Read urhobo Izikiẹl 26 Bible Online

Izikiẹl 26 - urhobo bible

Izikiẹl 26

¹Vwẹ ikpe ruhwọvo, vwẹ ẹdẹ rẹsosuọ rẹ emeranvwe na, ota rẹ Ọrovwohwo de bru vwe rhe:

²Ọmọ rẹ ohwo, fikiridie Taya ta ota kpahe Jerusalẹm nẹ, E nẹ, anurhoro rẹ ihwo na tuegheri, o rhiephihọ ghwroro kẹ vwẹ; kẹ oyovwi kẹvwẹ, vwẹ asakiephana a ghwọrọ te otọ na re,

³fiki rẹ ọtiọye na e nẹ Ọrovwohwo Ọghẹnẹ tare; Nighe, mi mu kpahe owẹ, E Taya, ke me cha kpare ẹgborho buebu vwọ so owẹ, kirobo rẹ omimi rẹ abadi kpara.

⁴Ayen ke guọghọ igbẹhẹ ri Taya, ayen mi kporo ohẹrhẹ rọye, ki mi hrohro ekpẹn rọye mie, ki mi ruo vwo dia oragha hrohrohro.

⁵Ko cha dia uherevie rẹ abadi kere asan ra vwẹ iriri tan, kidie me tarọ nure, eriyin Ọrovwohwo Ọghẹnẹ tare; kọ cha dia kerẹ emurẹ ugborho vwọ kẹ ẹgborho na;

⁶emetẹ rọye re dia obo ophori ka vwẹ ọlọkọ nyavwe ayen hwe. Etiyin ayen ke riẹn nẹ mẹvwẹ Ọrovwohwo na.

⁷Kidie e nẹ Ọrovwohwo Ọghẹnẹ tare: Nighe, me cha reyọ Nebukadreza ovie ri Babilọn nẹ obọhwere ọnre rhe vwọ so Taya, ovie rivie na, vẹ iyesi kugbe ekpẹrẹ vẹ ihwo re gua iyesi kugbe otu ofovwi buebu.

⁸Kọ vwe ọlọkọ nyavwe emetẹ wẹn re hẹ obo ophori hwe; kọ gba ọgba rẹ ohẹrhẹ vwo bru we dje, o mi hirhe ekpọfia rẹ ubiri rọye ku we.

⁹Ko hirhe okanrọ rẹ ikurusu rọye ku igbẹhẹ wẹn, kọ vwẹ ushure rọye vwo she oherhe wẹn.

¹⁰Iyesi rọye che buẹ gangan rẹ iwurhie rẹ ichiyotọ rọye de rhurhu we; igbẹhẹ wẹn ki che kpogho vwẹ edo rẹ ihwo re gua iyesi kugbe ekpẹrẹ vẹ idjighere, ọke rọ da cha wan anurhoro wẹn na kọ cha ruọ kere orere re bru uphrophro phihọ.

¹¹Ichiyi rẹ iyesi rọye kọye o vwo gbe irhuvwu wẹn pẹtẹpẹtẹ; kọ vwẹ ọlọkọ nyavwe ihwo wẹn hwe; ichivwo wẹn ride na ki che vwirhi she.

¹²Ekuakua rẹ efe wẹn ejobi ke dia emurẹ ugborho kẹ ayen, oghwa rẹ eki wẹn kọ dia emuọre kẹ ayen, ke ayen kporo igbẹhẹ wẹn te otọ ayen me rha guoghọ iwevwi iyoyovwi wẹn; ibieragha wẹn kugbe ibro rẹ igedu kugbe ekpẹn wẹn kẹ ayen cha ghwẹ ayen phihọ evun rẹ ame.

¹³Ihwehworo vẹ ine wẹn ke me da ayen ji, edo rẹ isorogun wẹn e gbi nyo ọfa-a.

¹⁴Ki mi ru we phihọ oragha hrohrohro; ku wọ dia asan ra vwẹ iriri tan; a gbe cha bọn wẹ ọfa bẹdẹ-ẹ; kidie mẹvwẹ Ọrovwohwo tarọ nure, eriyin Ọrovwohwo Ọghẹnẹ tare.

¹⁵E nẹ Ọrovwohwo Ọghẹnẹ ta kẹ Taya: irhuru na rhe che kpogho vwẹ umri rẹ edo rẹ eshe wẹn, vwẹ ọke rẹ otu re wan oma da guan, vwẹ ọke ra da nyavwe ihwo hwe vwẹ uherevie wẹ?

¹⁶Etiyin isun re hẹ obo abadi ki wotọ nẹ ekete rayen rhe, ayen me ghwiẹ edagha rayen nu, iwun re rhuori na ejobi ayen me ghwiẹ ayen nu, kẹ ayen vwẹ ophariẹ guegue vwo rhuo oma, ayen ki tidia otọ ke phariẹ guegue kọke kọke, ofu ko dje ayen kẹ wẹ.

¹⁷Ayen ki kuenu rẹ oviẹ kẹ wẹ, ke ta kẹ wẹ nẹ, Mavọ wọ ranvwiẹre nẹ evun rẹ abadi na, E orere ro kperi usi, ro vwo ẹgba gangan vwẹ enu rẹ abadi na, wẹ kugbe ihwo re dia evun wẹn, re vwẹ oshọ wẹn mu ayen ejobi re dia obo ophori!

¹⁸Asakiephana ibrotọ na ra phariẹ vwẹ ẹdẹ rẹ eshe wẹn; e, ibrotọ re hẹ obo abadi ofu de dje ayen hwe ra vwọ ghwọrọ owẹ.

¹⁹Kidie e nẹ Ọrovwohwo Ọghẹnẹ tare. Ọke mi vwo ru we phihọ orere ra kua fiotọ, kere irere ra kuanu, vwẹ ọke me da vwẹ urhie rhe rhi rhurhu uwe, rẹ ame na de rhi reghe uwe.

²⁰Etiyin ki mi che keke uwe ruotọ kugbe ayen ihwo ri kpo obo Ukpotọ, bru ihwo rẹ awanre ra, ku wọ ra dia akpọ rọ obotọ na, vwẹ ohri rẹ iwevwi rẹ awanre ri sheri, vwo kugbe ayen ihwo ri kpo obo ukpotọ, ọtiọye na a gbe cha mrẹ ihwo re dia wẹ ọfa-a eyẹ wo gbi che vwo asan vwẹ ohri rẹ ihwo ekpokpọ-ọ.

²¹Ki mi che ru oba wẹn muoshọ, wọ gbe cha dia ọfa-a; owenẹ a guọnọ owẹ dede, a gbe cha mrẹ wẹ ọfa-a, eriyin Ọrovwohwo Ọghẹnẹ tare.