Read urhobo Izikiẹl 37 Bible Online

Izikiẹl 37 - urhobo bible

Izikiẹl 37

¹Obọ rẹ Ọrovwohwo da hẹ oma mẹ, ọ da vwẹ ovwẹ phia vwẹ Erhi rẹ Ọrovwohwo, vwẹ uherevie rẹ iyara na, rẹ ọ vọnre vẹ ibeku.

²Ọ da vwẹ ovwẹ ki ayen yariẹ, nighere ayen pha buebu vwẹ evun rẹ iyara na, e vwo no, ayen epha yaya gangan

³Ọ da ta kẹ vwẹ, Ọmọ rẹ ohwo, ibeku nana sa rhọ? Me da kpahe, E Ọrovwohwo Ọghẹne, wẹ re riẹnreọ.

⁴Ọ ke rhoma ta kẹ vwẹ, Mraro kpahe ibeku nana, re wọ ta kẹ ayen, E ibeku eyaya, nyo ota rẹ Ọrovwohwo

⁵E nẹ Ọrovwohwo ta kẹ ibeku nana: Nighere mi che ru ẹnwẹn rọ da ro wẹ oma, ku wọ cha rhọ.

⁶Ke me cha riẹn iriẹn nene uwe oma, uvwo kọ cha tanrhe vwẹ enu wẹ, ke me vwẹ ohọrọ rhurhu uwe, ki mi phi ẹnwẹn phihọ owẹ oma, ku wọ rhọ, ku wọ riẹn nẹ mẹvwẹ hẹ Ọrovwohwo.

⁷Ọtiọye me da mraro kirobo ro ji vwe, re me vwọ mraro na, ki mi nyo edo, nighere, ituetu geo; ibeku na da rhe tan kugbe, ubeku vẹ ubeku rọye.

⁸Ri mi vwo nẹ na, iriẹn da tan vwẹ enu rẹ ayen, uvwo tan phihọ ayen nure, ohọrọ tan rhurhu ayen nure, ẹkẹvuọvo ẹnwẹn hẹ evun rẹ aye-en.

⁹Etiyin ọ da ta kẹ vwẹ, Mraro kẹ ẹnwẹn na, mraro, ọmọ rẹ ohwo, re wọ ta kẹ ẹnwẹn na, E nẹ Ọrovwohwo Ọghẹnẹ tare: Ne igogo ẹne rẹ odju na rhe, E ẹnwẹn, rere wọ nwẹn ku enana re hweri na, rere ayen rhọ.

¹⁰Ọtiọye me da mraro kirobo re ji vwe na, ẹnwẹn da ro ayen oma, ayen da rhọ, ayen de vrẹn mudia, urogho rode gangan.

¹¹Etiyin ọ da ta kẹ vwẹ, Ọmọ rẹ ohwo, ibeku nana hẹ uwevwi rẹ Izrẹl ejobi. Nighere, ayen ta nẹ, Ibeku rẹ avwanre yamu, iphiẹrohọ rẹ avwanre reri, e bru avwanre kufia.

¹²Fiki rẹ ọtiọye na gba mraro, re wọ ta kẹ ayen, E nẹ Ọrovwohwo Ọghẹnẹ tare: Nighere, mi rhie ishi rẹ ovwan, E ihwo me; ke me vwẹ ovwan kpo obo otọ rẹ Izrẹl.

¹³Ku wa riẹn nẹ mẹvwẹ hẹ Ọrovwohwo, vwẹ ọke ri mi de rhie ishi rẹ ovwan, ke me kpare ovwan vrẹn nẹ ishi rẹ ovwan, E ihwo me.

¹⁴Ki mi phi Erhi mẹ phihọ evun wẹ, ku wọ rhọ, ke me vwẹ owẹ kpo otọ rẹ obọ wẹn, ku wọ riẹn nẹ mẹvwẹ, Ọrovwohwo re tarọ, mi ji ruo nure, ọtiọye Ọrovwohwo tare.

¹⁵Ota rẹ Ọrovwohwo de bru vwe rhe.

¹⁶Ọmọ rẹ ohwo, reyọ ubiurhe rere wo si phihọ, Vwọ kẹ Juda, kugbe emọ rẹ Izrẹl re ọ vọye gbe kuoma gbe; gba rha reyọ ubiurhe ọfa re wo si phihọ, Vwọ kẹ Josẹf (ubiurhe rẹ Ifrem) kugbe uwevwi rẹ Izrẹl ejobi re ọ vọye gbe kuoma gbe.

¹⁷Re wọ tan ayen kugbe phihọ ubiurhe ọvuọvo, re ayen dia ọvo vwẹ obọ wẹn.

¹⁸Ọke rẹ ihwo wẹn da ta kẹ wẹ, Wọ gbe rha ta obo rẹ enana epha kẹ avwanre?

¹⁹Gba ta kẹ ayen, E nẹ Ọrovwohwo Ọghẹnẹ tare: Nighere, me cha reyọ ubiurhe ri Josẹf (rọ hẹ obọ rẹ Ifrem) kugbe orua rẹ Izrẹl re vọye gbe kuoma gbe; ke me vwẹ ubiurhe ri Juda vwọ ba, ki mi ru ayen ubiurhe ọvuọvo, rere ayen dia ọvo vwẹ obọ mẹ.

²⁰Ọke rẹ ubiurhe ru wo si phihọ na da hẹ obọ wẹn vwẹ obaro rayen,

²¹gba ta kẹ ayen, E nẹ Ọrovwohwo Ọghẹnẹ tare: Nighere, me cha reyọ ihwo rẹ Izrẹl nẹ ẹgborho re me hra ayen ra rhe, ki mi koko ayen nẹ asan kasan rhe, ke me vwẹ ayen rhe otọ rẹ obọ rayen;

²²ke me vwẹ ayen ru ẹgborho ọvo vwẹ otọ na, vwẹ enu rẹ igbenu rẹ Izrẹl, ovie ọvo kọye dia ovie vwẹ enu rẹ ayen ejobi; ayen gbe dia ẹgborho ivẹ ọfa-a, a gbe ghare ayen phihọ uvie ivẹ ọfa-a.

²³Ayen gbe vwẹ ema rayen kugbe obọ ri tuoma na gbe oma rẹ ayen ẹgua ọfa-a, eyẹ ogbeku rayen, ẹkẹvuọvo ki mi sivwi ayen vwo nẹ imwemwu rẹ ayen vwo she kpo uko na, ke me hworhẹ ayen, ke dia ihwo mẹ, ke me dia Ọghẹnẹ rayen.

²⁴Odibo mẹ Devid kọ dia ovie vwẹ enu rẹ ayen, ayen ki vwo osuigodẹ ọvo. Ayen ki nene irhi mẹ, je jomaotọ vwọ yọnre iji mẹ.

²⁵Ayen ke dia otọ na rẹ esẹ rẹ ovwan diare re me vwọ kẹ odibo mẹ Jekọp, te ayen te emọ rayen kugbe uvwiẹ rayen ke dia etiyin bẹde; Devid odibo mẹ kọ dia osun rayen bẹdẹ.

²⁶Me vẹ ayen ke re ọphọ rẹ ufuoma; kọ dia ọphọ re rara me vẹ ayen cha re; ki mi bruphihọ kẹ ayen ki bun phihọ, ke me vwẹ ẹshẹ mẹ vwo vi vwẹ uherevie rẹ ayen rhiri bẹdẹ.

²⁷Ẹdia mẹ kẹ ohri rẹ ayen ọ dia, ke me dia Ọghẹnẹ rayen, ayen ke dia ihwo me.

²⁸Etiyin ẹgborho na ke riẹn nẹ mẹvwẹ Ọrovwohwo ri ru Izrẹl fon, vwẹ ọke rẹ ẹshẹ mẹ da hẹ uherevie rẹ ayen rhiri bẹdẹ.