Read urhobo Izikiẹl 29 Bible Online

Izikiẹl 29 - urhobo bible

Izikiẹl 29

¹Vwẹ ukpe rihwe, vwẹ emeranvwe rihwe, vwẹ ẹdẹ rihwivẹ rẹ emeranvwe na, ota rẹ Ọrovwohwo de bru vwe rhe:

²Ọmọ rẹ ohwo tọn opharo wẹn vi Fẹro ovie rẹ Ijipt, ru wọ mraro kpahọ vẹ Ijipt ejobi;

³ta ota, re wọ ta, E nẹ Ọrovwohwo Ọghẹnẹ tare: Nighere, Me vwọ so wẹ, Fẹro ovie rẹ Ijipt, okpodjerivwi ro figberi uherevie rẹ urhie rọye, rọ tanẹ, Nile mẹ na ọ robọ mẹ; mẹvwẹ re marọ.

⁴Me vwẹ oghọre sa ohwa wẹn, ki mi ru iyeri rẹ ivwori wẹn re jephihọ esẹn wẹn; ki mi kpono uwe nẹ uherevie rẹ ivwori wẹn na, vẹ iyeri rẹ ivwori wẹn na ejobi re jephihọ esẹn wẹn.

⁵Ke me kpare owẹ phihọ evun rẹ aghwa te owẹ te iyeri re ivwori wẹn, ku we she phihọ uphephẹ ghwroro, a rha ghwẹ ovwan koko-o siẹvo kẹ esho-o. Me vwẹ ovwan ru emuọre kẹ eranvwe rẹ aghwa ta emephran rẹ enu.

⁶Etiyin ihwo re dia Ijipt ejobi ke cha riẹn nẹ mẹvwẹ Ọrovwohwo na. Fikiridie wọ epha kerẹ ọkpọ rẹ eyareya kẹ uwevwi rẹ Izrẹl.

⁷Ọke re ayen da vwẹ obọ ghane owẹ, wo mi vwirho, wọ me bere igabọ rayen; ọke rẹ ayen da vwẹ oma rẹro owẹ, wo mi vwirho, rere wo ru ehun rayen vwo nẹ ẹdia,

⁸fiki rẹ ọtiọye na enẹ Ọrovwohwo Ọghẹne tare: Nighe, Me cha vwẹ ọlọkọ bru we rhe, kọ cha nyavwe ohwo vẹ eranvwe nẹ uwe,

⁹otọ rẹ Ijipt ka cha kua fiọtọ ko hirhe phihọ erhurhu. Etiyin ayen ke riẹn nẹ mẹvwẹ Ọrovwohwo. Fikiridie wọ tare, Nile ọ mẹ, mẹvwẹ re marọ,

¹⁰fiki rẹ ọtiọye na, nighere, ki mi mu kpahe owẹ, mi ji mu kpahe irhie wẹn, ki mi ru otọ rẹ Ijipt vwọ hirhe phihọ asan ra kua nu vẹ erhurhu diodi, nẹ Migdol re te Siyene, rhiri re te ughwru rẹ Itiopia.

¹¹Owọ re ohwo gbi se chiyo wa-an, owọ rẹ eranvwe ji se chiyọ wa-an, ikpe ujuvẹ soso a rha mrẹ ohwo ro yere asan na-a.

¹²Ke me kua otọ rẹ Ijipt fiotọ vwẹ uherevie rẹ irere ra kua fiotọ na ejobi; irere rọye ka kua fiotọ ikpe ujuvẹ soso vwẹ ohri rẹ irere ra kua fiotọ na. Me hra ihwo rẹ Ijipt na ro ohri rẹ ẹgborho na, ka hra ayen nene ohri rẹ irho na ejobi.

¹³Kidie e nẹ Ọrovwohwo Ọghẹnẹ tare: Vwẹ oba rẹ ikpe ujuvẹ na ki nu si ihwo rẹ Ijipt na ejobi koko nẹ ohri rẹ ihwo ra hra ayen ra na;

¹⁴ke me rhoma vwẹ efe rẹ Ijipt rhivwi rhe, ke me vwẹ ayen rhivwi kpo otọ ri Patrọs, otọ rẹ ayen nurhe, kẹ etiyin ayen da dia uvie rẹ ayen kpoghono vwẹ akpọ na,

¹⁵o gbi mu oma rọye kpenu nọ ẹgborho ọfa-a, ki mi ru ayen hahavwe gangan re ayen de je ẹgborho ọfa esuo bẹdẹ.

¹⁶Ihwo rẹ Izrẹl gbe vwẹ ẹro suọ ọfa bẹdẹ-ẹ, re ayen da karohọ orukuruku rayen, rẹ ayen da dje bru ayen ra nẹ ọ cha ayen uko. Etiyin ayen ke riẹn nẹ mẹvwẹ Ọrovwohwo Ọghẹnẹ na.

¹⁷Vwẹ ukpe ruje gbẹ ighwrẹ, vwẹ emeranvwe rẹsosuọ, vwẹ ẹdẹ rẹ ẹsosuọ rẹ emeranvwe na, ota rẹ Ọrovwohwo de bru vwe rhe:

¹⁸Ọmọ rẹ ohwo, Nebukadreza ovie rẹ Babilọn da nẹrhẹ unuofovwi rọye wian owian gangan kpahe Taya, kuyovwi kuyovwi ejobi de gbe akpan kigabọ kigabọ ejobi da kpen bobobo, yẹ ekpuyovwi rọye eyẹ unuofovwi rọye mrẹ emu ọvuọvo mie Taya ro te vwọ hwa osa rẹ owian rẹ ayen wianre fiki rọye-e.

¹⁹Fiki rẹ ọtiọye na e nẹ Ọrovwohwo Ọghẹnẹ tare Nighere, Me cha vwẹ otọ rẹ Ijipt vwọ kẹ Nebukadreza ovie ri Babilọn, kọ ghwẹ efe rọye ejobi kpo o mi miovwo ọ me kua reyọ; kọye re cha dia osa vwọ kẹ unuofọvwi rọye.

²⁰Me vwẹ otọ rẹ Ijipt vwọ kpẹvwẹ ẹse kẹ wẹ kidie wọ wian phihọ, fikiridie ayen wian kẹ vwẹ, eriyin Ọrovwohwo Ọghẹnẹ tare.

²¹Vwẹ ẹdẹ yena ki mi ruo re ighoro da wan nẹ uwevwi rẹ Izrẹl rhe, ki mi rhie unu wẹn vwẹ ohri rẹ ayen. Etiyin ayen ke riẹn nẹ mẹvwẹ Ọrovwohwo na.