Read urhobo Izikiẹl 22 Bible Online

Izikiẹl 22 - urhobo bible

Izikiẹl 22

¹Ọfa ota rẹ Ọrovwohwo de bru vwe rhe, tanẹ,

²Wọwẹ, ọmọ rẹ ohwo wo se gu ẹdjọ, wo se gu ẹdjọ rẹ orere rẹ ọbara na? Gbe dje uruemu rẹ ẹgua rọye ejobi kẹ.

³Wọ cha ta, E nẹ Ọrovwohwo Ọghẹnẹ tare. Orere ro sun ọbara te otọ vwẹ evun rọye, rere ọke rọye mrasan rhe, rọ karẹ edjọ vwo gbe oma rọye ẹgua!

⁴Wọ rhe re abe vwẹ oma rẹ ọbara ru wo sun te otọ na, wo de rhe gbe oma wẹn ẹgua vwẹ oma rẹ edjọ ru wọ kare, wọ nẹrhẹ ẹdẹ wẹn gba nure, ikpe re bru kẹ wẹ gbare. Fiki rẹ ọtiọye na ki mi ru we vwo dia oba kẹ ẹgborho na, ehwẹjẹ vwọ kẹ irho na ejobi.

⁵Otu re kẹrẹ owẹ kugbe otu ri sheri kẹ wẹn ke vwẹ owẹ jehwe, wẹ rẹ odẹ rọye gbo hwe ihwo na, rọ vọnre vẹ ukperi na.

⁶Nighe, isun rẹ Izrẹl re hẹ evun wẹ, ohwo ọvuọvo vẹ obo rẹ ogangan rọye teri ghwe mu kpahe ọbara esuo.

⁷Ọsẹ vẹ oni a vwẹ ayen jehwe vwẹ evun wẹ, ọrhorha rọ hẹ uherevie wẹn, wa karhiẹn emu rọye mie, te ọmọphrorivwi te ayeuku e ru ayen chọ vwẹ evun wẹn.

⁸Wọ jẹ emu ọfuanfon mẹ fia, wo de gbe ẹdidjala mẹ ẹgua.

⁹Ihwo evo hẹ evun wẹn na ri gbe ode mẹ ku fiki rẹ ọbara esuo, ihwo evọ je hẹ evun wẹ re ria emu vwẹ obenu rẹ igbenu, ihwo gbe ọfarhiẹ ọbrabra vwẹ uherevie wẹn.

¹⁰Ihwo duẹ eya rẹ esẹ rayen, vwẹ evun wẹn, ayen nene eya vẹ afe vwerhẹ vwẹ evun wẹn.

¹¹Ọvo gbe aye rẹ ọrivẹ rọye ẹgua, ọfa rọvwọ oniọvo rẹ aye rọye, ọfa ghwa rọvwọ oniọvo rọye, ọmọtẹ rẹ ọsẹ rọye

¹²A jẹ udi kẹ ihwo rere ayen vwo sun ọbara vwẹ evun wẹ, wo suẹn igho wo ghwe brẹ ba igho rere wọ vwọ mrẹ erere vwẹ oma rẹ ọrivẹ wẹn, wọ je ghwa karhiẹ obo rẹ ọrivẹ vwori mie, me da chọrọ owẹ ẹro, eriyin Ọrovwohwo Ọghẹnẹ tare.

¹³Nighe, fiki rẹ ọtiọye na, me da teye abọ mẹ koko fiki rẹ ọghware ru wọ ghwa ihwo mẹ ria, kugbe ọbara rọ hẹ uherevie wẹn.

¹⁴Kẹ udu wẹn sa gba, eyẹ abọ wẹn sa gan vwẹ ẹdẹ re me vẹ owẹ da cha davwọ na? Mẹvwẹ Ọrovwohwo re tarọ, ki mi ruo gba.

¹⁵Ke me hra wẹ nene ẹgborho na me hra owẹ wan irho na, ki mi si inuhu nẹ uwe oma.

¹⁶Ka wan oma wẹn gbe vwe ẹgua vwẹ irharo rẹ ẹgborho na; ku wo riẹn nẹ mẹvwẹ Ọrovwohwo na.

¹⁷Ota rẹ Ọrovwohwo de bru vwe rhe:

¹⁸Ọmọ rẹ ohwo, uwevwi rẹ Izrẹl rhoma rhi hirhe phihọ emu ghevweghe kẹ vwẹ, ayen ejobi re kpae, idọnọ kugbe ẹrovwo kugbe odje kugbe utehru kugbe isinika vwe evun re erhanre, ayen ejobi hirhe phihọ emu ghevweghe.

¹⁹Fiki rẹ otiọye na ke e nẹ Ọrovwohwo Ọghẹnẹ tare: Fikiridie ovwan ejobi rhi hirhe phihọ emu ghevweghe na, vwẹ ọtiọye na, nighe, Ke me ghwẹ ovwan ejobi kpo uherevie rẹ Jerusalẹm.

²⁰Kirobo rẹ ihwo ghwẹ idọnọ kugbe ẹrovwo kugbe odje kugbe utehru kugbe isinika koko phihọ erhanre, e mi dju erhanre na phihọ rere ọ vwọ wran na, ọtiọye me ghwẹ ovwan koko vwẹ ivuemiovwo mẹ kugbe ophu mẹ, ke me ghwẹ ovwan phihọ evun rọye ke me wran ovwan.

²¹Ke me ghwẹ ovwan koko ki mi phopho erhanre rẹ ophu mẹ phihọ ovwan, kẹ ovwan cha wran vwẹ evun rọye.

²²Kirobo rẹ idọnọ wran vwẹ evun rẹ erhanre na, ọtiọye a cha wran wẹn vwẹ uherevie rọye, ku wọ riẹn nẹ mẹvwẹ Ọrovwohwo ri ku ophu mẹ ku we.

²³Ota rẹ Ọrovwohwo de bru vwe rhe:

²⁴Ọmọ rẹ ohwo, ta kẹ, wọwẹ otọ ro jẹfuọn, eyẹ ra rhọ osio phihọ vwẹ ẹdẹ rẹ ivuemiovwo-o.

²⁵Isun rọye vwẹ uherevie rọye e họhọ okpohrokpo ro do rọ chẹghẹ eranvwe na, ayen ria ihwo kpokpọ; ayen ghwẹ efe vẹ eravwọ esiri, ayen bru evakpo buebu phihọ uherevie rọye.

²⁶Irherẹn rọye vwẹ urhi mẹ gbe ozighi ayen de gbe ekuakua efuanfon mẹ ẹgua, ayen rhe vwo ofẹnẹ kẹ obo re fonro kugbe obo re vwo gbe otọ-ọ, eyẹ ayen ji yono ofene rọ herọ kẹ obo ri jẹfuọn vẹ obo re fọnro-o, ayen se ẹdidjala mẹ gbe emu-u, ọtiọye na ke ayen gbe vwe ẹgua vwẹ ohri rẹ ayen.

²⁷Isun rọye re hẹ uherevie rọye e họhọ ikpohrokpo re ria eranvwe ọkpokpọ, re rhaphiẹ ọbara, ayen ghwọrọ ihwo rere ayen vwo re erere rẹ eku.

²⁸Emraro rọye da vwẹ ophiẹvwe vwo ghwọrọ ayen, re mrẹ emramrẹ rẹ efian re bọ epha rẹ efian kẹ ayen, tanẹ, E nẹ Ọrovwohwo Ọghẹnẹ tare, jẹ Ọrovwohwo na tare-e.

²⁹Ihwo re otọ na yono obọ ra ghwa ihwo ria ayen ki rhe gborho ihwo vwẹ idjerhe, ayen shenyẹ ivwiogbere kugbe ihwo rẹ akpọ bẹn, ayen da karhiẹn igho mie erhorha ri vwo ohwo re chọ ọchọ raye-en.

³⁰Me da guọnọ ohwo vwẹ ohri rẹ ayen rere ọ bọn igbẹhẹ na rọ mudia vwẹ asan guọghọre rọ hẹ obaro mẹ vwẹ otọ na, rere mi vwo jẹ ẹguọghọ; ẹkẹvuọvo a mrẹ ọvuọvo-o.

³¹Fiki rẹ ọtiọye na ki mi ku ophu mẹ ku ayen; me vwẹ erhanre rẹ ophu mẹ torhẹ ayen, ke me guọnọ idjerhe rayen vwẹ enu rẹ uyovwi rayen, eriyin Ọrovwohwo Ọghẹnẹ tare.