Read urhobo Izikiẹl 30 Bible Online

Izikiẹl 30 - urhobo bible

Izikiẹl 30

¹Ota rẹ Ọrovwohwo de bru vwe rhe.

²Ọmọ rẹ ohwo, mraro, re wọ ta, E nẹ Ọrovwohwo Ọghẹnẹ tare: Beroma, Eghwo kẹ ẹdẹ na!

³Kidie ẹdẹ na kẹri re, ẹdẹ rẹ Ọrovwohwo na kẹri re, ẹdẹ ro che mu egho, ọke rẹ ughwu kẹ ẹghorho na.

⁴Ọlọkọ kọ cha rhe Ijipt, enuebro kọ cha dia vwẹ Itiopia, vwẹ ọke rẹ ihwo re hweri de she vwẹ Ijipt, ra da ghwẹ efe rọye yanran, re de kporo ichivwo rọye te otọ.

⁵Itiopia, kugbe Put, kugbe Lud, kugbe Arabia ejobi, kugbe Libya, kugbe ihwo rẹ otọ ri se oma koko, ọlọkọ kọye ayen ejobi cha wan ghwu.

⁶E nẹ Ọrovwohwo tare: Otu re cha Ijipt uko che she, eheri rẹ ogangan rayen che kpotọ, nẹ Migdol re te Siyene ọlọkọ kọye ayen wan she vwẹ evun rọye, eriyin Ọrovwohwo Ọghẹnẹ tare.

⁷Kọ cha kua vwẹ ohri rẹ irho ra kua fiotọ irere rọye ke cha dia vwẹ evun rẹ uherevie rẹ irere ra guọghọ te otọ.

⁸Etiyin ayen ke riẹn nẹ mẹvwẹ Ọrovwohwo na, ọke ri mi de duvwu erhanre phihọ Ijipt, ichuko rọye ejobi ka guọghọ ayen.

⁹Vwe ẹdẹ yena iyinkon rẹ okpakpa ki che nẹ obọ mẹ rhe rhi guegue ihwo rẹ Itiopia vwẹ ọke rẹ ayen roro phihọ-ọ, kẹ ayen che brenu vwẹ ẹdẹ rẹ ughwu rẹ Ijipt na, kidie, no, o cha rhe!

¹⁰E nẹ Ọrovwohwo Ọghẹnẹ tare, ke me cha vwẹ efe rẹ Ijipt te oba, vwẹ oma ri Nebukadreza ovie ri Babilọn.

¹¹Ọye vẹ ihwo rọye, ẹgborho ro me muoshọ na, ka cha reyọ ayen rhe rhe vwọ ghwọrọ otọ na; kẹ ayen cha riẹn ọlọkọ rayen kpahe Ijipt, irivwi rayen me rhe vọn otọ na.

¹²Ki mi ru Nile kpọ ke me shẹ otọ na kẹ ihwo umwemwu, ke me cha kua otọ na vẹ obo re herọ ejobi fiotọ, vwẹ obọ rẹ erhorha, Mẹvwẹ, Ọrovwohwo, re tarọ.

¹³E nẹ Ọrovwohwo Ọghẹnẹ tare Me guoghọ ema na, mi phi oba phihọ ema re hẹ Mẹmfis, a gbe mrẹ osun vwẹ otọ rẹ Ijipt ọfa-a.

¹⁴Ke me kua Patrọs fiọtọ, ki mi phi erhanre phihọ Zoan, ki mi vwi Thebes gu ẹdjọ.

¹⁵Ki mi ku ophu mẹphihọ Pelusiọm, ogba ọgangan rẹ Ijipt, ke me nyavwe urogho ri Thebes kufia.

¹⁶Ki mi phi erhanre phihọ Ijipt; Pelusiọm kọ dia uvwri rode ke kporo Thebes fi ke kporo igbẹhẹ rọye she.

¹⁷Ighele re On vẹ Pibẹsẹt ka vwẹ ọlọkọ nyavwe ayen hwe, ke mu eya na ighuvwu.

¹⁸Vwi Tehafnehes uvo na ko che mu Etiyin me da guọghọ isuesun rẹ Ijipt, ẹgba rọye ro vwo herẹ na ko che vwo oba, ka cha vwẹ egho rhurho, ke mu emetẹ rọye ighuvwu.

¹⁹Kenẹ me vwẹ Ijipt gu ẹdjọ. Etiyin kẹ ayen riẹn nẹ mẹvwẹ Ọrovwohwo na.

²⁰Vwẹ ukpe ruhwọvo, vwẹ emeranvwe rẹsosuọ, vwẹ ẹdẹ righwrẹ rẹ emeranvwe na, ota rẹ Ọrovwohwo de bru vwe rhe:

²¹Ọmọ rẹ ohwo, mi vwirhi ugbobọ ri Fẹro ovie rẹ Ijipt, gbe no, a je gba-a, ayen rha sa vwẹ amwa gba rere o vworo-o, rere ọ vwọ gan ro vwo jọ vwọ yọnrọn ọlọkọ

²²Fiki rẹ ọtiọye na e nẹ Ọrovwohwo Ọghẹnẹ tare: Nighe, mi mu kpahe Fẹro ovie rẹ Ijipt, ki mi vwirhi igbabọ rọye, te igbabọ rọye rọ ganre te ọ re vwirhiri na; ki mi ruo re ọlọkọ de she vabọ.

²³Ke me hra ihwo rẹ Ijipt re hẹ ohri rẹ ẹgborho na, kẹ ayen di mu vẹn ro otọ na ejobi.

²⁴Ki mi ru igbabọ rẹ ovie rẹ Babilọn gan, ki mi phi ọlọkọ mẹ phihọ obọ ẹkẹvuọvo ki mi vwirhi igbabọ rẹ Fẹro, ko de irhivwẹ gangan kerẹ ohwo rẹ egbọlọ sheri.

²⁵Ki mi ru eghwabọ rẹ ovie ri Babilọn, ẹkẹvuọvo igbabọ ri Fẹro ki she; ayen ke riẹn nẹ mẹvwẹ Ọrovwohwo na. Ọke ri mi de phi ọlọkọ mẹ phihọ obọ rẹ ovie rẹ Babilọn, kọ riẹn kpahe otọ rẹ Ijipt;

²⁶Ke me hra ihwo rẹ Ijipt na phihọ ohri rẹ ẹgborho na kẹ ayen vẹn ro irho na ejobi. Etiyin kẹ ayen riẹn nẹ mẹvwẹ Ọrovwohwo na.