Read urhobo Izikiẹl 36 Bible Online

Izikiẹl 36 - urhobo bible

Izikiẹl 36

¹Wẹ, ọmọ rẹ ohwo, mraro kẹ igbenu rẹ Izrẹl re wọ ta, E igbenu rẹ Izrẹl, nyo ota rẹ Ọrovwohwo na.

²E nẹ Ọrovwohwo Ọghẹnẹ tare: Fikiridie ọvweghrẹ na ta kpahe owẹ, Ẹhẹ, Igbenu rẹ awanre na rhi hirhe phihọ ughwẹ rẹ avwanre,

³vwẹ ọtiọye na mraro, re wo ta, E nẹ Ọrovwohwo Ọghẹnẹ tare: Fikiridie a kua wẹ fiotọ, ra da guọghọ owẹ nẹ abọ kabọ rhe, ru wo de rhi hirhe phihọ ughwẹ rẹ ẹgborho ri chekọ na, ro de rhi hirhe phihọ ikuegbe vẹ huhuhu rẹ ihwo na,

⁴Fiki rẹ ọtiọye na E igbenu rẹ Izrẹl, nyo ota rẹ Ọrovwohwo Ọghẹnẹ: E nẹ Ọrovwohwo Ọghẹnẹ ta kẹ igbenu ride vẹ e rẹ itete, ito vẹ iyara na, asan ra kua nu kakare kugbe irere ra kua jovwo na, ri rhi hirhe phihọ eranvwe re hweria vẹ ehwẹjẹ vwọ kẹ ẹgborho ri chekọ re riariẹ owẹ phihọ na;

⁵vwẹ ọtiọye na kẹ e nẹ Ọrovwohwo Ọghẹnẹ tare: Me ta ota vwẹ evun rẹ omẹriọ mẹ vwọ kpahe ẹgborho ri chekọ na, vwọ kpahe Idọm ejobi, re vwẹ otọ mẹ ghare ughwẹ kẹ oma rẹ ayen vẹ aghọghọ rode kugbe ehwẹjẹ, rere ayen mrasan vwọ reyọ rere ayen gborho.

⁶Fiki rẹ otiọye gba mraro kpahe otọ rẹ Izrẹl re wọ ta kẹ igbenu ride vẹ itete, kẹ ito vẹ iyara, E nẹ Ọrovwohwo Ọghẹnẹ tare: Me ta ota vwẹ ophu vẹ omaẹriọ mẹ, fikiridie ovwan re oja rẹ ehwẹjẹ rẹ ẹgborho re riariẹ owẹ phihọ na.

⁷Ọtiọye na, e nẹ Ọrovwohwo Ọghẹnẹ tare: Mi duvwu iyori nẹ ẹkuotọ re riariẹ owẹ phiyọ na je cha re oja rẹ ehwẹjẹ na.

⁸Ẹkẹvuọvo wẹ. E igbenu rẹ Izrẹl, eghọn wẹn che yoro rhe, re da rhe mọ emamọ wẹn kẹ ihwo mẹ Izrẹl, kidie ayen cha rhe uwevwi nanana.

⁹Kidie, nighe, Me vẹ owẹ obo, ki mi rhivwi bru we rhe, ka rhoma voro uwe, a me rhoma kọn wẹ.

¹⁰Me kẹ wẹ ihwo buebu, uwevwi rẹ Izrẹl na ejobi, ayen ejobi tototo, irere na ka rhoma dia ayen asan ifefe na ka rhoma bọn ayen.

¹¹Mi che ru ihwo te eranvwe wẹn bun phiyọ, we bu rere ayen bu phiyọ; kẹ ayen bun phiyọ je mọ emamọ; ki mi ru rere ihwo rhoma dia wẹ kerẹ ọke rẹ ẹsosuọ, ki mi ru we yovwi nọ obo ri jovwo. Ko wọ cha riẹn nẹ omẹvwẹ ọyen Ọrovwohwo na.

¹²E, ke me nẹrhẹ ihwo rhe yan vwẹ evun wẹ, ihwo mẹ Izrẹl, kẹ ayen vwẹ owẹ ghare ughwẹ, ku wọ dia ẹkẹn uku rayen, wo gbi hwe emọ mie ayen ọfa-a.

¹³E nẹ Ọrovwohwo Ọghẹnẹ tare: Fikiridie ihwo ta kẹ wẹ, wọ ghwọrọ ihwo, wo hwe emọ rẹ ẹgborho wẹn,

¹⁴vwẹ ọtiọye na wọ gbe cha ghwọrọ ihwo ọfa-a, wọ gbi che hwe emọ mie ẹgborho wẹn ọfa-a, eriyin Ọrovwohwo Ọghẹnẹ tare,

¹⁵mi gbi ji che ju we nyo ehwẹjẹ rẹ ẹgborho na ọfa-a, wọ gbe cha mrẹ omavovwẹ rẹ ihwo na ọfa-a, ayen gbi che ru ẹgborho wẹn she ọfa-a, eriyin Ọrovwohwo Ọghẹnẹ tare.

¹⁶Ota rẹ Ọrovwohwo de bru vwe rhe.

¹⁷Ọmọ rẹ ohwo, ọke rẹ uwevwi rẹ Izrẹl vwọ dia otọ rẹ obọ rayen, ayen de gbe ẹgua vwẹ idjerhe rayen vẹ uruemu rayen, uruemu rayen vwẹ obọ mẹ da dia gbegbe kerẹ aye rọ diare.

¹⁸Kọye mi de ku ophu mẹ ku ayen fiki rẹ ọbara rẹ ayen sun te otọ vwẹ evun rẹ otọ na, kidie ẹdjọ rẹ ayen vwori gbere ẹgua.

¹⁹Me da hra ayen ro ohri rẹ ẹgborho na, ayen da vẹn ro irho na; kirobo rẹ uruemu vẹ eyere rayen epha eriyin mi che guẹdjọ rayen nene.

²⁰Ẹkẹvuọvo ọke re ayen rhi vwo te ẹgborho na, kasan kasan rẹ ayen teri, ayen de gbe odẹ ọfuanfon mẹ na ẹgua, kidie ihwo ta kpahe ayen nẹ, Enana ihwo rẹ Ọrovwohwo, yẹ ẹkẹvuọvo ayen je yan jẹ otọ rọye vwo.

²¹Ẹkẹvuọvo odẹ ọfuanfon mẹ re davwẹ oja, ọ rẹ uwevwi rẹ Izrẹl nẹrhẹ e gbe ẹgua vwẹ ohri rẹ ẹgborho rẹ ayen ra re na.

²²Vwẹ ọtiọye na gba ta kẹ uwevwi rẹ Izrẹl, E nẹ Ọrovwohwo Ọghẹnẹ tare: O dia fiki wẹ-ẹn, E uwevwi rẹ Izrẹl, ọye mi che vwo ru ọnana-a, ẹkẹvuọvo fiki rẹ odẹ ọfuanfọn mẹ, ru wọ gbe ẹgua vwẹ ohri rẹ ẹgborho ru wọ ra re na.

²³Ki mi dje ase vẹ ẹfuọn rẹ odẹ mẹ, re gbe ẹgua vwẹ ohri rẹ ẹgborho na, ru wo ji gbe ẹgua vwẹ ohri rẹ ayen; ẹgborho na ke riẹn nẹ mẹvwẹ Ọrovwohwo, eriyin Ọrovwohwo Ọghẹnẹ tare, Vwẹ ọke re me vwọ wan oma wẹ dje ẹfuọn mẹ kẹ ẹro rayen mrẹ.

²⁴Kidie me cha reyọ owẹ nẹ ẹgborho na rhe, mi mi si we koko nẹ irho na rhe, ke me vwẹ owẹ rhe oto rẹ obọ wẹn.

²⁵Ke me fẹrẹ ame ọfuanfọn ku we, ku wọ fon nẹ ijẹfuọn wẹn, ke me hworhẹ edjọ wẹn ejobi nẹ uwe oma.

²⁶Udu ọkpokpọ kọye me vwọ kẹ wẹ, erhi ọkpokpọ kọye mi phihọ evun wẹn, ke me reyọ udu rẹ oragha nẹ evun wẹn ke me kẹ wẹ udu rẹ uvwo.

²⁷Ki mi phi erhi mẹ phihọ evun wẹn, ki mi ru we vwọ yan nene iji mẹ wọ me rha jomaotọ sẹrọ rẹ irhi me.

²⁸Ku wọ cha dia otọ re me vwọ kẹ esẹ wẹn; ku wọ dia ihwo mẹ, ke me dia Ọghẹnẹ wẹn.

²⁹Ki mi si we nẹ ijẹfuọn wẹn ejobi, ke me vuẹ rhe ọka ki mi ruọ ro bu phihọ owẹvwe gbi che si kẹrẹ owẹ-ẹ.

³⁰Ki mi ru emamọ rẹ irhe kugbe emamọ rẹ udju bu phihọ, rere wo vwo jẹ omẹvuọ rẹ owẹvwe ẹmrẹ vwẹ ohri rẹ ẹgborho na.

³¹Etiyin wọ ke cha karophihọ idjerhe omiomiovwi wẹn, kugbe uruemu wẹn ro je yovwo; oma wẹn ko che tu we oma fiki rẹ orukuruku wẹn kugbe uruemu rẹ ẹgua wẹn.

³²Ọ dia ifiki wẹn mi che vwo ruo na-a, eriyin Ọrovwohwo tare; nabọ riẹn ọyena. Jẹ oma vo wẹ re wọ harhe idjerhe wẹn, E uwevwi rẹ Izrẹl.

³³E nẹ Ọrovwohwo Ọghẹnẹ tare: Vwẹ ẹdẹ re me da cha hworhẹ owẹ nẹ orukuruku wẹn, ke me cha nẹrhẹ ihwo rhe dia evun rẹ irere wẹn, asan re guọghọ te otọ jovwo ka rhoma bọn ayen.

³⁴Otọ ra kua jovwo vẹrhe ka rhoma voro, ọ gbe cha dia otọ ra kuanu jovwo-o kirobo rọ epha vwẹ ẹro rẹ ihwo re wanvrẹn na-a.

³⁵Ayen ke ta, otọ nana ra kuanu jovwo na rhe rhoma hirhe phihọ ogba rẹ Idẹn; te otọ ofefe ra kuanu ro hirhe phihọ erhurhu vwẹ evun rẹ irere na ejobi a rhoma dia ayen re a je gba ogba phihọ ayen.

³⁶Ọke yena ẹgborho ri chekọ re riariẹ owẹ phihọ na ke cha riẹn nẹ mẹvwẹ, Ọrovwohwo na, rhoma rhe bọn asan ri kporo she na re, ọ da rhoma rhe kọn asan ra kua fiọtọ na, mẹvwẹ, Ọrovwohwo, tarọ nure, ki mi ruo.

³⁷“E nẹ Ọrovwohwo Ọghẹne tare: Ọnana me je cha uphẹ kẹ uwevwi rẹ Izrẹl nẹ ayen nọ vwẹ rere mi ru kẹ ayen, re mi ru ihwo rọye bu kerẹ igọde.

³⁸Kerẹ igodẹ re vwo ze izobo, kerẹ igodẹ vwi Jerusalẹm vwẹ ẹdorẹ, etiọye irere ifefe na vwọ vọn vẹ igodẹ rẹ ihwo. Kẹ ayen riẹn nẹ mẹvwẹ Ọrovwohwo,”