Read urhobo Izikiẹl 24 Bible Online

Izikiẹl 24 - urhobo bible

Izikiẹl 24

¹Vwẹ ikpe rirhiri, vwẹ emeranvwe rihwe, vwẹ ẹdẹ ihwe rẹ emeranvwe na, ota rẹ Ọrovwohwo de bru vwe rhe:

²Ọmọ rẹ ohwo, si odẹ rẹ ẹdẹ nana phihọ otọ, ukpẹdẹ rẹ nonẹ na. Ovie ri Babilọn rhe imu vwi Jerusalẹm vwẹ ẹdọke ri nonẹ na.

³Gbe bru isẹ nana kẹ uwevwi ogbarogba re wọ ta kẹ ayen, E nẹ Ọrovwohwo Ọghẹnẹ tare. Mu ẹvwẹrẹ chere, muo kpahọ, ji ku ame phihọ rhe,

⁴Phi ibro rẹ eranvwe na phihọ, ibro esiri na, ugbowọ rọye kugbe eghwabọ rọye, ghwẹ omamọ rẹ esuanso vọn.

⁵Reyọ omamọ rẹ eranvwe vwẹ usun rẹ uchuru na, she ibrirhe phihọ otọ rọye, chere eranvwe na chere esuansọ na vwẹ evun rọye.

⁶Fiki rẹ ọtiọye na e nẹ Ọrovwohwo Ọghẹnẹ tare: Ekan kẹ orere rẹ ọbara na, kẹ ẹvwẹrẹ rẹ ekagba hẹ evun rọye, rẹ ekagba ji nẹ evun rọye-e! Reyọ ibro na ọvuọvo no, wọ sanọ-ọ.

⁷Kidie ọbara ro sun te otọ na ọ je hẹ uherevie rọye; o phiro phihọ enu rẹ oragha rọ pha phrẹphrẹphrẹ na, o kuro phihọ otọ rọ da vwẹ iwurhie rhurho.

⁸Re ọ vwọ kpare ophu mẹ, ra a vwọ reihri, mi phi ọbara rọ suru na phihọ enu rẹ oragha phrẹphrẹphrẹ na, rere e vwo je rhurho.

⁹Fiki rẹ ọtiọye na e nẹ Ọrovwohwo Ọghẹnẹ tare: Ekan kẹ orere rẹ ọbara na! Mi che ru ekru na rhonọ obo rọ epha vẹrhe.

¹⁰Ghwe ibrirhe na koko, koko erhanre na phihọ, nabọ chere ibro rẹ eranvwe na, ru wọ rhẹ ame rẹ oghwo na no, rere a torhẹ esuanso na.

¹¹Gbe mu ofefe rọye kpahe enu rẹ esia, rere ọ tuabọ, rere otọ rọye vwọ torhẹ, rẹ inuhu rọye vwọ wran vwẹ evun rọye, re ekagba rọye vwọ torhẹ.

¹²Ke me de lagha oma mẹ diodi; ọkpan rẹ ekagba rọye na erhanre sa torhẹ no-o.

¹³Ekagha rọye na ọye ọfanrhiẹn vẹ igberadja wẹn. Me hworhẹ owẹ yu wọ rhọvwe fon nẹ inuhu wẹ-ẹn, wọ gbe cha fon ọfa-a bẹsiẹ me cha vwọ kpa ophu mẹ ku we nu.

¹⁴Mẹvwẹ rẹ Ọrovwohwo ta nure; ọke de rhi te, ki mi ruo; mi gbi rhivwi kpo uko-o, mi che ju we vwo-o, mi che kurhẹriẹ-ẹ; ki mi gu ẹdjọ wẹ, kirobo rẹ idjerhe wẹn vẹ uruemu wẹn epha, eriyin Ọrovwohwo Ọghẹnẹ tare.

¹⁵Ota rẹ Ọrovwohwo da rhoma bru vwe rhe:

¹⁶Ọmọ rẹ ohwo, nighe, mi re muegbe re me cha vwọ reyọ ojevwe rẹ ẹro wẹn nẹ uwe oma kpregede; yu wo che muomahọ-ọ eyẹ viẹ eyẹ amẹoviẹ wẹn che sun te otọ-ọ.

¹⁷Ku ẹnwẹn kokodo, ẹkẹvuọvo wo jọ phia-a; wo muomahọ kẹ ọ ro ghwuru-u. Vwẹ erhu wẹn tughẹ, ku isabato wẹn phihọ awọ wẹn; wo rhurhẹ ẹbẹrunu wẹ-ẹn, eyẹ wọ ria ikara rẹ otu rẹ uvweri-i.

¹⁸Ọtiọye me da ta kẹ ihwo na vwẹ urhiọke, vwẹ ovwọnvwọn rọye aye mẹ de ghwu. Vwẹ irhiọke rivẹ mi de ru kirobo re ji urhi kẹ vwẹ na.

¹⁹Ihwo na da ta kẹ vwẹ, Wọ rha ta ke avwanre obo rẹ eravwo nana cha vwọ phia kẹ avwanre, ru wo vwo ruẹ ọtiọna na-a?

²⁰Etiyin me da ta kẹ ayen, Ota rẹ Ọrovwohwo de bru vwe rhe:

²¹Ta kẹ uwevwi rẹ Izrẹl, E nẹ Ọrovwohwo Ọghẹnẹ tare: Nighe mi che gbe ẹshẹ mẹ na ẹgua, eheri ọgangan wẹn na, obo ri je ibiẹro wẹn na kugbe obo rẹ ẹnwẹn wẹn guọnọ na; te emeshare wẹn te emetẹ wẹn ru wọ yan jovwo vwẹ obuko na ka vwẹ ọlọkọ nyavwe ayen hwe.

²²Ku wo ru kirobo ri mi ruru na; wo che rhurhu ẹbẹrunu wẹ-ẹn, eyẹ wọ cha re ikara rẹ uvweri-i.

²³Erhu wẹn kọ cha dia uyovwi wẹn ku wo ku isabato wẹn phihọ awọ wẹn, wo che vweri uvweri-i, eyẹ kẹ oviẹ-ẹ, ẹkẹvuọvo ku wo di brenu, vwẹ evun rẹ orukuruku wẹn kugbe wo mi rhe dirhivwẹ kẹ ohwohwo.

²⁴E nẹ kọye Izikiẹl dia oka kẹ wẹ; kirobo ro ruru kọye wo ru. Ọke rẹ ọnana da rhe, ku wọ riẹn nẹ mẹvwẹ Ọrovwohwo Ọghẹnẹ.

²⁵Wẹ, ọmọ rẹ ohwo, vwẹ ẹdẹ ri mi vwo mie ayen ogba ọgangan rayen, aghọghọ kugbe urinrin rayen, kugbe ojevwe rẹ ibiẹro rayen kugbe ẹguọnọ rẹ udu rayen, ji kugbe emeshare vẹ emetẹ rayen,

²⁶vwẹ ẹdẹ yena oghuvwu ko che bru we rhe rhi gbe ikun na kẹ wẹ.

²⁷Vwẹ ẹdẹ yena unu wẹn ko che rhie kẹ oghuvwu na, ku wo ta ota unu wẹn gbi di ọfa-a. Kẹ ọtiọye wọ dia oka vwọ kẹ ayen; kẹ ayen riẹn nẹ mẹvwẹ Ọrovwohwo na.