Read urhobo Izikiẹl 18 Bible Online

Izikiẹl 18 - urhobo bible

Izikiẹl 18

¹Ota rẹ Ọrovwohwo da rhoma bru vwe rhe.

²Die wo vwo dje itẹ nana ekpekpe kpahe otọ rẹ Izrẹl, Esẹ na rare otiẹ ekianke, ako ke ghẹghẹ emọ na?

³Kirobo re me vwọ herọ na, eriyin Ọrovwohwo Ọghẹnẹ tare, e gbi che kpe itẹ nana ọfa vwẹ Izrẹl na-a.

⁴Nighe, erhi ejobi eme, erhi ro ru umwemwu ko ghwu.

⁵Ọ da dianẹ ọvwata ru obo re wan urhi vẹ obo ri shephihọ —

⁶ọ da dianẹ ọ rha re emu vwẹ enu rẹ ugbenu-u eyẹ ọ rha kpare opharo kpenu vwo ni ema rẹ uwevwi rẹ Izrẹl na-a, o rhe gbe aye rẹ ọrivẹ rọye ẹgua-a eyẹ o rhe bi kẹre aye rọ hẹ ọke rọye-e,

⁷o shenyẹ ohwo ọvuovo-o, o da hwa osa rọ rere vwẹ ọke ro bruru, o cho uji-i, ọ vwẹ emu kẹ ohwo rẹ owẹvwe hwe, ọ me vwẹ ewun kẹ ohwo rọ ban phihọ,

⁸o momo igho kẹ ohwo o de suo-o, eyẹ ọ vwẹ igho obuebu vwọ kpahọ-ọ, rọ siobọ rọye nẹ imwemwu, ro de brorhiẹ rẹ ọsoso vwẹ uvwre rẹ ihwo ivẹ,

⁹rọ da yan vwẹ evun rẹ iji mẹ, ọ da vwẹ oma kpotọ serọ rẹ irhi mẹ — yẹ ọvwuta oruẹ, kọ sa rhọ, eriyin Ọrovwohwo Ọghẹnẹ tare.

¹⁰Ọ da dianẹ o vwiẹ ọmọ ro cho uji, ro de sun ọbara,

¹¹ro ruẹ eravwọ nana-a, ẹkẹvuọvo ọ ria emu vwẹ enu rẹ igbenu, o mi gbe aye rẹ ọrivẹ rọye ẹgua,

¹²o mi shenyẹ ọrivẹ rọye rẹ akpọ bẹn, ọ gborho ihwo, o siobọ nẹ emu re vwo vien ewu-an, ọ kparẹ ẹrọ rọye kpenu vwọ nẹ ema, o gbe ẹgua,

¹³o momo o mi suo, ọ me vwẹ igho buebu kpahọ, kọ sa rhọ? O sa rhọ-ọ. O ru emu rẹ ẹgua nana ejobi, ko ghwu dẹn, ọbara rọye kọ dia enu rọye.

¹⁴Ẹkẹvuọvo ọ da dianẹ ohwo nana vwiẹ ọmọ rọ mrẹ imwemwu nana ejobi rẹ ọsẹ rọye ruru na, oshọ de muo, o gbi rhe ru ọtiọye-e,

¹⁵rọ re emu vwẹ enu rẹ igbenu-u eyẹ kpare ẹro kpenu vwo ni ema rẹ uwevwi rẹ Izrẹl na-a, o gbe aye rẹ ọrivẹ rọye ẹgua-a,

¹⁶o gbe ohwo ọvuọvo ku-u, ọ reyọ emu rẹ ijọpha-a, o gborho ohwo-o, ẹkẹvuọvo ọ da vwẹ emu kẹ ohwo rẹ owevwe hwe re, ọ da vwẹ amwa rhuo ohwo rọ banphihọ,

¹⁷o siobọ rọye nẹ umwemwu, o suẹn igho-o o ji brẹba-a, ọ sẹro rẹ irhi mẹ, ọ da yan nene iji mẹ, o se ghwu fiki rẹ orukuruku rẹ ọsẹ rọye-e, ọ sa rhọ dẹn.

¹⁸Vwọ kẹ ọsẹ rọye, fikiridie o yono obo ra ghwa ihwo ria, o cho oniọvo rọye, ọ de ru obo ri je yovwo vwẹ ohri rẹ ihwo rọye, nighe, o che ghwu phihọ orukuruku rọye.

¹⁹Ye wọ tanẹ, Die ọmọ vwo je oja rẹ orukuruku rẹ ọsẹ ẹriọ? Ọke rẹ ọmọ na de ru emu rẹ urhi vẹ obo ri shephihọ, ọ da vwẹ ẹro te otọ sẹro rẹ iji me, kọ sa rhọ dẹn.

²⁰Erhi ro ru imwemwu ko ghwu Ọmọ sa re oja rẹ orukuruku rẹ ọsẹ-ẹ, eyẹ ọsẹ re ọja rẹ orukuruku rẹ ọmọ-ọ, ọvwata rẹ ọvwata ruru oma rọye ọ dia, umwemwu rẹ ohwo umwemwu ruru oma rọye ọ dia.

²¹Ẹkẹvuọvo ọ da dianẹ ohwo umwemwu kurhẹriẹ nẹ imwemwu rọye ejobi ro ruru, rọ da yọnrọn iji mẹ ro de ru obo re wan urhi vẹ obo ri shephihọ, kọ sa rhọ dẹn, ọ gbi ghwu-u

²²A gbe sa karohọ ogbeku rọye ọvuọvo ro ruru-u, kidie fiki rẹ ọvwata rọ ruru na kọ rhọ.

²³Mi vwo omavwerhovwẹ vwẹ ughwu rẹ oruimwemwu-u eriyin Ọrovwohwo Ọghẹnẹ nọre, ọ dianẹ rọ kurherie nẹ idjerhe rọye rere ọ rhọ?

²⁴Ẹkẹvuọvo ọke rẹ ọvwata de kurhẹriẹ nẹ ọvwata rọye ro de ru orukuruku ro de ru emu ẹgua rẹ ohwo umwemwu ruẹ, kọ rhọ vwọ? A gbe karophihọ ọvuọvo rẹ iruo rẹ ọvwata ruru jovwo na-a; fiki rẹ ogbigbiru rọ re abe rọye na kugbe umwemwu ro ruru na, ko ghwu.

²⁵Ye wọ tanẹ, Idjerhe rẹ Ọrovwohwo na dia ọsoso-o. Gbe nyo asakiephana, E uwevwi rẹ Izrẹl Idjerhe mẹ dia ọsoso? O dia idjerhe wẹn ri je ọsoso ẹdia?

²⁶Ọke rẹ ọvwata de kurhẹriẹ nẹ ọvwata rọye ro de ru orukuruku, ko ghwu fiki rọye, fiki rẹ orukuruku ro ruru na ko ghwu.

²⁷Ọfa, ọke rẹ ohwo umwemwu de kurhẹriẹ nẹ idjerhe umwemwu ro ruẹ jovwo ro de ru obo re wan urhi vẹ obo ri shephihọ, ko sivwi arhọ rọye.

²⁸Fikiridie o niro mu o de kurhẹriẹ nẹ ogbigbiru rọye ejobi rọ ruru, ko rhọ dẹn, ọ gbi rhe ghwu-u.

²⁹Yẹ uwevwi rẹ Izrẹl ra ta, Idjerhe rẹ Ọrovwohwo dia ọsoso-o. E uwevwi rẹ Izrẹl, idjerhe mẹ dia ọsoso? Ọ dia idjerhe wẹn ri jẹ ọsoso ẹ dia?

³⁰Fiki rẹ ọtiọye na ke me cha vwẹ o wẹ gu ẹdjọ, E uwevwi rẹ Izrẹl, ohwo ọvuọvo kirobo rẹ idjerhe rọye epha, eriyin Ọrovwohwo Ọghẹnẹ tare. Kurhẹriẹ rere wo siobọ nẹ ogbigbiru wẹn ejobi, ọ dia ọtiọye-e orukuruku wẹn de rhi si ughwu hwe we.

³¹Siobọ nẹ ogbigbiru wẹn ejobi ru wo ru kpahe ovwẹ, wọ reyọ udu ọkpokpọ kẹ oma wẹn kugbe erhi ọkpokpọ! Die wọ di vwo ghwu, E uwevwi rẹ Izrẹl?

³²Kidie mi vwo omavwerhovwẹ vwẹ oma rẹ ughwu rẹ ohwo ọvuọvo-o, eriyin Ọrovwohwo Ọghẹnẹ tare ọtiọye na gbe kurhẹriẹ rere wọ rhọ.