Read urhobo Izikiẹl 3 Bible Online

Izikiẹl 3 - urhobo bible

Izikiẹl 3

¹Ọ da ta kẹ vwẹ, Ọmọ rẹ ohwo, re obo ra vwọ kẹ wẹ na, ekpirhi rẹ ọbe nana, wọ yanran, ra ta ota kẹ uwevwi rẹ Izrẹl.

²Etiyin mi de rhie unu mẹ, ọ da vwẹ ekpirhi rẹ ọbe na kẹ vwẹ re.

³Ọ da ta kẹ vwẹ, Ọmọ rẹ ohwo, re ekpirhi rẹ ọbe nana re Me vwọ kẹ wẹ na rere ọ vọn wẹ evun. Etiyin me da riọ, ọ da miẹ miẹ nẹghẹ nẹghẹ vwẹ unu Mẹ kerẹ ọnyọn.

⁴Ọ da ta kẹ vwẹ, Ọmọ rẹ ohwo, yanran, wo kpo uwevwi rẹ Izrẹl na, re wọ ta eta Mẹ vwọ kẹ ayen.

⁵Kidie ọ dia ihwo erhorha vẹ ephẹrẹ gangan e ji we bru ra-a, ẹkẹvuọvo uwevwi rẹ Izrẹl na —

⁶o dia ihwo buebu re vẹ ephẹrẹ ọrhorha gangan, rẹ eta rọye wo jẹ riẹ-ẹn. Omuero, mi de ji we bru ihwo ọtiọye, ayen cha kerhọn wẹ.

⁷Ẹkẹvuọvo uwevwi rẹ Izrẹl cha sa kerhọn wẹ-ẹ; kidie ayen rhọvwe kerhọn mẹ-ẹ; fikiridie uwevwi rẹ Izrẹl ejobi epha vẹ arhare gangan vẹ udu kokoroko kpoi.

⁸Nighere, mi ji ru opharo wẹn gangan vwọso epharo rayen, arhare wẹn vwọso arhare rayen.

⁹Kerẹ okpohrokpo rọ djoma ọtiọye mi ru arhare wẹn, wọ djẹ oshọ rẹ aye-en, wo jẹ ofu rẹ opharo rayen dje we-e, kidie uwevwi rẹ okpetu ayen ruẹ.

¹⁰Ọ da rhoma ta kẹ vwẹ, Ọmọ rẹ ohwo, eta mẹ ejobi re me cha ta kẹ wẹ reyọ ayen phihọ udu wẹn, rere wọ vwẹ erhon wẹn nyo ẹme.

¹¹Wọ yanran bru otu re hẹ imu na, ihwo wẹn, re wọ ta kẹ ayen, Enẹ Ọrovwohwo Ọghẹnẹ tare; owenẹ ayen nyo owenẹ ayen je nyo.

¹²Etiyin Erhi na de mu vwe mudia, kirobo rẹ urinrin rẹ Ọrovwohwo na vwo vrẹn nẹ asan rọye, mi de nyo edo rode rẹ otọ ro kpoghori vwẹ obuko me;

¹³ọnana edo rẹ ibekpe rẹ eranvwe ekpokpọ rẹ teye ohwohwo, kugbe edo rẹ idjugẹn vwẹ akakọ rayen, rọ mrare kerẹ otọ rode ro kpogho.

¹⁴Erhi na de mu vwe vrẹn ọ da reyọ ovwẹ yanran, mẹ da yanran vwẹ evun rẹ ophu vwẹ evun rẹ ogidi rẹ erhi mẹ, obọ rẹ Ọrovwohwo da gan kpahe ovwẹ;

¹⁵mi de rhi bru ihwo na otu re hẹ imu na rhe vwi Telabib, re dia oma rẹ urhie ri Kiba. Mi de tidia etiyin ẹdẹ ighwrẹ ofu de dje vwe hwe.

¹⁶Vwẹ oba rẹ ẹdẹ ighwrẹ na, ota rẹ Ọrovwohwo na de bru vwe rhe.

¹⁷Ọmọ rẹ ohwo me vwẹ owẹ ru ọrhẹrotọ kẹ uwevwi rẹ Izrẹl; ọke kọke wo de nyo ota nẹ unu mẹ rhe, ku wo ghwoghwo ota mẹ na kẹ ayen.

¹⁸Ọ da dianẹ me ta kẹ oruimwemwu, Wo ghini ghwu, wo gbi rhe ghwoghwo kẹ-ẹ, eyẹ wọ gbe rha ta kẹ oruimwemwu ro jẹ idjerhe umwemwu rọye vwo-o, rere o sivwi arhọ rọye, oruimwemwu yena ko ghwu phihọ orukuruku rọye, ẹkẹvuọvo ọbara rọye ke me nọ ekpẹn rọye vwẹ obọ wẹn.

¹⁹Ẹkẹvuọvo wo de ghwoghwo kẹ oruimwemwu, ro rhe kurhẹriẹ nẹ imwemwmu rọye-e, eyẹ nẹ idjerhe umwemwu rọye-e, ko ghwu phihọ orukuruku rọye, ẹkẹvuọvo ko wo sivwi arhọ wẹn rho.

²⁰Ọfa, ọ da dianẹ ọvwata kurhẹrie nẹ ọvwata rọye ro de ru orukuruku, ri mi de phi uchukurhe umwemwu phihọ obaro rọye, ko ghwu, fikiridie wo ghwoghwo kẹ-ẹ, ko ghwu fiki rẹ umwemwu rọye, ọvwata rọye ro ruru a gbe karohọ-ọ, ẹkẹvuọvo ọbara rọye ka guọnọ vwẹ obo wẹn.

²¹Ẹkẹvuọvo wo de rhe ghwoghwo kẹ ọvwata nẹ o ruẹ imwẹmwm-u, o rhe ghine ru umwemwu-u kọ ghene rhọ, fikiridie ọ reyọ eghwoghwo wẹn, yẹ ekpuyovwi wẹn ji sivwi arho wẹn rhọ.

²²Obọ rẹ Ọrovwohwo vẹ ovwẹ da herọ; ọ da ta kẹ vwẹ, Vrẹn yanran kpo obo uphephe na, kẹ etiyin mi de nene uwe ta ota.

²³Etiyin mi de vrẹn me da yanran kpo obo uphephe na, mi vwo ni, urinrin rẹ Ọrovwohwo de mudia vwẹ etiyin, kerẹ urinrin re me ka mrẹ vwẹ oma rẹ urhie ri Kiba na, mi de she bọvwọn opharo mẹ rhuotọ.

²⁴Ẹkevuovọ Erhi na da ro ovwẹ oma, o de mu vwe mudia, ọ da ta ota kẹ vwẹ, Yanran, ra kare ẹchẹ gbe oma vwẹ uwevwi wẹn.

²⁵Wẹ rhe, E ọmọ rẹ ohwo, nighe, ka ghwẹ ifi kpahe owẹ, ka vwẹ ayen gba wẹ, rere wo vwo je otafe ẹruọ vwe ohri rẹ ihwo na.

²⁶Ki mi ru erenvwe wẹn ya mu we ọhwa rẹ unu wẹn, ku wo che diunu wọ gbe sa ghwọ ku aye-en; kidie ayen uwevwi rẹ okpetu.

²⁷Ẹkẹvuọvo ọke me da ta ota kẹ wẹ, ki mi rhie unu wẹn, ku wọ ta kẹ ayen, Enẹ Ọrovwohwo Ọghẹnẹ tare, ọ ro nyo, e jo nyo; ọ rọ senre nẹ ọye nyo-o, jo sen; kidie ayen uwevwi rẹ okpetu.