Read urhobo Izikiẹl 27 Bible Online

Izikiẹl 27 - urhobo bible

Izikiẹl 27

¹Ota rẹ Ọrovwohwo de bru vwe rhe:

²Asakiephana wẹ, ọmọ re ohwo, kuenu rẹ ovie kẹ Taya,

³re wọ ta kẹ Taya, rọ dia kerẹ unu rẹ abadi, ọneki rẹ ihwo buebu vwẹ obo erhuru na, nẹ e nẹ Ọrovwohwo Ọghẹnẹ tare: E Taya, wẹ re tare nẹ, Me gbare vwẹ erhuvwu.

⁴Ughwru wẹ hẹ uherevie rẹ abadi; ihwo re bọn wẹn nabọ bọn wẹn vẹ erhuvwu gba.

⁵Ayen vwẹ uloho ro nẹ Sinae rhe vwọ bẹrẹ ephapha wẹn; ayen da reyọ igedu nẹ Lebanọn rhe vwo ru ọkpọ kẹ wẹ.

⁶Vwẹ ehahe ri Bashan ọye ayen vwọ kare uvi wẹn, ayen da vwẹ afọn so erheri ọ ro nẹ erhuru ri Saiprọs rhe, ra vwẹ akeni vwọ phare.

⁷Vwẹ emwa rẹ e rhuori ri nẹ Ijipt rhe ọye e vwo ru aphiana, rọ dia oka wẹn, ọgiọgiọ kugbe orhurhu ro nẹ erhuru rẹ Elishah rhe kọye ebọn wẹn.

⁸Ihwo re dia Sidọn kugbe Arvadi eye eguokọ wẹn; ewena ri Zema hẹ evun wẹn, ayen imueghuvwu wẹn.

⁹Ekpako ri Gẹbal vẹ ewena rọye hẹ evun wẹ, re vwẹ okarọ vwo diẹ uphrophro okọ wẹn; ekpo rẹ abadi ejobi vẹ otu ri bio hẹ evun wẹn, re ayen wene ekuakua wẹn mie we.

¹⁰Pesha kugbe Lud kugbe Put je hẹ usun rẹ ihwo rẹ ofovwi wẹn; ayen da vwẹ ekpọfia vẹ erhu vwọ ya wẹ; ayen da vwẹ erhuvwu vwọ kẹ wẹ.

¹¹Ihwo rẹ Arvadi kugbe Hẹlẹk gba riariẹ igbẹhẹ wẹn phihọ, ihwo ri Gamad hẹ obo ohẹrhẹ wẹn; ayen da vwẹ ekpọfia wẹn vwọ ya igbẹhẹ wẹn riariẹ; ayen de ni erhuvwu wẹn gbagba.

¹²Tarshish vẹ owẹ chueki fiki rẹ efe buebu ro rhe re: idọnọ efuafon, utehru, oze, kugbe odje rẹ ayen vwo wene ekuakua wẹn.

¹³Javan, Tubal, kugbe Mẹshẹk vẹ owẹ re gba chueki; ayen vwẹ ekpuyovwi rẹ ihwo vẹ ekuakua rẹ ẹrovwo vwo wene ekuakua rẹ eki wẹn.

¹⁴Bet-togarmah vwẹ iyesi wene ekuakua wẹn, iyesi rẹ vwo phi ofovwi kugbe irhuẹn.

¹⁵Ihwo ri Rhode vẹ owẹ chueki; erhuru buebu na eye oghoghẹre rẹ eki wẹn, ayen Me vwẹ akeni vẹ ikoro vwọ hwa osa kẹ wẹ.

¹⁶Idọm vẹ owẹ chueki kidie wo vwo oghwa rẹ eki buebu; ayen me vwẹ ibieragha iyoyovwi, vẹ isene, emwa rẹ ifi, omamọ rẹ esada, evwarha, kugbe ikprukpru vwo wene oghwa rẹ eki wẹn.

¹⁷Juda kugbe otọ rẹ Izrẹl vẹ owẹ chueki; ayen me vwẹ ọka, oliv, kugbe owe re ka mọ, ọnyọn evwri kugbe udẹ vwo wene ekuakua rẹ eki wẹn.

¹⁸Damaskọs vẹ owẹ chueki fiki rẹ ekuakua obuebu wẹn, fiki rẹ efe dohwo doka rẹ ayen vwori; udi ri Hẹlbọn, kugbe ẹton rẹ ogegede ọfuanfon,

¹⁹udi ro nẹ Uzal rhe ọye e vwo wene oghwa rẹ eki wẹn; utehru ra nabọ duvwu, owangha, kugbe ugiri eye e vwo wene ekuakua rẹ eki wẹn.

²⁰Dedan vẹ owẹ chueki rẹ emwa ra vwọ hwa enu rẹ iyesi gua.

²¹Arebia kugbe isun ri Kedar eye ineki eghaghare wẹn vwẹ imigegede, egbo, kugbe ẹvwe; enana ayen vẹ owẹ vwọ chueki.

²²Ineki ri Sheba kugbe Raamah vẹ owẹ chueki; ayen da vwẹ omamọ rẹ egẹ ri gbo ọnrhe ororo vwo wene oghwa rẹ eki wẹn, kugbe ibieragha re ma ghanre, kugbe oro.

²³Haran, Kannẹh, Idẹn, Asshọr, kugbe Shilmad vẹ owẹ chueki.

²⁴Enana vẹ owẹ chueki rẹ omamọ re iwun, emwa ọgiọgiọ kugbe emwa rẹ ifi, kugbe iruẹ ra sanọre ra vwẹ ifi gba kokoroko, vwẹ enana keye ayen vẹ owẹ vwọ chueki.

²⁵Ekọ ri Tarshish eye a vwọ ghwa oghwa rẹ ekuakua rẹ eki wẹn. Etiyin wọ da vọn tunu a da nabọ fan wẹ gbe vwẹ evun rẹ uherevie rẹ abadi.

²⁶Eguokọ wẹn de bi we phia ra ro uherevie rẹ abadi. Odju rẹ obaro ọnre shu we vwẹ uherevie rẹ abadi.

²⁷Efe wẹn, ekuakua wẹn, oghwaeki wẹn, eguokọ wẹn imueghuvwu wẹn, idiudio wẹn, ineki re ekuakua wẹn, kugbe ihwo rẹ ofovwi wẹn re hẹ evun wẹn ejobi, kugbe otu wẹn ejobi re hẹ uherevie wẹn, de divwi vwẹ uherevie rẹ abadi vwẹ ẹdẹ rẹ oghwọrọ wẹn na.

²⁸Vwẹ umri rẹ unuebo rẹ ihwo ri mueghuvwu wẹn orhoma rẹ orho yena ejobi de mu kpogho,

²⁹ayen ejobi re yọnrọn uvi de wo nẹ evun rẹ ekpo rayen rhe. Eguokọ kugbe imueghuvwu ejobi re hẹ abadi na de re mudia erhuru

³⁰ayen da teye ugoroviẹ kẹ wẹ, ayen da viẹ oviẹ ro muenu. Ayen da ghwẹ iwurhie ku iyovwi rayen ayen de bruoma phihọ iwurhie.

³¹Ayen de gbe oma rayen akpan fiki wẹ, ayen de rhuo emwa rẹ uvweri, ayen da viẹ kẹ wẹ oviẹ rọ yara korokoro, vẹ oma emuophihọ rode.

³²Vwẹ oma ebere rayen ayen da teye ugoroviẹ kẹ wẹ, ayen da viẹ wẹ: Ono a guọghọre kerẹ Taya dẹvure vwẹ uherevie rẹ abadi?

³³Ọke rẹ ekuakua wẹn de ne obo abadi rhe, ku wọ vọn ihwo buebu evun; vẹ efe wẹn buebu kugbe oghwaeki wẹn keye wo che vwo fe ivie rẹ akpọ na.

³⁴Asakiephana e shu we phihọ oma rẹ abadi re, vwẹ evun rẹ ame okokodo; oghwaeki wẹn vẹ eguokọ wẹn vẹ owẹ divwi kugbe.

³⁵Ofu wẹ dje ihwo ejobi re dia obo erhuru na; uguegue ro ivie rayen ejobi oma, opharo rayen ki kpighwọ

³⁶Ineki re hẹ ohri rayen ra fiunu kẹ wẹ; wo rhi te oba ro muoshọ wọ gbe cha dia rhiri bẹdẹ ọfa-a.