Read urhobo Izikiẹl 28 Bible Online

Izikiẹl 28 - urhobo bible

Izikiẹl 28

¹Ota rẹ Ọrovwohwo de bru vwe rhe.

²Ọmọ rẹ ohwo, ta kẹ osun rẹ Taya, E nẹ Ọrovwohwo Ọghẹnẹ tare: Fikiridie udu wẹn herẹ, wọ da rha tanẹ, mẹvwẹ ọghẹnẹ, mi tidia agbara rẹ eghẹnẹ na, vwẹ uherevie rẹ abadi, yẹ ohwo wo ruẹ, wọ dia Ọghẹnẹ-ẹ, owene wo dje oma wẹn ghwanghwanre kerẹ oghẹnẹ —

³wo ghene ghwanre nọ Daniẹl; o vwo emu ọvuọvo rọ djahe kẹ wẹ-ẹ,

⁴vwẹ oma rẹ aghwanre wẹn vẹ erianriẹn wẹn ọye wo vwo vwo efe kẹ oma wẹn; wo de koko oro ve idọnọ efuafon phihọ uwevwi rẹ efe wẹn.

⁵Vwẹ ẹghwanre rode wọ vwọ chueki na ọye efe wẹn vwo bu na, udu wẹn da rhe vọn vẹ eheri fiki rẹ efe wẹn na —

⁶vwẹ ọtiọye na e nẹ Ọrovwohwo Ọghẹnẹ tare; Fikiridie wo roro oma wẹn ghwanghwanre kerẹ ọghẹnẹ,

⁷ọtiọye, nighe, Me cha reyọ erhorha rhe vwọ so wẹ, ẹgborho ro me muoshọ ejobi; ayen ki che yoro elọkọ rayen vwọ kpahe erhuvwu rẹ ẹghwanre wẹn na kẹ ayen miovwi urinrin wẹn.

⁸Ayen ki keke uwe phihọ evun rẹ Ukpotọ, ku wo ghwu ughwu rẹ ohwo re hweri vwẹ uherevie rẹ abadi.

⁹Ku wo je tanẹ, mẹvwẹ Ọghẹnẹ, vwẹ irharo rẹ otu ri hwe we na, ye wewe ohwo ghevweghe, wọ dia ọghẹnẹ-ẹ, vwẹ obọ rẹ ihwo re wan we oma na?

¹⁰Wo che ghwu ughwu rẹ upheruphe vwẹ obọ rẹ erhorha, kidie me tarọ nure, eriyin Ọrovwohwo Ọghẹnẹ tare.

¹¹Ota rẹ Ọrovwohwo da rhoma bru vwe rhe:

¹²Ọmọ rẹ ohwo, teye ugoroviẹ phihọ kẹ ovie ri Taya, re wọ ta kẹ, E nẹ Ọrovwohwo Ọghẹnẹ tare: Wẹ oka rẹ orugba, rọ vọnre vẹ ẹghwanre rọ gbare vẹ erhuvwu.

¹³Obo Idẹn wọ epha, udju rẹ Ọghẹnẹ na; oragha koragha ro yovwiri ejobi e vwo rhurhu we, kanelia, topaz, kugbe jasper, krisol, beril, kugbe onix, safaya, carbuncle, emerald; ra vwẹ oro ru ọye ẹghwẹphihọ o wẹn vẹ ona re bru phihọ owẹ. Vwẹ ẹdẹ ra ma wẹ na ọye a rhuẹrẹ ayen phihọ.

¹⁴Omamọ rẹ shẹrub ra vwẹ evwri te ọye e ru we phihọ; wọ da hẹ enu rẹ ugbenu ọfuanfon rẹ Ọghẹnẹ; vwẹ evun rẹ uherevie rẹ ibieragha rẹ erhanre wọ da yan.

¹⁵Wọ re abe vwẹ idjerhe wẹ-ẹn nẹ ẹdẹ ra vwọ ma wẹn rhe, bẹsiẹ ra ke rhe mrẹ orukuruku vwẹ obọ wẹ.

¹⁶Vwẹ evun rẹ eki obuebu ru wọ chua na wọ da rhe vọn vẹ ozighi, wọ de rhi ru umwemwu; Me da djẹ wẹ kufia kirobo ri tuoma nẹ ugbenu rẹ Ọghẹnẹ, shẹrub ro sun we da djẹ wẹ kufia nẹ uherevie rẹ ibieragha rẹ erhanre na.

¹⁷Udu wẹn da rhe vọn vẹ eheri fiki rẹ erhuvwu wẹn; wo de miovwi aghwanre wẹn fiki rẹ erhuvwu wẹn. Mi de mu we teye otọ; Me da ban wẹ phihọ vwẹ obaro rẹ ivie, rere ayen vwọ tọn ẹro rayen vi we.

¹⁸Vwẹ oma rẹ orukuruku obuebu wẹn vwẹ eki rẹ ọghware ru wọ chua wọ de vwo gbe ẹshẹ wẹn ku, kọye mi de duvwu erhanre phihọ uherevie wẹn ọ da tọrhẹ owẹ, mi de hirhe uwe phihọ iwurhie vwẹ enu rẹ otọ na vwẹ obaro rẹ ihwo ejobi re mrẹ wẹ.

¹⁹Ihwo ejobi re riẹn wẹn vwẹ ohri rẹ ihwo na ofu de dje ayen kẹ wẹ; wo rhi te oba ro muoshọ re wọ gbe cha dia rhiri bẹdẹ ọfa-a.

²⁰Ota rẹ Ọrovwohwo de bru vwe rhe:

²¹Ọmọ rẹ ohwo, tọn opharo wẹn vi Sidọn, ru wọ mraro kpahọ,

²²re wọ ta, E nẹ Ọrovwohwo Ọghẹnẹ tare: Nighere, mi mu kpahe owẹ, E Sidọn, ki mi vwẹ urinrin mẹ phia vwẹ ohri wẹ. Ke ayen riẹn nẹ mẹvwẹ Ọrovwohwo vwẹ ọke ri mi de gu ẹdjọ vwẹ evun rọye, re me da vwẹ urimrin mẹ phia vwẹ evun rọye,

²³kidie mi che ji emiavwe bro rhe, ọbara kọ cha dia irhuvwu rọye; i re hweri ki che she vwẹ evun rọye, fiki rẹ ọlọkọ rọ vwọ so ayen vwi kabọ kabọ. Etiyin kẹ ayen riẹn nẹ mẹvwẹ Ọrovwohwo.

²⁴Vwọ kẹ uwevwi rẹ Izrẹl ebẹ gbe dia rọ bẹre ohwo ọfa-a eyẹ odjigbe ro duvwu ohwo gbe dia ọfa-a vwẹ ohri rẹ ihwo re dia kẹrẹ re reyọ ayen vwọ jehwẹ. Etiyin ayen ke riẹn nẹ mẹvwẹ ọye Ọrovwohwo na.

²⁵E nẹ Ọrovwohwo Ọghẹnẹ tare: Ọke mi de rhi koko uwevwi rẹ Izrẹl nẹ ohri rẹ ihwo ra hra ayen ra na, ra da vwẹ urinrin mẹ phia vwẹ oma rẹ ayen vwẹ obaro rẹ ẹgborho na, Eeiyin kẹ ayen cha dia otọ rẹ obọ rayen re me vwọ kẹ odibo mẹ Jekọp.

²⁶Ayen ke cha dia dẹn vwẹ evun rọye, ayen ke cha bọn iwevwi ke kọn ogba ri vain. Ayen ke dia dẹn, vwẹ ọke ri mi de che gu ẹdjọ rẹ ihwo re dia kẹrẹ ayen re vwẹ ayen jehwẹ. Etiyin kẹ ayen riẹn nẹ mẹvwẹ Ọrovwohwo Ọghẹnẹ rayen.