Read urhobo Izikiẹl 12 Bible Online

Izikiẹl 12 - urhobo bible

Izikiẹl 12

¹Ota rẹ Ọrovwohwo de bru vwe rhe:

²Ọmọ rẹ ohwo, wọ dia uherevie rẹ uwevwi ro muẹkpahe ihwo, ri vwo ẹro re vwọ mrorẹ, ẹkẹvuọvo ye mrorẹ-ẹ, ri vwo erhọn ri vwo nyo ẹme, yi nyo-o;

³kidie ayen uwevwi ri muẹkpahe ohwo. Fiki rẹ ọtiọye na, ọmọ rẹ ohwo, gba choma wo kru oghwa rẹ imu kẹ oma wẹn, rere wọ yan kpo imu vwẹ oghẹruvo vwẹ irharo rayen; wọ cha yanran kerẹ ohwo re muru nẹ asan ọvo kpo ọrivẹ vwẹ irharo rayen. Ọkeọvo ayen me riẹn, dede na yẹ ayen uwevwi ro muẹkpahe ohwo.

⁴Wo mu oghwa wẹn phia vwẹ uvo koko na vwẹ irharo rẹ ayen, kere oghwa re vwo kpo imu; ku wọ yan phia vwẹ ovwọnvwọn vwẹ irharo rayen, kirobo re ihwo ra gba kpe imu ruẹ.

⁵Tọn igbẹhẹ na fi vwẹ irharo rayen, re wọ wan uphrophro na vrẹn.

⁶Vwẹ irharo rayen wo de mu oghwa na kpahe igabọ wẹn, ru wo muo yanran vwẹ evun rẹ ebri na, wo rhurhu ophare wẹn, rere wo vwo jẹ otọ na ẹmrẹ, kidie me vwẹ owẹ ru oka kẹ uwevwi rẹ Izrẹl.

⁷Mi de ru kirobo re ji urhi kẹ vwẹ na. Mi de mu oghwa mẹ phia vwẹ oghẹruvo na, kerẹ oghwa ra ghwa kpo imu, vwẹ ovwọnvwọn me da vwẹ obọ mẹ tọn igbẹhẹ na fi; Me da yanran vwẹ evun rẹ ebri, vẹ oghwa me ri mi mu kpahe igabọ vwẹ irharo rayen.

⁸Vwẹ irhiọke ota rẹ Ọrovwohwo de bru vwe rhe.

⁹Ọmọ rẹ ohwo, ọ dianẹ uwevwi rẹ Izrẹl na, uwevwi ri muẹkpahe ohwo na, ta kẹ we nẹ, Die we ruẹ?

¹⁰Ta kẹ ayen, Enẹ Ọrovwohwo Ọghẹnẹ tare: A bọ epha nana kpahe osun na vwi Jerusalẹm kugbe uwevwi rẹ Izrẹl ejobi re hẹ evun rọye.

¹¹Ta kẹ ayen, mẹvwẹ oka vwọ kẹ wẹ; kirobo ri mi ruru na, ọtiọye e ji che ruẹ kẹ ayen, e che mu ayen kpo imu, vwo kpo ighuvwu.

¹²Osun rọ hẹ ohri rẹ ayen ko che mu oghwa rọye kpahe igabọ rọye vwẹ ebri, kọ cha yan phia ra tọn igbẹhẹ na fiẹ, kẹ etiyin ọ wan ro otafe; ko rhurhu opharo rọye, rere ẹro rọye vwo jẹ otọ na ẹmrẹ.

¹³Ki mi che phi obriki mẹ rhurho, ufi mẹ ko muo, ke me reyọ rhe Babilọn vwẹ otọ rẹ ihwo ri Kaldia, yẹ ọ cha mrẹ-ẹ, ko ghwu vwẹ oboyi.

¹⁴Ke me cha hrahra kohwo kohwo rọ riarierẹ ejobi nene odju, ichukọ rọye kugbe otuofovwi rọye, ki mi yoro ọlọkọ nẹ ako rọye rhe vwọ suẹ ayen.

¹⁵Ke ayen riẹn nẹ mẹvwẹ Ọrovwohwo na, vwẹ ọke re me da hra ayen vwẹ ohri rẹ ẹgberho na re me da hrahra ayen wan ẹkuotọ na ejobi.

¹⁶Ẹkẹvuọvo ki mi che ruo rere emerha rayen vwọ djẹ vabọ nẹ obọ rẹ ọlọkọ na, nẹ owẹvwe vẹ emiavwe, rere ayen vwọ fan ẹgua rayen vwẹ ohri rẹ ẹgborho rẹ ayen ra na, rere ayen vwọ riẹn nẹ mẹvwẹ hẹ Ọrovwohwo na.

¹⁷Ota rẹ Ọrovwohwo na de bru vwe rhe.

¹⁸Ọmọ rẹ ohwo, re ikara wẹn vẹ ophariẹ, re wọ da ame vẹ ekpogho kugbe oshọemuo,

¹⁹rere wọ ta kpahe ihwo rẹ otọ na, Enẹ Ọrovwohwo Ọghẹnẹ ta kpahe ihwo re dia Jerusalẹm vwẹ otọ rẹ Izrẹl: Ayen cha re ikara rayen vẹ oshọemuo, ayen me da ame vẹ opharo emuophihọ, fikiridie a cha ghwẹ obo re hẹ otọ rọye ejobi no, fiki rẹ ogbarogba rẹ ihwo ejobi re dia evun rọye.

²⁰Irere rẹ ihwo dia ejobi ka kua ayen fiotọ, otọ na ko che hirhe phihọ ofefe, ku wọ riẹn nẹ mẹvwẹ Ọrovwohwo na.

²¹Ota rẹ Ọrovwohwo dẹ bru vwe rhe:

²²Ọmọ rẹ ohwo, didi itẹ e kpe kpahe otọ rẹ Izrẹl na, tanẹ, Ẹdẹ na re gro, emramẹ kemramrẹ rhi hirhe phihọ odiodio?

²³Vwẹ ọtiọye na gba ta kẹ ayen, Enẹ Ọrovwohwo Ọghẹnẹ tare: Mi che phi oba phihọ itẹ nana, ayen gbi che kpe itẹ nana vwẹ Izrẹl ọfa-a. Ẹkẹvuọvo ta kẹ ayen, Ẹdẹ na kẹre otọ re, emramrẹ na ejobi ki che ruẹ gba.

²⁴Kidie a gbe cha mrẹ emramrẹ rẹ efian eyẹ avwanvwe re brẹ phihọ epha vwẹ evun rẹ uwevwi rẹ Izrẹl na-a.

²⁵Ẹkẹvuọvo mẹvwẹ rẹ Ọrovwohwo cha ta ota re me cha ta, ke vwọ ru emu. O gbi che kri-i, ẹkẹvuọvo vwẹ ọke wẹn na, E uwevwi ro muẹkpahe ohwo na. Me ta ota na ki mi ji ruọ, eriyin Ọrovwohwo Ọghẹnẹ tare.

²⁶Ọfa ota rẹ Ọrovwohwo de bru vwe rhe.

²⁷Ọmọ rẹ ohwo, nighe, ayen ihwo rẹ uwevwi rẹ Izrẹl tare, Emramrẹ rọ mrẹre na e rẹ ẹdẹ buebu re cha, e mramrẹ rẹ ọke rọ cha vwẹ obaro shesheri.

²⁸Fiki rẹ ọtiọye na gba ta kẹ ayen, Enẹ Ọrovwohwo Ọghẹnẹ tare: Ota mẹ ọvuọvo gbi che kri ọfa-a, ẹkẹvuọvo ota re me tare ko che ru gba, eriyin Ọrovwohwo Ọghẹnẹ tare.