Read urhobo Izikiẹl 13 Bible Online

Izikiẹl 13 - urhobo bible

Izikiẹl 13

¹Ota rẹ Ọrovwohwo de bru vwe rhe.

²Ọmọ rẹ ohwo, mraro kpahe emraro rẹ Izrẹl, mraro rere wọ ta kẹ otu re de vwẹ udu rẹ obọ rayen mraro. Nyo ota rẹ Ọrovwohwo na!

³Enẹ Ọrovwohwo Ọghẹnẹ tare, Ekan kẹ emraro rẹ ẹkpa ri nene erhi rẹ obọ rayen, yẹ ayen mrẹ emuọvo-o!

⁴Emraro wẹn e hoho irhiranko vwẹ ohri rẹ iwevwi ri sheri, E Izrẹl.

⁵Wọ je yan kpo asan ri kpori na-a, eyẹ wo je bọn igbẹhẹ kẹ uwevwi re Izrẹl na-a, rere o vwo se mudia vwẹ ofovwi vwẹ ẹdẹ rẹ Ọrovwohwo na.

⁶Ayen vwọrọ efian ayen bọn epha rẹ efian; ayen tare, Ọtiọye Ọrovwohwo tare, dede na yi mi ji aye-en ye ayen phiẹrohọ nẹ o ru ota ayen gba.

⁷Wọ je mrẹ emramrẹ rẹ ọphiẹnvwẹ, wọ je bọ epha rẹ ofia-an, vwẹ ọke wọ da tanẹ, Ọrovwohwo ye tarọ, dede na ye me ta ota kẹ wẹ-ẹ?

⁸Fiki rẹ ọtiọye na enẹ Ọrovwohwo Ọghẹnẹ tare. Fikiridie wọ ta eta rẹ ọphiẹvwe wọ da rha mrẹ efian na, fiki rẹ otiọye gbe nighe, ki mi mukpahe owẹ, eriyin Ọrovwohwo Ọghẹnẹ tare.

⁹Obọ mẹ ko mukpahe emraro na re mrẹ emramrẹ rẹ ọphiẹvwe re bọ epha rẹ efian; ayen gbe cha dia ukoko rẹ ihwo mẹ-ẹ, eyẹ e gbi che si ayen phihọ ọbe rẹ uwevwi rẹ Izrẹl na-a, eyẹ ayen gbe vwẹriẹ otọ rẹ Izrẹl na-a. Kẹ ovwan cha riẹn nẹ mẹvwẹ ọyen Ọrovwohwo Ọghẹnẹ na.

¹⁰Fikiridie, uyota, ayen sun ihwo mẹ ghwru, tanẹ, Ufuoma ye ufuoma herọ-ọ, fikiridie, ọke rẹ ihwo na vwọ bọn igbẹhẹ, emraro nana da vwẹ oda ọfuanfon vwọ darọ.

¹¹Ta kẹ ihwo re vwẹ oda darọ na nẹ o che she! Osio rẹ oghwe cha rhọ, ibieragha ride che vwrẹ she, ogiribo ọgangan che dju.

¹²Ọke rẹ igbẹhẹ na de she, a gbe rha ta kẹ wẹ nẹ, Kẹ oda ru wọ vwọ darọ na kẹ ọrhọ?

¹³Fiki rẹ ọtiọye na enẹ Ọrovwohwo Ọghẹnẹ tare: Me cha vwẹ odju rẹ ogiribo cha vwẹ ophu mẹ, osio rẹ oghwe kọ cha rhọ vwẹ ivuemiovwo mẹ, ibieragha ride rẹ ophu mẹ ke guọghọ.

¹⁴Ki mi kporo igbẹhẹ re wọ vwẹ oda dare na, kọ she te otọ, ichivwo rọye ke fa rhiephihọ, ọke ro de she, ku wọ guọghọ vwẹ uherevie rọye, ku wọ riẹn nẹ mẹvwẹ Ọrovwohwo na.

¹⁵Ke enẹ me cha vwẹ ophu mẹ ghwrọrọ igbẹhẹ na, kugbe ayen ejobi re vwẹ oda vwo ghworo, ke me cha ta kẹ wẹ, Igbẹhẹ na kugbe ayen otu re vwẹ oda ghworo na gbe herọ-ọ.

¹⁶Enana emraro rẹ Izrẹl re mraro kpahe Jerusalẹm re mrẹ emramrẹ rẹ ufuoma kpahọ, yẹ ufuoma herọ-ọ, ọtiọye Ọrovwohwo Ọghẹnẹ tare.

¹⁷Ji te owẹ, ọmọ rẹ ohwo, tọn opharo wẹn vi kpahe emetẹ rẹ ihwo wẹn, re mraro nẹ udu rẹ obọ rayen cha na, mraro vwọso ayen

¹⁸re wọ ta, Enẹ Ọrovwohwo Ọghẹnẹ tare: Ekan kẹ eya na ri ko egbene rẹ egbẹnẹkẹ phihọ erhuabọ ejobi, ayen mi phi oga phihọ uyovwi ri kohwo kohwo ejobi vẹ oghẹrẹ rẹ ekroma rọye, re bẹrẹ ibefi rẹ erhi rẹ ihwo! Wọ je bẹrẹ ibefi rẹ erhi rẹ ihwo ri mi vwori, rere wọ sẹro rẹ arhọ rẹ ihwo efa re dia erere kẹ wẹ?

¹⁹Wo gbe vwe ẹgua vwẹ ohri rẹ ihwo mẹ fiki rẹ ẹkuobọ rẹ ọka kugbe ubro rẹ ikara, we mi hwe ihwo ri fo ughwu-u, ihwo ri fo ughwu we mi je ayen vwo, vwẹ oma rẹ efian re wa vwọrọ kẹ ihwo mẹ, re kerhọn rẹ efian.

²⁰Fiki rẹ ọtiọye na enẹ Ọrovwohwo Ọghẹnẹ tare: Nighe, me vwọ so egbene rẹ egbẹnẹkẹ rẹ ovwan wan bẹrẹ ibefi rẹ arhọ rẹ ihwo na, ke me cha bẹrẹ ayen nẹ abọ wẹn, ki mi siobọ nẹ ihwo ru wọ vwẹ ibefi vwo mu na kpọ ọphẹ kerẹ emephran re siobọ nu.

²¹Ega wẹn na ke me bẹrẹ kufia rhe, ki mi sivwi ihwo me nẹ obọ wẹn, ayen gbe cha dia kerẹ eranvwe rẹ uyo vwẹ obọ wẹ-ẹn, ku wọ riẹn nẹ mẹvwẹ ọye Ọrovwohwo na.

²²Fikiridie wọ nẹrhẹ udu bru evwata na ekueku, ye me vwẹ udu bro kẹ, wo de phi udu phihọ ohwo umwemwu awọ, rere o je rhivwi nẹ idjerhe umwemwu rọye ro sivwi arhọ rọye,

²³fiki rẹ ọtiọye na wọ gbe cha mrẹ emramrẹ rẹ ophiẹvwe ọfa-a eyẹ uruemu rẹ epha ẹbọ-ọ, mi che sivwi ihwo mẹ nẹ obọ wẹn, ku wọ riẹn nẹ mẹvwẹ hẹ Ọrovwohwo na.