Read urhobo Izikiẹl 25 Bible Online

Izikiẹl 25 - urhobo bible

Izikiẹl 25

¹Ota rẹ Ọrovwohwo de bru vwe rhe.

²Ọmọ rẹ ohwo, tọn opharo wẹn vi ihwo rẹ Ammọn, re wo mraro kpahe ayen.

³Ta kẹ ihwo rẹ Ammọn, Nyo ota rẹ Ọrovwohwo Ọghẹnẹ: E nẹ Ọrovwohwo Ọghẹnẹ tare: Fikiridie wọ tare, Ẹhẹ! vwọ kpahe enu rẹ ẹshẹ mẹ na vwẹ ọke re vwo gbe ẹgua, je vwọ kpahe otọ rẹ Izrẹl vwẹ ọke ra vwọ kua fiotọ, je vwọ kpahe uwevwi ri Juda vwẹ ọke re vwo muo kpo imu;

⁴fiki rẹ ọtiọye na ki mi siobọ nẹ uwe kẹ ihwo rẹ obaro ọnre vwọ ghare ughwẹ, kẹ ayen che mu erhọn phihọ ohri wẹ, kẹ ayen che ru asan rẹ ayen dia phihọ uherevie wẹn, kẹ ayen re emamọ wẹn ayen ke da ameivie wẹn.

⁵Ki mi ru Rabbah phihọ otọ rẹ egbri vwọ ki kamẹl irere rẹ ihwo rẹ Ammọn kọ dia ogba rẹ igegede. Etiyin ku wọ riẹn nẹ mẹvwẹ ọye Ọrovwohwo na.

⁶Kidie e nẹ Ọrovwohwo Ọghẹnẹ tare: Fikiridie wọ teye abọ wẹn wọ da vwẹ awọ teye otọ wo da ghọghọ vẹ ọnko rọ vọn udu wẹn kpahe otọ rẹ Izrẹl,

⁷fiki rẹ ọtiọye na, nighe, me riẹn obọ mẹ kpahe owẹ, ki mi siobọ nẹ uwe kerẹ ighuvwu vwọ kẹ ẹgborho na, ke me fian wẹ nu oma rẹ ihwo na ke me cha ghwọrọ o wẹn nẹ evun rẹ ẹkuotọ na, ke me ghwọrọ owẹ. Etiyin ku wọ riẹn nẹ mẹvwẹ Ọrovwohwo na.

⁸E nẹ Ọrovwohwo Ọghẹnẹ tare: Fikiridie Moab tare, Nighe, uwevwi ri Juda je họhọ ẹgborho ri chekọ na ejobi,

⁹fiki rẹ ọtiọye na ki mi rhie ughwru ri Moab phihọ ghwroro kẹ irere re kẹrẹ ughwru na, urinrin rẹ orho na, Bethjeshimọt, Baalmeọn, kugbe Kiriathaim.

¹⁰Mi siobọ nẹ ayen vẹ ihwo rẹ Ammọn vwo kẹ ihwo rẹ obaro ọnre vwọ ghare ughwẹ, a gbe karohọ vwẹ ohri rẹ ẹgborho na ọfa-a,

¹¹ke me vwẹ Moab gu ẹdjọ. Etiyin kẹ ayen riẹn nẹ mẹvwẹ hẹ Ọrovwohwo.

¹²E nẹ Ọrovwohwo Ọghẹnẹ tare: Fikiridie Idọm reihri kpahe uwevwi ri Juda o de ru obo rẹ chọre vwẹ ihri rọ re kpahe ayen na,

¹³fiki rẹ ọtiọye e nẹ Ọrovwohwo Ọghẹnẹ tare, me riẹn obọ kpahe Idọm, ke me fian ohwo kugbe eranvwe no; ke me kua fiotọ; nẹ Tẹman re te Dedan kẹ ọlọko a vwọ nyavwe ayen hwe.

¹⁴Ke me reihri vwẹ obo rẹ Idọm vwẹ oma rẹ ihwo mẹ Izrẹl, kẹ ayen che ruẹ vwẹ Idọm kirobo rẹ ivuemiovwo mẹ epha kugbe obo rẹ ophu mẹ epha, ke ayen riẹn ihri ẹriọ mẹ, eriyin Ọrovwohwo Ọghẹnẹ tare.

¹⁵E nẹ Ọrovwohwo Ọghẹnẹ tare: Fikiridie ihwo ri Filistia reihri ayen da vwẹ ihri na vẹ ọnko na vwẹ udu vwọ guọghọ vwẹ eghrẹ rọ jere,

¹⁶fiki rẹ ọtiọye na e nẹ Ọrovwohwo Ọghẹnẹ tare, Nighe, ke me riẹn obọ mẹ vwọ kpahe ihwo ri Filistia, ke me fian ihwo ri Kẹrẹt kufia, ka guọghọ erhuru rayen ri chekọ.

¹⁷Ke me reihri vwẹ obọ rẹ ayen vẹ ivuemiovwo kugbe ophiaphia. Etiyin kẹ ayen riẹn nẹ mẹvwẹ Ọrovwohwo na, vwẹ ọke re me da reihri vwẹ obọ rẹ ayen.