọ na uhoho rẹ irharheghe da herọ, ro lo kere ughegbe, da riẹn nene iyovwi rayen.

²³Vwẹ obotọ rẹ irharheghe na ibekpe rayen da riẹn phia phiọnphiọn, ohwohwo so ohwo, eranvwe ọvuọvo da vwẹ ibekpe ivivẹ rhurhu oma rọye.

²⁴Ọke rẹ ayen da yan, ki mi nyo edo rẹ ibekpe rayen na kerẹ edo rẹ ame buebu, kerẹ agbrara rẹ Ọrovwoẹgba na, edo rimrẹrimrẹ kerẹ edo rẹ otuofovwi, vwẹ ọke rẹ ayen de mudia fọ gbiẹi, ayen mi phi ibekpe rayen na phihọ otọ.

²⁵Etiyin urhuru ọvo de nẹ enu rẹ Irharheghe na rhe enu re iyovwi rayen, vwẹ ọke rẹ ayen da fọ gbiẹi, ayen mi phi ibekpe rayen phihọ otọ.

²⁶Vwẹ obenu rẹ Irharheghe na vwẹ obenu rẹ iyovwi rayen emu ọvo da herọ rọ họhọ ekete, ra mrẹ kere ubioragha ro lo, ro tidia vwẹ obenu rẹ emu rọ họhọ ekete na ovọ da herọ rọ họhọ ekroma rẹ ohwo.

²⁷Kẹ obenu yanran kerẹsiẹ ra da mrẹ ehun rọye yanran, me da mrẹ emu ro lo kerẹ ẹrovwo, rọ họhọ erhanre re koko phihọ evun rọye riariẹ, kpotọ nẹ asan ehun rọye rhe me da mrẹ obo re họhọ erhanre, ko lo muo riariẹ.

²⁸Kere uhoho rẹ aphoro vwẹ irharheghe vwẹ ẹdẹ rẹ osio, ọtiọye elo rẹ uhoho na epha riariẹ. Ọtiọye ekroma na họhọ urinrin rẹ Ọrovwohwo na. Ọke me vwọ mrẹ, mi de she bọvwọn opharo rhuotọ, mi de nyo urhuru rẹ ohwo ọvo rọ ta ota.