Read urhobo Izikiẹl 19 Bible Online

Izikiẹl 19 - urhobo bible

Izikiẹl 19

¹Wẹ, mu ugo rẹ uvwerhe vwọ kẹ isun rẹ Izrẹl,

²re wọ ta: Didie okpohrokpo oni wẹn epha vwẹ ohri rẹ ikpohrokpo na! O de fiọnko vwẹ uherevie rẹ emọboba rọye, rọ ghẹrẹ emọ rọye.

³Ọ da ghẹrẹ ọvo vwẹ usun rẹ emọ rọye na, o de rhi hirhe phihọ upene rẹ okpohrokpo, o de rhi yono obo re muẹ eranvwe, o de hwe ihwo.

⁴Irere na de hworo owanre hẹrhẹ, e de muo vwẹ uyere rayen, ayen da vwẹ eghọre sa ayen de muo kpo Ijipt.

⁵Ọke rẹ ọ vwọ mrẹ ọyena ọ de gbe unu, kidie ugẹn rọ vwẹ ẹro so muẹ oghwrẹ, ọ da reyọ ọmọ rọye ọfa ọ de vwo ru upene rẹ okpohrokpo.

⁶Kẹ ọ kọn vwẹ ọhri rẹ ikpohrokpo na, o de rhi hirhe phihọ upene rẹ okpohrokpo, o de yono obo re muẹ eranvwe, o de hwe ihwo.

⁷Ọ da guọghọ ogba ọgangan rayen, ọ da kua irere rayen fiotọ, otọ na da kua re kugbe ihwo re herọ ejobi rẹ ayen vwo nyo edo rọye.

⁸Etiyin ẹgborho na da hwa hẹrhẹ ayen kpahe ufi vwẹ abọ na vẹ abọ yena, ayen de phi obriki rayen rhurho, e de muo vwẹ uyere rayen.

⁹Ọ vẹ oghọre vwẹ unu e de mu phihọ akpẹrẹ, ayen de muo rhe ovie ri Babilọn, ayen de muo phihọ uwodi, rere e vwo je urhurhu rọye enyo vwe enu rẹ igbenu rẹ Izrẹl na.

¹⁰Oni wẹn da họhọ urhe ri vain vwẹ ogba ri vain re ghwie kọn kẹrẹ asan ame, ọ tan eghọn buebu vẹ emamọ fiki rẹ ame buebu rẹ ọ epha na.

¹¹Ugboma rọye rọ ma gan ejobi de rhi hirhe phihọ ọkpọ rẹ ovie, ọ da tan gogorogo kpenu vwẹ ohri rẹ eghọn ri chekọ na, a da mrẹ vwe asan ro kpenu te vẹ eghọn rọye re pha gbidi na.

¹²Ẹkẹvuọvo a da vwẹ ophu ghwie vain na kufia, a da kparọ phihọ otọ, ọ da yamu vwẹ odju rẹ obaro ọnre, a da kpare ibi rọye kufia, ugboma rọye rọ ma gan ejobi na da yamu; erhanre da torhẹ.

¹³Asakiephana e de ghwie kọn phihọ evun rẹ aton, vwẹ otọ ọyaya rẹ ame epha-a.

¹⁴Erhanre da la nẹ ugboma rọye rhe, ọ da ra torhẹ eghọn rọye vẹ emamọ rọye, omamọ rẹ ugboma rọ ganre gbi rhe-e, o rhe vwo ọkpọ rẹ ovie-e. Ọnana hẹ uvwerhe, ọ da rhe dia uvwerhe.