Read urhobo Izikiẹl 17 Bible Online

Izikiẹl 17 - urhobo bible

Izikiẹl 17

¹Ota rẹ Ọrovwohwo de bru vwe rhe:

²Ọmọ rẹ ohwo, gbe ido, rere wo bru isẹ kẹ uwevwi rẹ Izrẹl;

³ta, Enẹ Ọrovwohwo Ọghẹne tare Ugo rode vẹ ibekpe rode kugbe ugbunu piọnpiọn, vẹ iphoro jigbri dohwo doka rọye, da rhe Lebanọn rhi fru enu rẹ igẹdu reyọ,

⁴o de vwirhi obo ẹroro rọye o de muo kpo otọ ra da chua eki, ọ de muo phihọ orere rẹ ineki.

⁵Etiyin ọ da reyọ omamọ rẹ otọ na ọ da kọn phihọ otọ esiri, ọ da kọn kẹrẹ asan ame obuebu. Ọ da vwọ gbane kerẹ urihi.

⁶Ọ da djẹ phia ọ da rhe hraphihọ kerẹ vain rọ vẹn phihọ, eghọn rọye da chahe kurhẹriẹ kpo esiri rọye, awọ rọye de mudia asan rọ epha. O de rhi hirhe phihọ vain, ọ da tan eghọn buebu ọ da ghwẹ ẹbe phihọ jigbri.

⁷Ẹkẹvuọvo ugo rode ọfa herọ vẹ ibekpe rode vẹ iphoro jigbri, gbe nughe, vain nana da vẹn awọ rọye kpo oma rọye, eghọn rọye da nuẹ ghwẹhọ esiri rọye rere irho rọye vwọ kpọrhọ. Nẹ asa ra kọnrọ phihọ na,

⁸o de ghwie ra kọn phihọ otọ esiri rọ kẹrẹ ame obuebu, rere ọ vwọ mrasa tan eghọn, rọ mọ emamọ, rọ dia omamọ rẹ uvi rẹ vain.

⁹Ta, enẹ Ọrovwohwo Ọghẹnẹ tare. Kọ sa rhọ? Awọ rọye rhe ghwie ra da nyavwe eghọn rọye kufia, rere ẹbe rọye ri yoro cha na ejobi vwioro? Ọ rha guọnọ obọ ọgangan rẹ ihwo buebu tavwe ra ke sanvwọ kufia-a.

¹⁰Nighe, ọke re de ghwie kọn, kọ je sa djẹ? O rhe vwioro tototo vwẹ ọke rẹ odju rẹ obaro ọnre de djuo-o ro vwioro kufia vwẹ enu rẹ umukpe rọ da djẹ na?

¹¹Etiyin ota rẹ Ọrovwohwo de bru vwe rhe.

¹²Ta kẹ uwevwi rẹ okpetu na, Wọ rha riẹn otọ rẹ imu nana? Ta kẹ ayen, Nighe, ovie ri Babilọn da rhe Jerusalẹm, o de mu ovie rọye vẹ isun rọye ọ da ghwẹ ayen rhi Babilọn.

¹³O da reyọ omamọ na ọvo vwẹ uwevwi rẹ ovie na ọ vẹ ọye da re ọphọ, ọ ve ọye de ve (Uyovwedje rẹ ihwo rẹ otọ na yọ ghwẹ ayen yanran nure,

¹⁴rere e vwo gbe uvie na phihọ otọ rere o je oma emuo kpenu, rere ọ da yọnrọn ọphọ na uvie rọye vwo mudia).

¹⁵Ẹkẹvuọvo o de mu kpahọ ro vwo je ikọn kpo Ijipt, rere ayen kẹ iyesi vẹ unuofovwi rode. Kọ sa kparobọ? Kẹ ohwo ro ru emu ọtiọye sa djẹ vabọ? Ko se miovwi ọphọ na rọ da djẹ vabọ?

¹⁶Kirobo re me herọ na, eriyin Ọrovwohwo Ọghẹnẹ tare, imuẹro herọ nẹ asan rẹ ovie na rọ reyerọ vwo mu ovie na, ohwo ro vwo ive rọ jẹfia na, ro vwo ọphọ ro miovwiri na, vwẹ evun rẹ Babilọn kẹ etiyin o de ghwu.

¹⁷Fẹro vẹ unuofovwi rọye rode vẹ usun rẹ ihwo buebu sa cha uko vwẹ ofovwi-i, vwẹ ọke ra da ghwẹ ẹkuekpẹn nyẹ ogba rẹ ofovwi na ra vwọ nyavwe ihwo buebu kufia.

¹⁸Fikiridie ọ je ive na fia ọ de miovwi ọphọ na, fikiridie ọ ghwa obọ phiyọ nu o de rhe ru imu nana, ọ gbe sa djẹ va abọ-ọ

¹⁹Fiki rẹ ọtiọye na enẹ Ọrovwohwo Ọghẹnẹ tare kirobo re me herọ na, uyota ọphọ mẹ rọ jẹfia na, kugbe ọphọ me rọ miovwiri na, me nekpẹn rọye vwẹ uyovwi rọye.

²⁰Ki mi phi obriki mẹ rhurho, ufi mẹ ko muo, ke me reyọ rhe Babilọn rhi vwo guẹdjọ fikiridie ọ shẹ vwẹ.

²¹Ihwo rẹ ofovwi rọ sanọre na a cha vwẹ ọlọkọ nyavwe ayen hwe, i ri ghwu chekọ ka cha hra ayen nene odju kodju, ku wọ riẹn nẹ Mẹvwẹ, Ọrovwohwo na, re ta ota na.

²²Enẹ Ọrovwohwo Ọghẹnẹ tare: Ekpuyovwi mẹ kọ reyọ omoghọn nẹ obo ẹroro rẹ igedu na rhe, ke me vwọ phia, ki mi vwirhi oghọn ọboba nẹ obo ẹroro rọye, ke me kọn phihọ enu rẹ ugbenu ro kpenu gogorogo.

²³Vwẹ obenu rẹ ugbenu rẹ Izrẹl Me cha kọn phihọ, rere ọ vwọ tan eghọn buebu rọ mọ emamọ, rere o rhi hirhe phihọ uvi rẹ urhi rẹ igedu, obotọ rọye kọye koka koka rẹ eranvwe cha dia, vwẹ ophie rẹ eghọn rọye kọye kọphran kọphran cha bọn ẹho phihọ.

²⁴Irhe rẹ aghwa na ejobi ke cha riẹn nẹ mẹvwẹ Ọrovwohwo na sa vẹn urhe ro kpenu kpotọ, urhe ro kpotọ mi mi rhe muo kpenu, o mi ru urhe ọkpokpọ phihọ oghweghwu, ọ mi rhe ru urhe oghweghwu phihọ ọkpokpọ. Mẹvwẹ Ọrovwohwo me ta nure, ki mi ji se ruo gba.