Read urhobo Izikiẹl 33 Bible Online

Izikiẹl 33 - urhobo bible

Izikiẹl 33

¹Ota rẹ Ọrovwohwo de bru vwe rhe:

²Ọmọ rẹ ohwo, ta ota kẹ ihwo wẹn rẹ wọ ta kẹ ayen, Ọ da dianẹ me vwẹ ọlọkọ rhe otọ na, rẹ ihwo rẹ otọ na da reyọ ohwo nẹ ohri rayen rhe, rẹ ayen de vwo ru ọrhẹrotọ,

³rọ da mrẹ ọlọkọ rọ cha otọ na ro de hworo owanre rọ da vuẹ ihwo na,

⁴ri kohwo kohwo ro nyo umri rẹ owanre na rọ rha kẹnẹ oma-a, rẹ ọlọkọ na da rhe rhe reyọ yanran, ọbara rọye kọ dia uyovwi rẹ obọ rọye.

⁵O nyo umri rẹ owanre na, yọ rha kẹnẹ oma-a, ọbara rọye kọ dia uyovwi rẹ obọ rọye. Ẹkẹvuọvo ọ da dianẹ kọ kẹnẹ oma, manẹ jẹ sivwi arhọ rọye.

⁶Ẹkẹvuọvo ọrhẹrotọ na mrẹ ọlọkọ rọ cha ro rhe hworo owanre-e, rẹ ihwo na da kẹnẹ oma-a, rẹ ọlọkọ na da rhe, rọ da reyọ ọvo vwẹ usun rẹ ayen; a reyọ ohwo yena yanran vwẹ orukuruku rọye, ẹkẹvuọvo ọbara rọye ka nọ ekpẹn rọye vwẹ obọ rẹ ọrhẹrotọ na.

⁷Ọtiọye wẹ, ọmọ rẹ ohwo, mi vwo ru ọrhẹroto kẹ uwevwi rẹ Izrẹi, kọke kọke wo vwo nyo ota nẹ unu mẹ rhe, ku wọ kpa okpa mẹ phihọ ayen obọ.

⁸Ọ da dianẹ me ta kẹ ohwumwemwu, E ohwumwemwu na, wo ghine ghwu, wọ rha ta ota kẹ ohwumwemwu na rọ da rhẹriẹ nẹ idjerhe rọye-e, ohwumwemwu yena ko ghwu phihọ orukuruku rọye, ẹkẹvuọvo ke me nọ ekpẹn rẹ ọbara rọye vwẹ obọ wẹn.

⁹Ẹkẹvuọvo wọ da kpa okpa kẹ ohwumwemwu nọ rhẹriẹ nẹ idjerhe rọye, jẹ ọ rha rhẹriẹ nẹ idjerhe rọye-e, kọ ghwu phihọ orukuruku rọye, ẹkẹvuọvo ji wo sivwi arhọ wẹn nure.

¹⁰Wẹ, ọmọ rẹ ohwo, ta kẹ uwevwi rẹ Izrẹl, E nẹ wọ tare Ogbeku rẹ avwanre kugbe imwemwu rẹ avwanre e he uyovwi rẹ avwanre, avwanre ki di hrẹn muẹ fiki rẹ ayen, komavọ avwanre ru rhọ?

¹¹Ta kẹ ayen, kirobo re me herọ na, eriyin Ọrovwohwo Ọghẹnẹ tare, mi vwo omavwerhovwẹ vwẹ ughwu rẹ ohwumwemwu-u, ẹkẹvuọvo rẹ ohwu-mwemwu rhẹriẹ oma nẹ idjerhe rọye re ọ rhọ, rhẹriẹ oma, rhẹriẹ oma nẹ idjerhe ọbrabra wẹn, kidie wo di vwo ghwu, E uwevwi rẹ Izrẹl?

¹²Wẹ, ọmọ rẹ ohwo, ta kẹ ihwo wẹn, Ọvwata rẹ ọvwata che se sivwo vwẹ ọke ro de ru ogbigbiru-u, vwọ kẹ umwemwu rẹ ohwumwemwu, ọ rha wan oma rọye she vwẹ ọke rọ da rhẹriẹ nẹ umwemwu rọye-e, yẹ ọvwata rha cha sa vwẹ ọvwate rọye rhọ-ọ vwẹ ọke ro de ru umwemwu.

¹³Owenẹ me ta kẹ ọvwata nẹ ọ ghene rhọ, ẹkẹvuọvo ọ da vwẹ ẹro so ọvwata rọye ro de ru orukuruku, a gbe sa karophihọ uruemu esiri rọye ọvuọvo-o; ẹkẹvuọvo vwẹ evun rẹ orukuruku ro de ru na kẹ etiyin o de ghwu.

¹⁴Ọfa, owenẹ me ta kẹ ohwumwemwu, wo ghine ghwu, rọ da rha rhẹriẹ nẹ umwemwu rọye ro de ru obo re wan urhi vẹ obo re gbare,

¹⁵ọ da dianẹ ohwumwemwu reyọ obo re vwo viemwa kẹ kpo, rọ da vwẹ obo ro chori kpo, ro de nene urhi rẹ arhọ ro rhe ru orukuruku-u, kọ ghine rhọ, ọ gbi rhe ghwu-u.

¹⁶A gbe karophihọ umweniwu rọye ọvuọvo ro ru kpahọ-ọ, o ru obo re wan urhi vẹ obo re gbare, kọ ghene rhọ.

¹⁷Yẹ ihwo wẹn tanẹ, Idjerhe rẹ Ọrovwohwo dia ososo-o, da yẹ idjerhe rayen ri jẹ ọsoso ẹdia.

¹⁸Ọke rẹ ọvwata de siobọ nẹ ọvwata rọye, ro de ru orukuruku, ko ghwu phihọ.

¹⁹Ọke rẹ ohwumwemwu de siobọ nẹ umwemwu rọye, ro de ru obo re wan urhi vẹ obo re ghare, kọ rhọ fiki rọye.

²⁰Yẹ ovwan tanẹ, Idjerhe rẹ Ọrovwohwo na dia ọsoso-o. E uwevwi rẹ Izrẹl, me cha vwẹ ovwan ọvuọvo guẹdjọ kirobo rẹ idjerhe rọye epha.

²¹Vwẹ ikpe rihwivẹ rẹ imu rẹ avwanre, vwẹ emeranvwe rẹ ihwe, vwẹ ẹdẹ riyori rẹ emeranvwe na, ohwo ọvo rọ djẹ vabọ nẹ Jerusalẹm rhe de bru vwe rhe tanẹ, Orere na sheri.

²²Asakiephana obọ rẹ Ọrovwohwo vẹ ovwẹ da herọ vwẹ ovwọnvwọn yena tavwe rẹ oghuvwu na ke rhe, o de rhie unu mẹ bẹsiẹ rẹ ohwo na ki bru vwe rhe vwe irhiọke, etiyin unu mẹ de rhie, mi gbi diunu ọfa-a.

²³Ota rẹ Ọrovwohwo de bru vwe rhe:

²⁴Ọmọ rẹ ohwo, ihwo re dia etọ nana ra kua jovwo vwẹ Izrẹl na ra tanẹ, Ebraham ohwo ọvuọvo ruẹ, yẹ ọye a vwẹ otọ na ghare ughwẹ, ẹkẹvuọvo ye avwanre pha buebu, ya ghene vwẹ otọ na vwọ ghare avwanre ughwẹ.

²⁵Vwẹ ọtiọye na gba ta kẹ ayen, E nẹ Ọrovwohwo Ọghẹnẹ tare. Wọ ria uvwo vẹ ọbara, yọ wọ kpare opharo wẹn nẹ edjọ wẹn, yi wo suẹn ọbara; kọye wọ da cha re ughwẹ rẹ otọ na?

²⁶Wo gbobọ phihọ oda, wo ruẹ ẹgua ovwan ohwohwo gbe aye rẹ ọrivẹ rọye ẹgua, kọye wa cha vwọ re ughwẹ rẹ otọ na?

²⁷Ta ọnana kẹ ayen, E nẹ Ọrovwohwo Ọghẹnẹ tare: Kirobo re me herọ na, uyota ayen otu re dia asan ra kua jovwo ọlọkọ a cha vwọ nyavwe ayen hwe, ọ rọ hẹ obo evun rẹ aghwa me cha vwọ kẹ eranvwe nẹ e re kugbe ayen otu re hẹ obo ogba ọgangan kugbe evun rẹ emwa emiavwe kọye ayen wan ghwu.

²⁸Ki mi ru otọ na rọ da kuare ro de hirhe phihọ ofefe, egba rọye ro vwo herẹ na ko che vwo oba, Igbenu rẹ Izrẹl ka cha kua fiotọ ra gbe mrẹ ohwo ọvuọvo ro cha wanvrẹ-ẹn.

²⁹Etiyin ayen ke riẹn nẹ mẹvwẹ Ọrovwohwo na, vwẹ ọke ri mi de ru otọ na kua fiọtọ kugbe ofefe fiki rẹ ẹgua rẹ ayen re ayen ruẹ.

³⁰Vwọ kẹ wẹ, ọmọ rẹ ohwo, ihwo wẹn ri si uyovwi koko ta ota kpahe owẹ vwẹ oma rẹ igbẹhẹ kugbe inurhoro rẹ iwevwi na, re ta kẹ ohwohwo, oniọvo kẹ oniọvo rọye tanẹ, yanrhe, re wo rhi nyo ota ro nẹ obọ rẹ Ọrovwohwo rhe.

³¹Ayen ki bru we rhe kirobo rẹ ihwo cha, ayen ki che tidia kẹrẹ owẹ kerẹ ihwo mẹ, ayen ki nyo obo ru wo ta ẹkẹvuọvo yẹ ayen ruo-o, kidie ẹbẹrunu ọye ẹguọnọ rẹ ayen epha, ẹkẹvuọvo yẹ ayen vwẹ udu rayen kpahe erere rayen cha mrẹ.

³²Ghe, nighe, ku wọ epha kẹ ayen kerẹ ihwo ri kere ighọmọ re ghrẹghrẹ urhuru ri hworo ekuakua, kidie ayen nyo obo re wọ ta, ẹkẹvuọvo yẹ ayen che ruo-o.

³³Ọke rẹ ọnana da rhe — o che jẹ cha-a. Etiyin kẹ ayen cha riẹn nẹ ọmraro je hẹ ohri rẹ ayen jovwo re.